ಕಲಾಲೋಕಕ್ಕೂ ಅಂಟಿದ ಮಾಲಿನ್ಯ

ಕೊಪ್ಪಳ: ಒಂದು ಕಾಲಕ್ಕೆ ಗೋಡೆಗಳ ಮೇಲೆ ವಿಜಯನಗರದ ಉಕ್ಕು ನಮ್ಮ ಹಕ್ಕು ಎನ್ನುವ ಘೋಷಣೆ ಕೇಳುತ್ತಿದ್ದೇವು. ಮೂರು ದಶಕಗಳಲ್ಲಿ ಎಂತಹ ನಾಟಕೀಯ ಬದಲಾವಣೆಗಳಾಗಿವೆ.ಯಾವ ಕಾರ್ಖಾನೆಗಳು ದೇವರಂತೆ ಬಂದು ನಮ್ಮನ್ನು ಉದ್ದರಿಸಬೇಕು ಎಂದು ಯೋಚಿಸಿದ್ದೆವೋ ಅವು ಈಗ ಶಾಪಗ್ರಸ್ತವಾಗಿವೆ. ಮಕ್ಕಳಿಗೆ ಸಿಗುತ್ತಿರುವುದು ಧೂಳು ಮಲೀನ. ಸರ್ಕಾರವನ್ನು ಜಗತ್ತನ್ನು ಆಳುತ್ತಿರುವುದು ಕಾರ್ಪೋರೇಟ್ ಎಂದು ಹಿರಿಯ ಸಂಶೋಧಕ ಡಾ.ರಹಮತ್ ತರಿಕೆರಿ ಹೇಳಿದರು. ನಗರದ ಗಾಣಿಗೇರ ಭವನದಲ್ಲಿ ತಿರುಳನ್ನಡ ಸಾಹಿತಿಗಳ ಸಹಕಾರ ಸಂಘ ನಿ ಕೊಪ್ಪಳ, ಗಾಣದ ಕಣ್ಣಪ್ಪ ಪತ್ತಿನ ಸಹಕಾರ ಸಂಘ ನಿ ಕೊಪ್ಪಳ, ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಕೊಪ್ಪಳ ಸಂಯುಕ್ತಾಶ್ರಯದಲ್ಲಿ ನಡೆದ ಪ್ರೊ. ಕೋರಗಲ್ ವಿರೂಪಾಕ್ಷಪ್ಪನವರ ಎರಡು ಪುಸ್ತಕಗಳ ಬಿಡುಗಡೆ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದರು.

ಮಾಲಿನ್ಯ ಇದು ಗಾಳಿಗೆ ಸಂಬಂಧಿಸಿದ್ದಲ್ಲ, ಇದು ಪ್ರಜಾಸತ್ತೆಯ ಮಾಲಿನ್ಯ ಇದು.ಯಾವುದೇ ಪುಸ್ತಕಗಳ ಬಿಡುಗಡೆಯ ಕಾರ್ಯಕ್ರಮದಲ್ಲಿ ಊರಿನ ಸಮಸ್ಯೆಯು ಅದರ ತಲೆಬರಹವಾಗಿ ಬಂದಿದ್ದು ಇದೆ ಮೊದಲು ಇರಬೇಕು.

ವಿರುಪಾಕ್ಷಪ್ಪ ಕೊರಗಲ್ ಅವರ ಬರಹಗಳಲ್ಲಿ ಚಳವಳಿಯ ಅಂತಃಸತ್ವವಿದೆ.ಸೋಗಿಲ್ಲದ ಭಾಷೆ ಅವರದು. ಕೇವಲ ಕೊಪ್ಪಳ ಅಷ್ಟೇ ಅಲ್ಲದೇ ನಿಪ್ಪಾಣಿ ಹಾಗೂ ಹಾವೇರಿಯ ಭಾಷೆ ಇದೆ. ಕಣ್ಣಿಗೆ ಕಟ್ಟುವಂತೆ ಬರೆಯುತ್ತಾರೆ. 86 ವರ್ಷದಲ್ಲೂ ಸೃಜನಶೀಲರಾಗಿ ಬರೆಯುತ್ತಿದ್ದಾರೆ. ಬೌದ್ಧಿಕ ಎಚ್ಚರ ಇಷ್ಟು ವರ್ಷ ಕಾದಿಟ್ಟುಕೊಂಡಿದ್ದಾರೆ. ಮನುಷ್ಯರು ಸ್ಥಾನ ಬಲದಿಂದ ಅಲ್ಲ ಸಹಜ ಮಾನವೀಯ ವರ್ತನೆಗಳಿಂದ ದೊಡ್ಡವರಾಗಿರುವವರ ಬಗ್ಗೆ ಬರಹವಿದೆ.ಅಂತಃಕರಣದ ಸಾಹಿತಿ ವಿರುಪಾಕ್ಷಪ್ಪ ಕೊರಗಲ್. ಮನುಷ್ಯತ್ವದ ವಿಶ್ವಕೋಶ ತಮ್ಮ ಪುಟ್ಟ ಕೃತಿಯಲ್ಲಿ ನೀಡಿದ್ದಾರೆ.ಎಲ್ಲರೊಳಗೂ ದೊಡ್ಡ ಚೈತನ್ಯವಿದೆ. ಆ ಚೈತನ್ಯ ಗುರುತಿಸುವ ಬರಹಗಾರ ಕೊರಗಲ್ ಇದು ಫಿಲಾಸಫಿ ಎಂದು ಹೇಳಿದರು.

ವೈತರಣಿಯಲ್ಲಿ ಹೆಣ್ಣು (ಕಥಾ ಸಂಕಲನ) ಕುರಿತು ಸಾವಿತ್ರಿ ಮುಜುಮದಾರ ಮಾತನಾಡಿದರು.

ಲೇಖಕ ವಿರುಪಾಕ್ಷಪ್ಪ ಕೊರಗಲ್ ತಮ್ಮ ಕೊಪ್ಪಳದ ಸಾಹಿತ್ಯ ಬಳಗದ ಬದುಕಿನ ಒಡನಾಟವನ್ನು ಆತ್ಮೀಯವಾಗಿ ಸ್ಮರಿಸಿಕೊಂಡರು.ಅರುಣಾ ನರೇಂದ್ರ ಸ್ವಾಗತಿಸಿದರು. ನಿವೃತ್ತ ಉಪನ್ಯಾಸಕ ಶಂಭುಲಿಂಗಪ್ಪ ಹರಗೇರಿ ನಿರೂಪಿಸಿದರು. ವಿರುಪಾಕ್ಷಪ್ಪ ಕೊರಗಲ್ ರ ಕುಟುಂಬಸ್ತರು, ಬರಹಗಾರರು, ಸಾಹಿತ್ಯ ಅಭಿಮಾನಿಗಳು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.