ಗದಗ ಬೆಟಗೇರಿ ನಗರಸಭೆಯಲ್ಲಿ ಉಳಿತಾಯ ಬಜೆಟ್‌ ಮಂಡನೆ

ಗದಗ: ಗದಗ ಬೆಟಗೇರಿ ನಗರಸಭೆಯ ಪೌರಾಯುಕ್ತರು ಸದಸ್ಯರ ಮನವಿ, ಅಭಿವೃದ್ಧಿ ಕಾರ್ಯಗಳಿಗೆ ಸ್ಪಂದಿಸುತ್ತಿಲ್ಲ ಎಂಬ ಆರೋಪ, ಗದ್ಧಲದ ಮಧ್ಯೆಯೇ ಬುಧವಾರ ನಗರಸಭೆ ಅಧ್ಯಕ್ಷೆ ಉಷಾ ದಾಸರ ₹ 3.04 ಕೋಟಿ ಉಳಿತಾಯ ಬಜೆಟ್‌ ಮಂಡನೆ ಮಾಡಿದರು.

ಬಜೆಟ್ ವಿವರ: ಅಂದಾಜು ಆದಾಯದಲ್ಲಿ ವೇತನ ಅನುದಾನ ₹ 12.61 ಕೋಟಿ, ವಿದ್ಯುತ್ ಅನುದಾನ ₹ 21.72 ಕೋಟಿ, ಆಸ್ತಿ ತೆರಿಗೆ ಆದಾಯ ₹ 13 ಕೋಟಿ, ಅಭಿವೃದ್ಧಿ ಹಣ ₹ 2.50 ಕೋಟಿ, ಆಸ್ತಿ ತೆರಿಗೆ ಮೇಲಿನ ದಂಡ ₹ 2 ಕೋಟಿ, ನೀರು ಸರಬರಾಜು ಮೂಲಗಳ ಆದಾಯ ₹ 3 ಕೋಟಿ, ಅಸಾಧಾರಣ ಸ್ವೀಕೃತಿಗಳಾದ ಸರ್ವರಿಗೂ ಸೂರು, ಗೃಹಭಾಗ್ಯ, ಲಿಡ್ಕರ್ ಯೋಜನೆಗಳು ಹಾಗೂ ಇತರೆ ಸೇರಿ ₹ 54.62 ಕೋಟಿ ಸೇರಿ ಒಟ್ಟು ₹ 152.19 ಕೋಟಿ ಆದಾಯ ನಿರೀಕ್ಷಿಸಲಾಗಿದೆ.

ಸಮಸ್ಯೆಗೆ ಸ್ಪಂದಿಸುತ್ತಿಲ್ಲ, ಆರೋಪ: ಬಜೆಟ್ ಸಭೆ ಆರಂಭವಾಗುತ್ತಿದಂತೆ ಆಡಳಿತ ಪಕ್ಷದ ಸದಸ್ಯ ಚಂದ್ರು ತಡಸದ ಮಾತನಾಡಿ, ಅವಳಿ ನಗರದಲ್ಲಿ ಕುಡಿವ ನೀರಿನ ಸಮಸ್ಯೆ ಗಂಭೀರವಾಗಿದೆ. ಮಾಧ್ಯಮಗಳಲ್ಲಿ ಈ ಕುರಿತು ವರದಿಯಾಗುತ್ತಿದೆ, ವಾರ್ಡಗಳಲ್ಲಿ ಸದಸ್ಯರು ಕುಳಿತಕೊಳ್ಳಲು ಆಗುತ್ತಿಲ್ಲ. ಇದಕ್ಕೆ ಪೌರಾಯುಕ್ತರು, ಅಧಿಕಾರಿಗಳು ಸ್ಪಂದಿಸುತ್ತಿಲ್ಲ, ಯಾವುದೇ ಸಣ್ಣ ಸಣ್ಣ ಕೆಲಸಗಳೂ ಆಗುತ್ತಿಲ್ಲ. ಮೊದಲು ಎಲ್ಲ 35 ವಾರ್ಡಗಳಿಗೂ ತಲಾ ₹ 5 ಲಕ್ಷ ಕುಡಿವ ನೀರಿನ ವ್ಯವಸ್ಥೆಗಳಾದ ಬೋರ್ ವೆಲ್ ದುರಸ್ಥಿ ಸೇರಿದಂತೆ ವಿವಿಧ ಕೆಲಸಗಳಿಗೆ ನೀಡಬೇಕು, ಇದಕ್ಕೆ ಪೌರಾಯುಕ್ತರು ಕೌನ್ಸಿಲ್ ಸಭೆಯಲ್ಲಿ ಒಪ್ಪಿಗೆ ನೀಡಬೇಕು ಎಂದು ಆಗ್ರಹಿಸಿದರು. ಇದಕ್ಕೆ ಆಡಳಿತ ಮತ್ತು ವಿರೋಧ ಪಕ್ಷದ ಎಲ್ಲ 35 ಜನ ಸದಸ್ಯರು ಒಕ್ಕೊಲರನಿಂದ ಆಗ್ರಹಿಸಿದರು. ಇದಕ್ಕೆ ಅಧ್ಯಕ್ಷರು ಕೂಡಾ ಸಹಮತ ವ್ಯಕ್ತ ಪಡಿಸಿದರು. ಸಭೆಯಲ್ಲಿ ಪೌರಾಯುಕ್ತರು ಹೇಳಿಕೆ ನೀಡಬೇಕು ಎಂದಾಗಲು ಪೌರಾಯುಕ್ತ ಮಾರುತಿ ಬ್ಯಾಕೋಡ್ ಮಾತನಾಡದೇ ಇದ್ದಾಗ ವಿರೋಧ ಪಕ್ಷದ ನಾಯಕ ಎಲ್.ಡಿ. ಚಂದಾವರಿ ದಯವಿಟ್ಟು ಕೆಲಸ ಮಾಡು ಮನಸ್ಸಿದ್ದರೆ ಮಾಡ್ರಿ ಇಲ್ಲಾಂದ್ರ ಬೇರೆ ಕಡೆ ಹೋಗ್ರಿ.. ನೀರಿಗಾಗಿ ಜನ್ರೆಲ್ಲಾ ನಮ್ಗ ಬೈಯ್ಯಾಕತ್ತಾರ, ನಮ್ಮ ಮನಿಗೆ ಬರುವರನ್ ನಿಮ್ಮ ಮನಿಗೆ ಕಳಸತೀವಿ ನೋಡ್ರಿ ಎಂದ ನಂತರ ಪೌರಾಯುಕ್ತರು ಮಾತನಾಡಿದರು.