ಪಟ್ಟಾ ಭೂಮಿಯಲ್ಲಿ ಕಲ್ಲುಗಣಿಗಾರಿಕೆಗೆ ಭೂ ಪರಿವರ್ತನೆ ಬೇಡ

ಚಿತ್ರದುರ್ಗ: ಪಟ್ಟಾ ಭೂಮಿಯಲ್ಲಿ ಕಲ್ಲುಗಣಿಗಾರಿಕೆ ಮಾಡುವವರಿಗೆ ಭೂ ಪರಿವರ್ತನೆ ಮಾಡಿಸಬೇಕೆಂದ ನಿಯಮ ತೆಗೆಯಬೇಕೆಂದು ಯೂನಿಯನ್ ಆಫ್ ಕರ್ನಾಟಕ ಕ್ವಾರಿ ಅಂಡ್ ಸ್ಟೋನ್ ಕ್ರಷರ್ ಓನರ್ಸ್ ಅಸೋಸಿಯೇಷನ್ ಜಿಲ್ಲಾಧ್ಯಕ್ಷ ಅಬ್ದುಲ್ ಮಾಜಿದ್ ಆಗ್ರಹಿಸಿದರು.

ಮೈನರ್ ಮಿನರಲ್ ಕಲ್ಲುಗಣಿಗೆ ವಿಧಿಸಿದ ಜಿಯೋ ಫೆನ್ಸಿಂಗ್ ಪದ್ಧತಿಯನ್ನು ಸಂಪೂರ್ಣ ತೆಗೆದು ಹಾಕಬೇಕು.

ಡ್ರೋಣ್ ಸರ್ವೆಗೆ ಕಂದಾಯ ಇಲಾಖೆ ಒಪ್ಪದ ಕಾರಣ ತೆಗೆಯಬೇಕು. ಆ್ಯಂಡ್‌ ಯೂಸರ್ ಕಡೆಯಿಂದ ರಾಜಧನ ಪಡೆದುಕೊಳ್ಳಬೇಕು. ಕಲ್ಲುಗಣಿಗೆ ಜಿಲ್ಲಾ ಕೇಂದ್ರಗಳಲ್ಲಿ ಡಿಇಐಎಎ ಕಮಿಟಿಯಲ್ಲಿ ಎಫ್‌ಸಿ ಪಡೆದವರು ರಾಜ್ಯ ಕಮಿಟಿ ಎಸ್ಇಐಎಎಯಲ್ಲಿ ಪುನಃ ಇಸಿ ತೆಗೆದುಕೊಳ್ಳಬೇಕು ಎಂಬುವುದು ಸರಿಯಾದ ನಡೆಯಲ್ಲ. ಇದು ಸರ್ಕಾರದ ಕಡೆಯಿಂದ ಆಗಿರುವ ತಪ್ಪು, ಅವರೇ ಸರಿಪಡಿಸಬೇಕು. ರಾಜ್ಯದಲ್ಲಿ ಕೆಲವು ಕ್ವಾರಿ ಲೀಸ್‍ಗಳ ಅವಧಿ ಮುಗಿದಿದ್ದು ಅಥವಾ ಕಾರಣಾಂತರಗಳಿಂದ ಕ್ಲೋಸ್ ಆಗಿರುವ ಡೆಡ್ ರೆಂಟ್ ಬಾಕಿಯಿದೆ. ಈ ಬಾಕಿಯನ್ನು ಓಟಿಎಸ್ ನೀಡಿ ಪ್ರಕರಣವನ್ನು ಬಾಕಿ ಮುಕ್ತವಾಗಿ ಮಾಡಿ ಸಂಪೂರ್ಣವಾಗಿ ಕ್ಲೋಸ್ ಮಾಡಬೇಕು ಎಂದು ರಾಜ್ಯ ಸರ್ಕಾರವನ್ನು ಆಗ್ರಹಿಸಿದರು.

ಅಸೋಸಿಯೇಷನ್ ಸಂಘಟನಾ ಕಾರ್ಯದರ್ಶಿ ಸಿ.ಎಸ್.ಭಾಸ್ಕರ್ ಮಾತನಾಡಿ, ನಮ್ಮ ಹೋರಾಟದ ಪ್ರತಿಫಲವಾಗಿ ಇಪ್ಪತ್ತು ವರ್ಷ ಸಿ.ಫಾರಂ ಆಯಿತು. ನಮ್ಮ ಬೇಡಿಕೆಗಳನ್ನು ಮೊದಲಿನಿಂದಲೂ ಸರ್ಕಾರದ ಮುಂದಿಡುತ್ತ ಬರುತ್ತಿದ್ದೇವೆ. ಕಾನೂನು ತಿದ್ದುಪಡಿಗಳ ಅವಶ್ಯಕತೆಯಿದೆ. ಕಾನೂನಾತ್ಮಕವಾಗಿರಬೇಕೆಂಬುದು ನಮ್ಮ ಉದ್ದೇಶ. ಒಂದೊಂದು ಜಿಲ್ಲೆಯಿಂದ 1200-1300 ಅರ್ಜಿಗಳು ಹೋಗಿವೆ. ಇನ್ನು ಯಾವುದು ಸರಿ ಹೋಗಿಲ್ಲ. ಒಗ್ಗಟ್ಟಿನಿಂದ ಹೋರಾಡೋಣ ಎಂದರು.

ಅಸೋಸಿಯೇಷನ್ ನಿರ್ದೇಶಕ ಉಸ್ಮಾನ್ ಘನಿ ಖಾಜಿ, ಅಸೋಸಿಯೇಷನ್ ರಾಜ್ಯಾಧ್ಯಕ್ಷ ಡಿ.ಸಿದ್ದರಾಜು, ಪ್ರಧಾನ ಕಾರ್ಯದರ್ಶಿ ಡಿ.ಆರ್.ಮಹೇಶ್, ಶಿವಮೊಗ್ಗ ಮಂಜಣ್ಣ, ವಿಜಯರ್ಶಮರ ಅಸೋಸಿಯೇಷನ್ ನಿರ್ದೇಶಕರುಗಳಾದ ವೆಂಕಟೇಶ್, ಮಲ್ಲಿಕಾರ್ಜುನ್, ಜಿ.ಬಿ.ಶೇಖರ್, ಸಂದೀಪ್, ಅಭಿಷೇಕ್ ಇದ್ದರು.