ಕನ್ನಡಿಗರ ಹಿತ ಬಯಸಲು ರಾಜಕಾರಣಿಗಳು ಕಟಿಬದ್ಧರಲ್ಲ: ಡಾ.ಕೆ.ಆರ್.ದುರ್ಗಾದಾಸ್

ಕನ್ನಡಪ್ರಭ ವಾರ್ತೆ ತೀರ್ಥಹಳ್ಳಿ

ಪಟ್ಟಣದ ಬಂಟರ ಭವನದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತಿನ ಸಹಯೋಗದೊಂದಿಗೆ ನಡೆದ ಸಮಾರಂಭದಲ್ಲಿ ಪ್ರಾಧ್ಯಾಪಕ ಹಾಗೂ ಸಾಹಿತಿ ಡಾ.ಸರ್ಜಾಶಂಕರ್ ಹರಳೀಮಠ ರಚಿಸಿರುವ ಕನ್ನಡತನ ಕನ್ನಡ ಅಸ್ಮಿತೆ ಶತಮಾನದ ಚಿಂತನೆಗಳು ಕೃತಿ ಬಿಡುಗಡೆಗೊಳಿಸಿ, ಅಧಿಕಾರದ ಮುಖೇನ ವ್ಯಾಪಾರ ನಡೆಸುತ್ತಿರುವ ರಾಜಕಾರಣಿಗಳು ಕನ್ನಡ ಭಾಷೆ ಸೇರಿದಂತೆ ಕನ್ನಡಿಗರ ಹಿತ ಬಯಸಲು ಕಟಿಬದ್ಧರಾಗಿಲ್ಲ. ಕನ್ನಡ ಭಾಷೆಗೆ ಸಂಬಂಧಿಸಿದ ಡಾ.ಸರ್ಜಾಶಂಕರ್‍ರವರ ಅಪರೂಪದ ಈ ಮಹಾಪ್ರಬಂಧ ಯುವ ಸಂಶೋದಕರ ಬಗೆಗೆ ನಿರೀಕ್ಷೆ ಮೂಡಿಸುವಂತಿದೆ ಎಂದರು.

ಪುಸ್ತಕದ ಕುರಿತು ಮಾತನಾಡಿದ ಹಿರಿಯ ಸಾಹಿತಿ ಡಾ.ಜೆ.ಕೆ.ರಮೇಶ್, ಈ ಕೃತಿಯ ವಸ್ತುವೇ ವೈಚಾರಿಕವಾಗಿದ್ದು ಅಮೂರ್ತವಾದ ವಿಷಯವನ್ನು ಯಾವುದೇ ಭಾವಾತಿರೇಕಕ್ಕೆ ಒಳಗಾಗದೇ ಲೇಖಕರು ಸಮಚಿತ್ತದಿಂದ ಬರೆದಿದ್ದಾರೆ. ಕೃತಿ ಪ್ರವೇಶವೇ ಅರ್ಥಪೂರ್ಣವಾಗಿದ್ದು ಕನ್ನಡದ ಅಸ್ಮಿತೆ ಯಾರ ಪ್ರಭಾವಕ್ಕೂ ಒಳಗಾಗಬಾರದು ಎಂಬುದು ಲೇಖಕರ ಕಳಕಳಿಯಾಗಿದೆ. ಕೃತಿಯೊಂದಿಗಿನ ಅನುಸಂಧಾನ ಕಷ್ಟವಾಗಿ ಕಾಣಬಹುದಾಗಿದ್ದರೂ ಇದರ ಆಶಯಗಳು ಚಿಂತನೆ ಮೂಡಿಸುವಂತಿದೆ ಎಂದರು.