ಸಿದ್ದಿಗಳಿಗೆ ಕಳಪೆ ಗುಣಮಟ್ಟದ ಆಹಾರ ಧಾನ್ಯ: ತಿರಸ್ಕರಿಸಿದ ಜನತೆ

ಮುಂಡಗೋಡ: ಅರಣ್ಯವಾಸಿ ಸಿದ್ದಿ ಜನಾಂಗದವರು ಕಳಪೆ ಗುಣಮಟ್ಟದ ಆಹಾರ ದಾನ್ಯಗಳನ್ನು ತಿರಸ್ಕರಿಸಿದ ಘಟನೆ ತಾಲೂಕಿನ ಮೈನಳ್ಳಿ, ಗುಂಜಾವತಿ ಸೇರಿದಂತೆ ವಿವಿಧ ಭಾಗದಲ್ಲಿ ನಡೆದಿದೆ.

ಅನುದಾನದ ಕೊರತೆ ಸೇರಿದಂತೆ ಕಾರಣಾಂತರಗಳಿಂದ ಕಳೆದ ೨೦೨೪ನೇ ಸಾಲಿನಲ್ಲಿ ಸಿದ್ದಿ ಜನಾಂಗಕ್ಕೆ ಇಡೀ ವರ್ಷ ಆಹಾರವನ್ನೇ ವಿತರಿಸಲಾಗಿಲ್ಲ. ಕಳೆದ ವರ್ಷ ವಿತರಿಸಬೇಕಾಗಿದ್ದ ಬಾಕಿ ಆಹಾರವನ್ನು ಈಗ ವಿತರಿಸಲು ಗುತ್ತಿಗೆದಾರರು ಮುಂದಾಗಿದ್ದರು.

ಸಿದ್ದಿ ಜನರಿಗೆ ಪೌಷ್ಠಿಕಾಂಶ ವಿತರಣೆ ಮಾಡುವ ಜವಾಬ್ದಾರಿಯನ್ನು ಜಿಲ್ಲಾ ಸಮಾಜ ಕಲ್ಯಾಣ ಅಧಿಕಾರಿಗಳದ್ದು. ಆಹಾರ ಧಾನ್ಯ, ಪೌಷ್ಟಿಕಾಂಶ ಸಾಮಗ್ರಿಗಳ ವಿತರಣೆಗೆ ಜಿಲ್ಲಾ ಸಮಾಜ ಕಲ್ಯಾಣ ಅಧಿಕಾರಿಗಳು ಟೆಂಡರ್ ಕರೆದು ಆಯಾ ಕಂಪನಿಗಳಿಗೆ ನೀಡಿದ್ದರು. ಅದೇ ರೀತಿ ಪ್ರಸ್ತುತ ಮುಂಡಗೋಡ ಸಿದ್ದಿ ಜನರಿಗೆ ವಿತರಣೆ ಮಾಡುವ ಟೆಂಡರ್ ಗದಗ ಜಿಲ್ಲೆಯ ಒಂದು ಕಂಪನಿಗೆ ನೀಡಲಾಗಿದೆ ಎಂದು ಹೇಳಲಾಗುತ್ತಿದೆ.

ಕಳಪೆ ಗುಣಮಟ್ಟದ ಆಹಾರ ಪೂರೈಕೆ ಮಾಡಲಾಗುತ್ತಿದೆ ಎಂಬ ವಿಷಯ ತಮ್ಮ ಗಮನಕ್ಕೆ ಬಂದಿದೆ. ಅದನ್ನು ಬದಲಾಯಿಸಿ ಗುಣಮಟ್ಟದ ಆಹಾರ ಪೂರೈಸುವಂತೆ ಗುತ್ತಿಗೆದಾರರಿಗೆ ಸೂಚಿಸಲಾಗಿದೆ. ಶೀಘ್ರದಲ್ಲಿಯೇ ಆಹಾರ ಪೂರೈಕೆಯಾಗಲಿದೆ. -ಉಮೇಶ, ಜಿಲ್ಲಾ ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿ.