ವಿದ್ಯುತ್‌ ಇಲ್ಲದೇ ಒಂದೂವರೆ ತಿಂಗಳಿನಿಂದ ಕುಡಿಯಲು ನೀರಿಲ್ಲ

ಕನ್ನಡಪ್ರಭ ವಾರ್ತೆ ಬೇಲೂರು

ಇಲ್ಲಿನ ಲೈನ್‌ಮ್ಯಾನ್ ಹಣ ನೀಡಿದರೆ ಮಾತ್ರ ಕಂಬ ಹತ್ತುವೆ ಎಂದು ಉಡಾಫೆಯಿಂದ ವರ್ತಿಸುತ್ತಿದ್ದು, ಅವರನ್ನು ಅಮಾನತು ಮಾಡಬೇಕು ಎಂದು ದೊಡ್ಡಿಹಳ್ಳಿ ಗ್ರಾಮಸ್ಥರು ಪ್ರತಿಭಟನೆ ನಡೆಸಿ ತಮ್ಮ ಆಕ್ರೋಶವನ್ನು ವ್ಯಕ್ತಪಡಿಸಿದರು.

ದೊಡ್ಡಿಹಳ್ಳಿ ಗ್ರಾಮಕ್ಕೆ ಬರುವ ಲೈನ್‌ಮ್ಯಾನ್ ಜಗದೀಶ್ ಕಳೆದ ೧೫ ವರ್ಷದಿಂದ ಇಲ್ಲಿಯೇ ಠಿಕಾಣಿ ಹಾಕಿಕೊಂಡು ಜನರ ಸಮಸ್ಯೆಗಳಿಗೆ ಸ್ಪಂದಿಸುತ್ತಿಲ್ಲ. ರಾಜಾರೋಷವಾಗಿಯೇ ಜನರ ಬಳಿ ಹಣ (ಲಂಚ) ಕೇಳುತ್ತಾರೆ ಮತ್ತು ಉಡಾಫೆಯಿಂದ ವರ್ತಿಸುತ್ತಾರೆ. ದೊಡ್ಡಿಹಳ್ಳಿ ಗ್ರಾಮಸ್ಥರು ಕೂಡ ಕೇಳಿದ ಸಂದರ್ಭದಲ್ಲಿ ಹಣ ನೀಡಿದರೆ ಮಾತ್ರ ಕಂಬ ಹತ್ತುವೆ. ಇಲ್ಲವಾದರೆ ನಿಮ್ಮ ಅಪ್ಪಂದಿರು ಕೊಡುತ್ತಾರಾ? ಹಣ ಎಂದು ಬೈಯುತ್ತಾರೆ.

ಗ್ರಾಮಸ್ಥರೆಲ್ಲಾ ಒಟ್ಟುಗೂಡಿಸಿ ೫೦೦ ರು.ಗಳನ್ನು ನೀಡಿದರೆ, ಸಾಕಾಗುವುದಿಲ್ಲಾ ನನಗೆ ೨೦೦೦ ಸಾವಿರ ಬೇಕು, ಎಲ್ಲಾ ಹಿರಿಯ ಅಧಿಕಾರಿಗಳಿಗೂ ನಾನು ಕೊಡಬೇಕು ಎಂದು ರಾಜಾರೋಷವಾಗಿ ಹಣದ ಬೇಡಿಕೆ ಇಡುತ್ತಾ ರೈತರಿಗೆ ತೊಂದರೆ ನೀಡುತ್ತಿರುವ ಲೈನ್‌ಮ್ಯಾನ್ ಜಗದೀಶ್ ಅವರನ್ನು ತಕ್ಷಣವೇ ಕೆಲಸದಿಂದ ಅಮಾನತುಪಡಿಸಬೇಕು. ಇಲ್ಲವೇ ಈ ವೃತ್ತದಿಂದ ವರ್ಗಾವಣೆಗೊಳಿಸಬೇಕು ಎಂದರು.

ಪ್ರತಿಭಟನೆಯಲ್ಲಿ ದೊಡ್ಡಿಹಳ್ಳಿ ಗ್ರಾಮಸ್ಥರಾದ ಅನಿಲ್‌ ಕುಮಾರ್, ಲೋಕೇಶ್, ಹರ್ಷ, ಅಜಿತ್, ತಿರ್ಥಮಲ್ಲಯ್ಯ, ಶಿವಕುಮಾರ್, ದಿವಾಕರ್, ಹಾಲಪ್ಪ ಸೇರಿದಂತೆ ಇನ್ನು ಮುಂತಾದವರು ಹಾಜರಿದ್ದರು.