ಪೊಲೀಸ್ ಠಾಣೆಗೆ ಅತಿಕ್ರಮಣದಾರರ ಮುತ್ತಿಗೆ: ಅಧಿಕಾರಿಗಳ ತರಾಟೆ

ಹೊನ್ನಾವರ: ಅರಣ್ಯವಾಸಿಗಳ ಸಮಸ್ಯೆಗಳ ಸ್ಪಂದನೆ ಕುರಿತು ಹೊನ್ನಾವರದಲ್ಲಿ ಸಂಘಟಿಸಿದ ಜಿಲ್ಲಾ ಮಟ್ಟದ ಅರಣ್ಯವಾಸಿಗಳ ಸ್ಫಂದನಾ ಕಾರ್ಯಕ್ರಮದಲ್ಲಿ ನೂರಾರು ಸಂಖ್ಯೆಯಲ್ಲಿ ಅರಣ್ಯವಾಸಿಗಳು ತಮ್ಮ ಬೇಡಿಕೆ ಈಡೇರಿಕೆಗಾಗಿ ಆಗ್ರಹಿಸಿದರು.

ತಾಲೂಕಿನ ಚಿಕ್ಕನಕೋಡ ಗ್ರಾಪಂ ವ್ಯಾಪ್ತಿಯ ಕೆಂಚಗಾರದಲ್ಲಿನ ಅರಣ್ಯ ಅತಿಕ್ರಮಣ ತೆರವು ವಿಚಾರವಾಗಿ ಆರ್‌ಎಫ್‌ಒ ಮೇಲೆ ಪ್ರಕರಣ ದಾಖಲಾಗದಿರುವ ಕುರಿತು ಪಿಐ ವಸಂತ ಆಚಾರಿಯವರೊಂದಿಗೆ ಚರ್ಚಿಸಿ ಅಸಮಾಧಾನ ಹೊರಹಾಕಿದರು. ಕೆಲಕಾಲ ಚರ್ಚೆ ನಂತರ ಸಮರ್ಪಕ ಉತ್ತರ ಸಿಗದ ಕಾರಣ ನಂತರ ಅಲ್ಲಿಂದ ತೆರಳಿ ತಹಸೀಲ್ದಾರ್‌ ಕಾರ್ಯಾಲಯಕ್ಕೆ ಮುತ್ತಿಗೆ ಹಾಕಿದರು.

ಈ ಎಲ್ಲ ಬೆಳವಣಿಗೆ ಕುರಿತಂತೆ ಮೇಲಾಧಿಕಾರಿಗಳೊಂದಿಗೆ ಚರ್ಚಿಸುತ್ತೇವೆ ಎಂದರು. ಇದಕ್ಕೆ ಅರಣ್ಯವಾಸಿಗಳು ಗರಂ ಆಗಿ, ಈಗಲೇ ಮೇಲಧಿಕಾರಿ ಕರೆಯಿಸಿ ಮಾತನಾಡಿ ಎಂದು ಆಕ್ರೋಶ ವ್ಯಕ್ತಪಡಿಸಿದರು. ಕೆಲಕಾಲ ಗದ್ದಲ ಮುಂದುವರೆಯಿತು. ಕೊನೆಯಲ್ಲಿ ಡಿವೈಎಸ್‌ಪಿ ಗಣೇಶ್ ಕೆ.ಆರ್. ಭೇಟಿ ನೀಡಿ, ಈಗಾಗಲೇ ಅರಣ್ಯ ಇಲಾಖೆಯ ಮೇಲಧಿಕಾರಿಗಳೊಂದಿಗೆ ದೂರವಾಣಿ ಮೂಲಕ ಮಾತನಾಡಲಾಗಿದೆ.‌ ಈ ಕುರಿತು ದಿನಾಂಕ ನಿಗದಿ ಪಡಿಸಿ ಸಂಘಟನೆಯ ಮುಖ್ಯಸ್ಥರಿಗೆ ತಿಳಿಸುತ್ತಾರೆ ಎಂದರು.

ನಂತರ ಮಾಧ್ಯಮದವರೊಂದಿಗೆ ರವೀಂದ್ರ ನಾಯ್ಕ ಮಾತನಾಡಿ, ಭೂಕಬಳಿಕೆ ಕಾಯ್ದೆ ಅಡಿ ಬೆಂಗಳೂರಿನ ವಿಶೇಷ ನ್ಯಾಯಾಲಯದಲ್ಲಿ ದೂರು ದಾಖಲಿಸುವ ಪ್ರಕ್ರಿಯೆ ನಡೆಯುತ್ತಿದೆ. ಹತ್ತು ಸಾವಿರಕ್ಕೂ ಹೆಚ್ಚು ಪ್ರಕರಣ ದಾಖಲಾಗಿರುವ ಮಾಹಿತಿ ಇದೆ. ಸ್ಪಷ್ಟ ಅಂಕಿ-ಸಂಖ್ಯೆ ನೀಡಿ ಎಂದು ಪಟ್ಟು ಹಿಡಿಯಲಾಗಿದೆ. ಈ ಎಲ್ಲ ವಿಚಾರ ಮುಂದಿನ ಸಭೆಯಲ್ಲಿ ಅಧಿಕಾರಿಗಳು ಚರ್ಚಿಸುವ ಭರವಸೆ ನೀಡಿದ ಹಿನ್ನೆಲೆ ಇಂದಿನ ಹೋರಾಟ ಮೊಟಕುಗೊಳಿಸಲಾಗಿದೆ. ಹೊಸ ಅತಿಕ್ರಮಣಕ್ಕೆ ನಾವು ಬೆಂಬಲಿಸುವುದಿಲ್ಲ. ಕೆಂಚಗಾರ ಪ್ರಕರಣದಲ್ಲಿ ನಮ್ಮ ಸತ್ಯಶೋಧನಾ ಸಮಿತಿ ಪರಿಶೀಲಿಸಿದಾಗ ಅರಣ್ಯ ಅಧಿಕಾರಿಗಳು ಎಂಟು ವರ್ಷ ಹಳೆಯದಾದ ತೆಂಗಿನಮರ ನಾಶಪಡಿಸಿದ್ದಾರೆ ಎನ್ನುವುದು ಕಂಡುಬಂದಿದೆ. ಹಾಗಾದರೆ ಎಂಟು ವರ್ಷ ಅರಣ್ಯ ಅಧಿಕಾರಿಗಳು ಏನು ಮಾಡುತ್ತಿದ್ದರು ಎಂದು ಆಕ್ರೋಶ ವ್ಯಕ್ತಪಡಿಸಿದರು.