ಅಪ್ಪಾಜಿ ಕಳೆದುಕೊಂಡು ಕಣ್ಣೀರು ಹಾಕಿದ ಕಲಬುರಗಿ ಜನ

ಶೇಷಮೂರ್ತಿ ಅವಧಾನಿ

ಮಹಾ ದಾಸೋಹ ಮನೆಯ 8ನೇ ಪೀಠಾಧಿಪತಿಗಳಾಗಿ 91ವರ್ಷ ಜನಮಾನಸದಲ್ಲಿದ್ದಂತಹ ಡಾ. ಶರಣಬಸವಪ್ಪ ಅಪ್ಪಾಜಿ ನಿಧನದಿಂದಾಗಿ ಕಲಬುರಗಿ ಸೇರಿದಂತೆ ಸುತ್ತೆಲ್ಲಾ ಭಕ್ತ ಜನಕ್ಕೆ ಹಾಗೂ ಅವರ ಅಭಿಮಾನಿಗಳಿಗೆ ಅನಾಥ ಪ್ರಜ್ಞೆ ಕಾಡಲಾರಂಭಿಸಿದೆ.

ಅಚ್ಚುಮೆಚ್ಚಿನ ಅಪ್ಪಾಜಿ ಗಿದ್ರು: ಮಕ್ಕಳ ಶಾಲೆ, ಶುಲ್ಕ, ಸಂಸಾರ ಬಂಡಿ ನಡೆಸುವ ಸಮಸ್ಯೆ ಸೇರಿದಂತೆ ಅದ್ಯಾವುದೇ, ಏನೇ ಸಮಸ್ಯೆಗಳನ್ನು ಹೊತ್ತು ತಮ್ಮ ಬಳಿ ಬರುವವರಿಗೆ ಡಾ. ಅಪ್ಪಾಜಿ ನಸು ನಗುತ್ತಲೇ ಅದಕ್ಕೊದು ಪರಿಹಾರ ಕೊಡುವವರಾಗಿದ್ದರು,

ಅಲ್ಪಕಾಲದ ಅನಾರೋಗ್ಯದ ನಂತರ ಗುರುವಾರ ಕಲಬುರಗಿ ನಗರದ ತಮ್ಮ ಮಹಾ ದಾಸೋಹ ಮನೆಯಲ್ಲಿ ಶಿವಾಧೀನರಾದ ತತ್ವಜ್ಞಾನಿ ಮತ್ತು ದಾರ್ಶನಿಕ ಶಿಕ್ಷಣ ತಜ್ಞ ಪೂಜ್ಯ ಡಾ. ಶರಣಬಸವಪ್ಪ ಅಪ್ಪಾಜಿ ಅವರ ಕೊನೆಯ ಪಯಣದಲ್ಲಿ ಸಾವಿರಾರು ಭಕ್ತರನ್ನು ಅಗಲಿದ ಸಂತರಿಗೆ ಗೌರವ ಸಲ್ಲಿಸಿದರು.

ಅವರು ಕಲಬುರಗಿ ಪ್ರದೇಶದ ಜನರಿಗೆ ತಂದೆಯಂತಹ ವ್ಯಕ್ತಿಯಾಗಿದ್ದರು, ಶೈಕ್ಷಣಿಕವಾಗಿ ಹಿಂದುಳಿದ ಈ ಪ್ರದೇಶವನ್ನು ಹಾಗೂ ಈ ಪ್ರದೇಶದ ಶಿಕ್ಷಣ ವಂಚಿತರಿಗೆ ಹೊಸ ಶೈಕ್ಷಣಿಕ ಅವಕಾಶಗಳನ್ನು ತೆರೆಯಲು ತಮ್ಮ ಇಡೀ ಜೀವನವನ್ನು ಮುಡಿಪಾಗಿಡುವ ಮೂಲಕ ಪ್ರಮುಖ ಶೈಕ್ಷಣಿಕ ಕೇಂದ್ರವಾಗಿ ಪರಿವರ್ತಿಸುವಲ್ಲಿ ಸದಾಕಾಲ ದಾಪುಗಾಲು ಹಾಕುತ್ತಲೇ ಸಾಧನೆ ಮಾಡಿದವರು.

ಗ್ರಾಮೀಣಾಭಿವೃದ್ಧಿ ಸಚಿವ ಪ್ರಿಯಾಂಕ್ ಖರ್ಗೆ, ಶಾಸಕ ಶ್ರೀ ಅಲ್ಲಮಪ್ರಭು ಪಾಟೀಲ್, ಡೆಪ್ಯೂಟಿ ಕಮಿಷನರ್ ಫೌಜಿಯಾ ತರನ್ನುಮ್, ಪೊಲೀಸ್ ಆಯುಕ್ತ ಡಾ. ಶರಣಪ್ಪ ಎಸ್ ಡಿ, ರಾಜಕಾರಣಿಗಳು, ಉನ್ನತ ಅಧಿಕಾರಿಗಳು ದಾಸೋಹ ಮಹಾಮನೆಗೆ ಭೇಟಿ ನೀಡಿ ಡಾ. ಅಪ್ಪಾಜಿಯವರ ಪಾರ್ಥಿವ ಶರೀರಕ್ಕೆ ಅಂತಿಮ ನಮನ ಸಲ್ಲಿಸಿದರು.

ಧಾರ್ಮಿಕ ಆಚರಣೆ ನೆರವೇರಿಸಿದ ಮಠಾಧೀಶರು

ಅಪ್ಪಾಜಿಯವರ ಪಾರ್ಥೀವ ಶರೀರದ ದರ್ಶನ ಪಡೆಯಲು ಇಂದು ಮುಂಜಾನೆಯಿಂದಲೇ ಅನೇಕ ಭಕ್ತರು ವಿಶೇಷವಾಗಿ ಮಹಿಳೆಯರು ದೇಗುಲದ ಆವರಣದಲ್ಲಿ ಜಮಾಯಿಸಿದ್ದರು.