ಧಾರ್ಮಿಕ, ಸಾಮಾಜಿಕ ಕಾರ್ಯಗಳಿಂದ ಮನಸ್ಸಿಗೆ ನೆಮ್ಮದಿ

ಕೊಟ್ಟೂರು: ದೇಶ ಎಷ್ಟೇ ಮುಂದುವರೆದಿದ್ದರೂ ಇಂದಿಗೂ ದೇವರು, ಭಕ್ತಿ, ದಾನ ಧರ್ಮ ಮುಂದುವರೆದಿವೆ, ಜನತೆಗೆ ಧಾರ್ಮಿಕ, ಸಾಮಾಜಿಕ ಕಾರ್ಯಗಳಿಂದ ಮನಸ್ಸಿಗೆ ನೆಮ್ಮದಿ ಸಿಗುತ್ತದೆ ವಿನಾಃ ಯಾವುದೇ ಐಷರಾಮಿ ಜೀವನದಿಂದ ಬದುಕಿನಲ್ಲಿ ನೆಮ್ಮದಿ ದೊರೆಯಲು ಸಾಧ್ಯವಿಲ್ಲ ಎಂದು ಕೊಟ್ಟೂರಿನ ಭೂತಬುಜಂಗ ಹಿರೇಮಠದ ಶ್ರೀಯೋಗಿರಾಜೇಂದ್ರ ಶಿವಾಚಾರ್ಯರು ಅಭಿಪ್ರಾಯ ವ್ಯಕ್ತಪಡಿಸಿದರು.

ಬಿಕ್ಕಿಮರಡಿ ದುರುಗಮ್ಮ ದೇವಸ್ಥಾನಕ್ಕೆ ಬರೀ ಧಾರ್ಮಿಕ ಹಿನ್ನೆಲೆ ಮಾತ್ರವಿಲ್ಲ, ಬದಲಾಗಿ ಜರ್ಮಲಿ ಪಾಳೇಗಾರರ ದಂಡಿನಲ್ಲಿ ಬಂದ ದುರುಗಮ್ಮ ಎನ್ನುವ ಐತಿಹಾಸಿಕ ಹಿನ್ನೆಲೆ ಇರುವುದರಿಂದ ಈ ದೇವಿಯ ಚರಿತ್ರೆ ರೋಚಕವಾಗಿದೆ ಎಂದರು.

ಭೀಮಣ್ಣ ಗಜಾಪುರ ಈಗಾಗಲೇ ಸಾವಿರಕ್ಕೂ ಹೆಚ್ಚು ಭಕ್ತಿಗೀತೆ ರಚನೆ,ರಾಗ ಸಂಯೋಜನೆ ಮಾಡಿದ್ದು ಇವರ ಸಾಹಿತ್ಯಕ್ಕೆ ಎಸ್.ಪಿ. ಬಾಲಸುಬ್ರಮಣ್ಯಂ, ಬಿ.ಆರ್. ಛಾಯಾ, ಮಂಜುಳಾ ಗುರುರಾಜ್, ರಾಜೇಶ್ ಕೃಷ್ಣನ್, ಹೇಮಂತ್, ಅನುರಾಧ ಭಟ್, ನಂದಿತಾ, ರತ್ನಮಾಲಾ ಪ್ರಕಾಶ್, ಜೋಗಿ ಸುನೀತಾರಂತಹ ಮೇರು ಗಾಯಕರು ಹಾಡಿರುವುದು ಹೆಮ್ಮೆಯ ಸಂಗತಿಯಾಗಿದೆ, ಯಾವುದೇ ಸಂಗೀತ, ಸಾಹಿತ್ಯದ ಹಿನ್ನೆಲೆ ಇಲ್ಲದ ಕುಟುಂಬದಿಂದ ಭೀಮಣ್ಣ ಗಜಾಪುರ ಮತ್ತಷ್ಟು ಧಾರ್ಮಿಕ ಕಾರ್ಯಗಳು ಮಾಡಲಿ ಎಂದು ಹಾರೈಸಿದರು.

ಕೊಟ್ಟೂರಿನ ದೈವಸ್ಥರಾದ ಬಿ.ಮಲ್ಲಿಕಾರ್ಜುನ ಪ್ರಾಸ್ತವಿಕವಾಗಿ ಮಾತನಾಡಿ, ಬಿಕ್ಕಿಮರಡಿ ದುರುಗಮ್ಮ ದೇವಿಗೆ ಇದೇ ಮೊದಲ ಬಾರಿಗೆ 10 ಭಕ್ತಿಗೀತೆ ರಚನೆಯಾಗಿ ಧ್ವನಿಸುರುಳಿಯಾಗಿ ಬಿಡುಗಡೆಯಾಗಿದ್ದು ನಮ್ಮ ದೈವಸ್ಥರಿಗೆ ಸಂತಸ ತಂದಿದೆ, ಮುಂದಿನ ದಿನಗಳಲ್ಲಿ ಬಿಕ್ಕಿಮರಡಿ ದುರುಗಮ್ಮಳ ಇತಿಹಾಸ ಲೀಲೆಗಳ ಕುರಿತು ಸುಪ್ರಭಾತ ತರುವ ಯೋಜನೆ ಇದೆ ಎಂದರು.