ಶಾಶ್ವತ ಕೆಲಸದಿಂದ ಮಾತ್ರ ಹೆಸರು ಮಾಡಲು ಸಾಧ್ಯ; ಕೊತ್ತೂರು ಮಂಜುನಾಥ್

ಕನ್ನಡಪ್ರಭ ವಾರ್ತೆ ಕೋಲಾರ

ನಗರದ ಪತ್ರಕರ್ತರ ಭವನದಲ್ಲಿ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದಿಂದ ತಾಲೂಕು ಪದಾಧಿಕಾರಿಗಳಿಗೆ ಪ್ರಮಾಣಪತ್ರ ವಿತರಣೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ನಾನು ರಾಜಕಾರಣದಲ್ಲಿ ಬೆಳೆಯಲು ಕಾರಣ ಪತ್ರಕರ್ತರು. ಪತ್ರಕರ್ತರು ಜನರಲ್ಲಿ ತಿಳಿವಳಿಕೆ ಮೂಡಿಸುವವರು. ಯಾರೇ ಆದರೂ ಶಾಶ್ವತವಾಗಿ ಉಳಿಯುವ ಕೆಲಸ ಮಾಡಬೇಕು. ಹಾಗಲಕಾಯಿ ಕಹಿ, ಆದರೆ ಆರೋಗ್ಯಕ್ಕೆ ಒಳ್ಳೆಯದು. ಕೆಲವರ ಮಾತು ಕಹಿ ಇರಬಹುದು. ಆ ಮಾತುಗಳ ಹಿಂದೆ ಒಳ್ಳೆಯ ಉದ್ದೇಶ ಇರುತ್ತದೆ ಎಂದು ಹೇಳಿದರು.

ಈ ಬಾರಿ ರಾಜ್ಯ ವ್ಯಾಪಿ ಚುನಾವಣೆಯಿಂದ ಒಟ್ಟು ೫೪ ಲಕ್ಷ ಠೇವಣಿ ಬಂದಿದೆ. ಸಂಘದ ಚಟುವಟಿಕೆಗಳ ಬಗ್ಗೆ ಆಸಕ್ತಿ, ಉತ್ಸಾಹ ಇರುವುದು ಇದರಿಂದ ಗೊತ್ತಾಗುತ್ತದೆ. ಸಂಘ ಯಾವತ್ತೂ ನೈತಿಕತೆ ಬಿಟ್ಟುಕೊಟ್ಟಿಲ್ಲ. ಸಂಘ ಕಟ್ಟುವುದರ ಜೊತೆಜೊತೆಗೆ ಮನಸ್ಸು ಕಟ್ಟಬೇಕು ಎಂದು ಸಲಹೆ ನೀಡಿದರು.

ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘದ ಅಧ್ಯಕ್ಷ ಎಸ್.ಕೆ.ಚಂದ್ರಶೇಖರ್ ಮಾತನಾಡಿ, ಪತ್ರಕರ್ತರಿಗೆ ನಾನು ಎಂಬ ಅಹಂ ಇರಬಾರದು. ದುರಂಹಕಾರ ತೋರಿಸಬೇಡಿ. ಇದು ಈ ಕಾರ್ಯಕ್ರಮಕ್ಕೆ ಬಾರದ ಪದಾಧಿಕಾರಿಗಳಿಗೆ ಎಚ್ಚರಿಕೆ ಕೂಡ ಎಂದರು.

ಜಿಲ್ಲಾ ಚುನಾವಣಾಧಿಕಾರಿ ಪಾ.ಶ್ರೀ.ಅನಂತರಾಮು ಮಾತನಾಡಿ, ಅನ್ಯಾಯದ ಪರ ಮಾತನಾಡಬೇಕು, ನ್ಯಾಯದ ಪರ ನಿಲ್ಲಬೇಕು. ಗುಂಪು ಇರಬೇಕು, ಆದರೆ ಗುಂಪುಗಾರಿಕೆ ಇರಬಾರದು. ತಂತ್ರ ಇರಬೇಕು, ಕುತಂತ್ರ ಇರಬಾರದು. ಜಾತಿ ಆಧಾರದ ಮೇಲೆ ಸಂಘ ಕಟ್ಟಬಾರದು. ಪ್ರಾಮಾಣಿಕವಾಗಿ ಜವಾಬ್ದಾರಿ ನಿಭಾಯಿಸಿ, ತಪ್ಪು ಮಾಡಿದರೆ ಪ್ರಶ್ನೆ ಮಾಡಿ, ಒಳ್ಳೆಯದನ್ನು ಶ್ಲಾಘಿಸಿ ಎಂದರು.

ರಾಜ್ಯ ಕಾರ್ಯಕಾರಿಣಿ ಸದಸ್ಯ ವಿ.ಮುನಿರಾಜು ಮಾತನಾಡಿ, ಸಂಘಕ್ಕೆ ಹಿಂದೆ ಹಲವು ಬಾರಿ ಚುನಾವಣೆ ನಡೆದಿರಲಿಲ್ಲ. ಆದರೆ, ಈ ಬಾರಿ ಆಕಸ್ಮಿಕವಾಗಿ ಚುನಾವಣೆ ನಡೆದಿದೆ. ಕೇವಲ ಇಬ್ಬರು ಮೂವರಿಂದ ೨೬೦ ಮಂದಿಗೆ ತೊಂದರೆ ಆಗಬಾರದು. ಹೊರಗಡೆ ಇರುವ ಪದಾಧಿಕಾರಿಗಳು ಇನ್ನು ಮುಂದೆಯಾದರೂ ಒಗ್ಗಟ್ಟಿನಿಂದ ಇರಿ. ಇಲ್ಲದಿದ್ದರೆ ಸಮಾಜಕ್ಕೆ ಏನು ಸಂದೇಶ ನೀಡುವಿರಿ ಎಂದು ಪ್ರಶ್ನಿಸಿದರು.

ಸಂಘದ ಮಾಜಿ ಅಧ್ಯಕ್ಷ ಬಿ.ವಿ.ಗೋಪಿನಾಥ್, ಕಾರ್ಯನಿರತ ಪತ್ರಕರ್ತರ ಸಂಘದ ಖಜಾಂಚಿ ವಾಸುದೇವ ಹೊಳ್ಳ ಮಾತನಾಡಿದರು.