ದಲಾಲರ ಮೂಲಕ ರೈತರಿಗೆ ಹಣ ಸಂದಾಯ- ನಾಶಿಪುಡಿ ಪುತ್ರನ ಭರವಸೆ

ವರ್ತಕರ ಸಂಘದ ಅಧ್ಯಕ್ಷ ಸುರೇಶಗೌಡ ಪಾಟೀಲ ಹೇಳಿಕೆ, ನಾಶಿಪುಡಿ ಬಂಧನ-ಬ್ಯಾಡಗಿಯಲ್ಲಿ ವರ್ತಕರ ಸಭೆ

‘ಪಾಕಿಸ್ತಾನ’ ಪರ ಘೋಷಣೆ ಪ್ರಕರಣ ನ್ಯಾಯಾಲಯದಲ್ಲಿ ಇರುವುದರಿಂದ ವರ್ತಕರ ಸಂಘವು ಮೆಣಸಿನಕಾಯಿ ವ್ಯಾಪಾರಿ ಮಹ್ಮದ್‌ ಶಫಿ ನಾಶಿಪುಡಿ ವಿರುದ್ಧ ಸದ್ಯ ಯಾವುದೇ ಕ್ರಮ ಕೈಗೊಳ್ಳಲು ಸಾಧ್ಯವಿಲ್ಲ ಎಂದು ವರ್ತಕರ ಸಂಘದ ಅಧ್ಯಕ್ಷ ಹಾಗೂ ಮಾಜಿ ಶಾಸಕ ಸುರೇಶಗೌಡ ಪಾಟೀಲ ಹೇಳಿದ್ದು, ಇದೇ ಸಂದರ್ಭದಲ್ಲಿ ಮಾರುಕಟ್ಟೆ ದಲಾಲರಿಗೆ ನೀಡಬೇಕಾದ ಎಲ್ಲ ಹಣವನ್ನು ಕೆಲವೇ ದಿನದಲ್ಲಿ ತಲುಪಿಸುತ್ತೇನೆ ನನಗೆ ಸಹಕಾರ ನೀಡಿ ಎಂದು ಮಹ್ಮದ್‌ ಶಫಿ ಪುತ್ರ ಜುಬೇರ್‌ ನಾಶಿಪುಡಿ ಸಂಘದ ಬಳಿ ಮನವಿ ಮಾಡಿಕೊಂಡಿದ್ದಾರೆ.

ಅಧ್ಯಕ್ಷ ಸುರೇಶಗೌಡ ಪಾಟೀಲ ಮಾತನಾಡಿ, ಅಷ್ಟಕ್ಕೂ ಮಹ್ಮದ್‌ ಶಫಿ ನಾಶಿಪುಡಿ ಕುಟುಂಬಸ್ಥರ ಹಾಗೂ ಅವರ ಜತೆ ವ್ಯವಹರಿಸುತ್ತಿರುವವರು ನೀಡಿದ ಭರವಸೆ ಮೇರೆಗೆ ದಲಾಲರ ಮೂಲಕ ರೈತರಿಗೆ ಸಂದಾಯ ಆಗಬೇಕಾಗಿರುವ ಹಣ ತಲುಪಿಸುವುದಾಗಿಯೂ ಹೇಳಿದರು.

ನಾಶಿಪುಡಿ ಪುತ್ರ ಜುಬೇರ್‌ ನಾಶಿಪುಡಿ ಎಲ್ಲ ಹಣವನ್ನೂ ಸಂಪೂರ್ಣವಾಗಿ ನೀಡುತ್ತೇನೆ. ಕೆಲ ದಿನ ಸಮಯ ನೀಡಿ, ಸಹಕಾರ ನೀಡಿ ಎಂದು ಸಭೆಯಲ್ಲಿ ಕೋರಿಕೊಂಡರು. ಅದಕ್ಕೆ ಸಭೆಯಲ್ಲಿ ಸಹಮತ ವ್ಯಕ್ತವಾಯಿತು.

ಉಪಾಧ್ಯಕ್ಷ ಎ.ಆರ್. ನದಾಫ್ ಮಾತನಾಡಿ, ಪಡೆದಂತಹ ಮೆಣಸಿನಕಾಯಿ ಹಣ ನೀಡುವುದು ವ್ಯಾಪಾರಿ ಧರ್ಮ. ಒಬ್ಬರು ಮಾಡಿದ ತಪ್ಪಿಗೆ ಸಾವಿರಾರು ಸಂಖ್ಯೆಯ ದಲಾಲರು ಹಾಗೂ ರೈತರು ಸಂಕಷ್ಟ ಎದುರಿಸಬೇಕಾಗುತ್ತದೆ. ನಾಶಿಪುಡಿ ಕುಟುಂಬ ವ್ಯವಹಾರಿಕವಾಗಿ ಸರಿಯಾಗಿದ್ದು, ಕುಟುಂಬದ ಸದಸ್ಯರ ಜತೆ ಮಾತನಾಡಿದ್ದೇವೆ. ಈ ನಿಟ್ಟಿನಲ್ಲಿ ಅವರಿಂದ ದಲಾಲರಿಗೆ ಬರಬೇಕಾದ ಹಣ ಪಡೆದ ಬಳಿಕ ಮುಂದಿನ ನಿರ್ಧಾರ ಮಾಡೋಣ ಎಂದರು.