ಹಾವೇರಿಯಲ್ಲಿ ಮಹಾಶಿವರಾತ್ರಿ ಆಚರಣೆಗೆ ಸಿದ್ಧತೆ, ದೇಗುಲಗಳಲ್ಲಿ ವಿಶೇಷ ಪೂಜೆ

ಹಾವೇರಿ: ಮಹಾಶಿವರಾತ್ರಿಯನ್ನು ಶ್ರದ್ಧಾ ಭಕ್ತಿಯಿಂದ ಆಚರಿಸಲು ಜನರು ಸಿದ್ಧತೆ ನಡೆಸಿದ್ದು, ನಗರದ ಮಾರುಕಟ್ಟೆಯಲ್ಲಿ ವೈವಿಧ್ಯಮಯ ಹಣ್ಣುಗಳ ವ್ಯಾಪಾರ ಜೋರಾಗಿದೆ. ಬಿಸಿಲು, ಸೆಕೆ ಕೂಡ ಹೆಚ್ಚಾಗುತ್ತಿದ್ದು, ಹಣ್ಣುಗಳ ದರವೂ ದುಬಾರಿಯಾಗಿದೆ.

ನಗರಕ್ಕೆ ತಮಿಳುನಾಡಿನಿಂದ ಕಲ್ಲಂಗಡಿ ಹಣ್ಣುಗಳನ್ನು ತರಿಸಲಾಗಿದ್ದು, ಒಂದು ಕೆಜಿಗೆ ₹20- ₹25ರ ವರೆಗೂ ಮಾರಾಟ ಮಾಡಲಾಗುತ್ತಿದೆ. ಇನ್ನು ಆಂಧ್ರಪ್ರದೇಶದಿಂದ ತಂದ ಸಣ್ಣ ಗಾತ್ರದ ಕರಬೂಜ ಹಣ್ಣುಗಳನ್ನು ಕೆಜಿಗೆ ₹60- 70ರ ವರೆಗೆ, ಸೇಬು ಕೆಜಿಗೆ ₹200, ದ್ರಾಕ್ಷಿ ಕೆಜಿಗೆ ₹100, ಕಿತ್ತಳೆ ₹120, ಬಾಳೆಹಣ್ಣು ಒಂದು ಡಜನ್‌ಗೆ ₹50- 60, ದಾಳಿಂಬೆ ಕೆಜಿಗೆ ₹250 ಹೀಗೆ ತರಹೇವಾರಿ ಹಣ್ಣುಗಳ ದರ ಮಾಮೂಲಿಗಿಂತ ತುಸು ದುಬಾರಿಗೆ ಮಾರಾಟವಾಗುತ್ತಿದೆ. ಹಣ್ಣುಗಳ ಖರೀದಿಸುತ್ತಿರುವ ಗ್ರಾಹಕರಿಗೆ ಬಿಸಿಲಿನ ಬೇಗೆಯ ಜತೆಗೆ ಬೆಲೆ ಏರಿಕೆ ಬಿಸಿ ತಾಗಿದ್ದು, ಗ್ರಾಹಕರು ಚೌಕಾಸಿ ಮಾಡಿ ಹಣ್ಣುಗಳನ್ನು ಖರೀದಿಸುತ್ತಿರುವುದು ಕಂಡುಬಂತು.