ಹಿಂದಿನ ಸರ್ಕಾರಗಳಿಂದ ನಾಲಾ ಆಧುನೀಕರಣ ನಿರ್ಲಕ್ಷ್ಯ: ಶಾಸಕ ಪಿ.ಎಂ.ನರೇಂದ್ರಸ್ವಾಮಿ ಆರೋಪ

ಕನ್ನಡಪ್ರಭ ವಾರ್ತೆ ಮಂಡ್ಯ

ಗುರುವಾರ ಅವರು ತಾಲೂಕಿನ ವಿವಿಧೆಡೆ ನಾಲೆಯಲ್ಲಿ ಹರಿಯುತ್ತಿರುವ ನೀರಿನ ಪ್ರಮಾಣದ ವೀಕ್ಷಣೆ ನಡೆಸಿ ಮಾತನಾಡಿ, ನಾಲೆ ನಿರ್ಮಾಣವಾದ ಸಮಯದಿಂದ ಇಲ್ಲಿಯವರೆಗೆ ವಿತರಣಾ ನಾಲೆಗಳ ಲೈನಿಂಗ್ ಕಾಮಗಾರಿ ನಡೆದಿಲ್ಲ. ತೂಬುಗಳ ಕಾರ್ಯನಿರ್ವಹಣೆ ಸಮರ್ಪಕವಾಗಿಲ್ಲ. ಮುಖ್ಯ ನಾಲೆ ಸೇರಿದಂತೆ ವಿತರಣಾ ನಾಲೆಗಳ ಲೈನಿಂಗ್ ಕಿತ್ತುಹೋಗಿವೆ. ಇದರ ಪರಿಣಾಮವಾಗಿ ಕೆಆರ್‌ಎಸ್ ಅಣೆಕಟ್ಟು ಭರ್ತಿಯಾಗಿ, ನೂರಾರು ಟಿಎಂಸಿ ನೀರು ತಮಿಳುನಾಡಿಗೆ ಹರಿದರೂ ಮದ್ದೂರು, ಮಳವಳ್ಳಿ ಕೊನೆಯ ಭಾಗಕ್ಕೆ ನೀರು ಹರಿಸಿಕೊಳ್ಳಲಾರದಂತಹ ಸಂಕಷ್ಟ ಪರಿಸ್ಥಿತಿ ಎದುರಿಸುತ್ತಿದ್ದೇವೆ ಎಂದು ಬೇಸರದಿಂದ ನುಡಿದರು.

ಹಿಂದಿನ ಜೆಡಿಎಸ್-ಬಿಜೆಪಿ ಸರ್ಕಾರದ ಅವಧಿಯಲ್ಲಿ ನಾಲಾ ಆಧುನೀಕರಣ ಕಾಮಗಾರಿಗೆ ಹಣ ಬಿಡುಗಡೆಯನ್ನೇ ಮಾಡಿಲ್ಲ. ರಾಜಕೀಯಕ್ಕಾಗಿ ನಾನು ಸುಳ್ಳು ಹೇಳುತ್ತಿಲ್ಲ. ಬೇಕಿದ್ದರೆ ದಾಖಲೆಗಳನ್ನು ತೆಗೆದುನೋಡಲಿ. ಮುಖ್ಯನಾಲೆಯ ಲೈನಿಂಗ್ ಕಾಮಗಾರಿಯನ್ನೇ ಸರಿಯಾಗಿ ಮಾಡಿಲ್ಲ. ಕಾಂಗ್ರೆಸ್ ಸರ್ಕಾರ ಕಳೆದ ಬರಗಾಲದ ಸಮಯದಲ್ಲೂ ಕೊನೆಯ ಭಾಗದ ರೈತರ ಹಿತವನ್ನು ಗಮನದಲ್ಲಿಟ್ಟುಕೊಂಡು ೪೦ ಕಿ.ಮೀ. ಉದ್ದದವರೆಗೆ ಮುಖ್ಯ ನಾಲಾ ಲೈನಿಂಗ್ ಕಾಮಗಾರಿ ನಡೆಸಿದ್ದೇವೆ. ಎಲ್ಲಾ ನಾಲೆಗಳನ್ನೂ ಒಂದೇ ಬಾರಿಗೆ ಆಧುನೀಕರಣ ಮಾಡಲಾಗುವುದಿಲ್ಲ ಎಂದರು.

ನೀರು ನಿರ್ವಹಣೆಯಲ್ಲಿ ಮಾರ್ಪಾಡು ಅಗತ್ಯ:

ರಾಜಕೀಯ ಒತ್ತಡಗಳು ಏನೇ ಇದ್ದರೂ ಎಲ್ಲಾ ಭಾಗದ ರೈತರನ್ನು ಗಮನದಲ್ಲಿಟ್ಟುಕೊಂಡು ನೀರು ಹಂಚಿಕೆ ಹೇಗೆ ಮಾಡಬಹುದನ್ನು ನಿರ್ಧರಿಸಿ ಅದರಂತೆ ನೀರು ಪೂರೈಕೆ ಮಾಡಬೇಕು. ಎಲ್ಲಾ ಕಡೆಗೂ ಒಂದೇ ಬಾರಿಗೆ ನೀರು ಹರಿಸುವುದರಿಂದ ಯಾರಿಗೂ ಪ್ರಯೋಜನವಾಗುವುದಿಲ್ಲ. ಆನ್ ಅಂಡ್ ಆಫ್ ಸಿಸ್ಟಮ್‌ನಲ್ಲಿ ನೀರು ಸರಬರಾಜು ಮಾಡುವುದಕ್ಕೆ ಅಧಿಕಾರಿಗಳು ಮುಂದಾಗುವುದರೊಂದಿಗೆ ಮಾರ್ಪಾಡು ಮಾಡಿಕೊಳ್ಳುವಂತೆ ತಿಳಿಸಿದರು.

ಅಣೆಕಟ್ಟು ಭರ್ತಿಯಾದರೂ ಕೊನೆ ಭಾಗಕ್ಕೆ ನೀರಿಲ್ಲ:

ವಿಶ್ವೇಶ್ವರಯ್ಯ ಮುಖ್ಯನಾಲೆ, ಲೋಕ ಪಾವನಿ, ಹುಲಿಕೆರೆ ಟನಲ್ ಮತ್ತು ಲಿಂಕ್ ಕೆನಲ್ ಗಳಿಗೆ ಮಳವಳ್ಳಿ ಶಾಸಕ ಪಿಎಂ ನರೇಂದ್ರಸ್ವಾಮಿ ಭೇಟಿ ನೀಡಿ ನಾಲೆಯಲ್ಲಿ ಹರಿಯುತ್ತಿರುವ ನೀರಿನ ಪ್ರಮಾಣವನ್ನು ವೀಕ್ಷಿಸಿದರು