ಮಕ್ಕಳ ಸರ್ವಾಂಗೀಣ ವಿಕಸನಕ್ಕೆ ಪ್ರತಿಭಾ ಕಾರಂಜಿ ಸಹಕಾರಿ

ಕಾರಟಗಿ: ಶಿಕ್ಷಣ ಎಂದರೆ ಕೇವಲ ಅಕ್ಷರ ಕಲಿಕೆಯಲ್ಲ, ನಾಡಿನ ಮಕ್ಕಳ ಸರ್ವಾಂಗೀಣ ವ್ಯಕ್ತಿತ್ವ ವಿಕಸನಕ್ಕೆ ವೇದಿಕೆ ಕಲ್ಪಿಸುವ ಪ್ರತಿಭಾ ಕಾರಂಜಿ ಅವರ ಗುಪ್ತ ಪ್ರತಿಭೆಯನ್ನು ಆವರಣ ಮಾಡುತ್ತದೆ ಎಂದು ಜಿಪಂ ಕಾರ್ಯನಿರ್ವಾಹಕ ಅಧಿಕಾರಿ ವರ್ಣಿತ ನೇಗಿ ಹೇಳಿದರು.

ಗ್ಯಾರಂಟಿ ಯೋಜನೆ ಜಿಲ್ಲಾಧ್ಯಕ್ಷ ರೆಡ್ಡಿ ಶ್ರೀನಿವಾಸ ಮಾತನಾಡಿ, ಮಕ್ಕಳು ಸೋಲು-ಗೆಲುವನ್ನು ಸಮಾನವಾಗಿ ಸ್ವೀಕರಿಸಿ ಉತ್ತಮ ಭವಿಷ್ಯ ರೂಪಿಸಿಕೊಳ್ಳಿ ಎಂದರು.

ತಹಸೀಲ್ದಾರ್ ಎಂ. ಕುಮಾರಸ್ವಾಮಿ, ತಾಪಂ ಇಒ ಲಕ್ಷ್ಮೀದೇವಿ, ಗ್ಯಾರಂಟಿ ಯೋಜನೆಯ ಅಧ್ಯಕ್ಷ ದೇವಪ್ಪ ಬಾವಿಕಟ್ಟಿ, ಸೋಮನಾಥ ದೊಡ್ಡಮನಿ, ಪುರಸಭೆ ಸದಸ್ಯರಾದ ಸೌಮ್ಯಾ ಕಂದಗಲ್, ದೊಡ್ಡಬಸವರಾಜ ಬೂದಿ, ಮುಖ್ಯಾಧಿಕಾರಿ ಡಾ. ಸಾಬಣ್ಣ ಕಟ್ಟೇಕಾರ, ಜಿಲ್ಲಾ ಶಿಕ್ಷಣ ಮತ್ತು ತರಬೇತಿ ಸಂಸ್ಥೆಯ ಉಪನಿರ್ದೇಶಕ ಅನಂತಕುಮಾರ, ಹನುಮಂತಪ್ಪ ತೊಂಡಿಹಾಳ, ವಿಠ್ಠಲ ಜೀರಗಾಳಿ ಇದ್ದರು.

ಕೊಪ್ಪಳ ನೆಲದಲ್ಲಿ ಯಶಸ್ಸು ಕಂಡಿವೆ: ಪ್ರಾಸ್ತಾವಿಕವಾಗಿ ಮಾತನಾಡಿದ ಶಿಕ್ಷಣ ಇಲಾಖೆ ಜಿಲ್ಲಾ ಉಪನಿರ್ದೇಶಕ ಸೋಮಶೇಖರ ಗೌಡ, ಕೊಪ್ಪಳ ಜಿಲ್ಲೆ ಐತಿಹಾಸಿಕ ನೆಲ. ಇಲ್ಲಿನ ಮಣ್ಣು, ನೀರು ಕಲ್ಲು ವಿಶ್ವ ಪ್ರಸಿದ್ಧ. ಈ ನೆಲದಲ್ಲಿ ಎರಡು ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನ ನಡೆದು ಯಶಸ್ಸು ಕಂಡಿವೆ. ಕೊಪ್ಪಳ ಜಿಲ್ಲೆ ಶೈಕ್ಷಣಿಕವಾಗಿ ಉತ್ತಮವಾಗಿದೆ ಎಂದು ರೂಪಿಸಲು ಈ ರಾಜ್ಯಮಟ್ಟದ ಕಾರ್ಯಕ್ರಮವನ್ನು ಅತ್ಯಂತ ಕಡಿಮೆ ಅವಧಿಯಲ್ಲಿ ಜಿಲ್ಲಾಡಳಿತದ ಸಹಕಾರದಿಂದ ರೂಪಿಸಲಾಗಿದೆ. ಕೊಪ್ಪಳ ಅತ್ಯಂತ ಶ್ರೀಮಂತ ಜಿಲ್ಲೆ ಎಂದು ಈ ಕಾರ್ಯಕ್ರಮ ನಿರೂಪಿಸುತ್ತದೆ ಎಂದರು. ನಾಡಿನ ಒಟ್ಟು 35 ಶೈಕ್ಷಣಿಕ ಜಿಲ್ಲೆಗಳಿಂದ ಒಟ್ಟು 1500 ಜನರ ಈ ಕಲೋತ್ಸವದಲ್ಲಿ ಭಾಗಿಯಾಗಿದ್ದಾರೆ. ಎರಡು ದಿನ ಮಕ್ಕಳ ಕಲರವ ಇರಲಿದೆ ಎಂದರು.

ಹೋಳಿಗೆ ತುಪ್ಪ: ಕಾರ್ಯಕ್ರಮಕ್ಕೆ ಆಗಮಿಸಿದ ಅತಿಥಿಗಳ ನಡುವೆ ಊಟದ್ದೆ ಸುದ್ದಿ. ಶನಿವಾರ ಬೆಳಗ್ಗೆ ತಿಂಡಿಗೆ ಕೇಸರಿ ಬಾತ್ ಮತ್ತು ಉಪ್ಪಿಟ್ಟು, ಜತೆಗೆ ಅವಲಕ್ಕಿ ಚೂಡಾ, ಟೀ ಮತ್ತು ಕಾಫಿ. ಮಧ್ಯಾಹ್ನ ಹೋಳಿಗೆ ಊಟ. ಹೋಳಿಗೆ ಮತ್ತು ತುಪ್ಪ, ಹೀರೇಕಾಯಿ ಪಲ್ಲೆ, ಅನ್ನ ಸಾಂಬರ್, ಕಡ್ಲೆಪುಡಿ, ಉಪ್ಪಿನಕಾಯಿ ಮತ್ತು ಮಜ್ಜಿಗೆ ಉಣಿಬಡಿಸಲಾಯಿತು. ಇಂದಿನ ಊಟಕ್ಕೆ ಒಟ್ಟು 3-4 ಕ್ವಿಂಟಲ್ ಅಕ್ಕಿ ಬಳಕೆ ಮಾಡಿದ್ದರೆ, ನಾಲ್ಕು ಸಾವಿರ ಹೋಳಿಗೆ ತಯಾರಿಸಲಾಗಿತ್ತು ಎಂದು ಊಟದ ಉಸ್ತುವಾರಿ ಹೊತ್ತ ಉದ್ಯಮಿ ಜಗದೀಶ ಅವರಾಧಿ ಮತ್ತು ಮಲ್ಲಿಕಾರ್ಜುನ ಕೊಟಗಿ ವಿವರಿಸಿದರು.