ನೆನಗುದಿಗೆ ಬಿದ್ದಿರುವ ಯೋಜನೆಗಳಿಗೆ ಮರುಜೀವ ಕೊಡಬೇಕು: ಮಾಜಿ ಸಚಿವ ಬಿ.ಶಿವರಾಂ

ನೂತನ ಸಂಸದ ಶ್ರೇಯಸ್‌ಗೆ ಅಭಿನಂದನಾ ಸಮಾರಂಭ

ತಾಲೂಕಿನಲ್ಲಿ ಹೆಬ್ಬಾಳು ಏತ ನೀರಾವರಿ, ಎತ್ತಿನಹೊಳೆ, ರಣಘಟ್ಟ, ಕರಗಡ, ಯೋಜನೆಗಳು ನೆನಗುದಿಗೆ ಬಿದ್ದಿದ್ದು ಇದಕ್ಕೆ ಮರುಜೀವ ಕೊಡುವುದರ ಜತೆಗೆ ಪಕ್ಷ ಸಂಘಟನೆಗೆ ನೂತನ ಸಂಸದ ಶ್ರೇಯಸ್ ಪಟೇಲ್ ಹೆಚ್ಚಿನ ಗಮನ ನೀಡಬೇಕು ಎಂದು ಮಾಜಿ ಸಚಿವ ಬಿ.ಶಿವರಾಂ ಹೇಳಿದರು.

ಗೆಲುವು ಕಂಡಾಕ್ಷಣ ಇಷ್ಟಕ್ಕೆ ಸುಮ್ಮನಿರಬಾರದು, ಮುಂದಿನ ದಿನದಲ್ಲಿ ಪಕ್ಷವನ್ನು ಬೂತ್ ಮಟ್ಟದಲ್ಲಿ ಸಂಘಟನೆಗೆ ಮುಂದಾಗಬೇಕಿದೆ. ತಾಲೂಕಿನಲ್ಲಿ ವಿದ್ಯುತ್ ಶಕ್ತಿ ಸಮಿತಿ, ಆರೋಗ್ಯ ಸಮಿತಿ, ಕೆಡಿಪಿ ಇನ್ನು ಮುಂತಾದ ಸಮಿತಿಗೆ ರಚಿಸಿದರೂ ಸರಿಯಾಗಿ ಕೆಲಸ ಮಾಡಲು ಯಾರು ಅಡ್ಡಿಯಾಗುತ್ತಿದ್ದಾರೆ ಎಂಬುದರ ಬಗ್ಗೆ ಚರ್ಚೆಯಾಗಬೇಕಿದೆ. ಸ್ಥಳೀಯ ಶಾಸಕರಿಗೆ ಬಗರ್‌ ಹುಕುಂ ಸಮಿತಿ ಬಗ್ಗೆ ನಿರಾಶಕ್ತಿ ಹೊಂದಿದ್ದು ಯಾವುದೇ ಕೆಲಸಗಳು ನಡೆಯುತ್ತಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದರು .

ಮಾಜಿ ಪುರಸಭಾ ಅಧ್ಯಕ್ಷ ಎಂ.ಆರ್.ವೆಂಕಟೇಶ್ ಮಾತನಾಡಿ, ಜಾತಿ ಹೆಸರು ಹೇಳಿಕೊಂಡು ಪಕ್ಷಕ್ಕೆ ಬಂದು ಬೂಟಾಟಿಕೆ ಆಟ ಆಡುವ ನಾಯಕರ ಮಾತನ್ನು ಸಂಸದರು ಕೇಳಬಾರದು, ಕಾರಣ ತಾಲೂಕಿಗೆ ಬಿ.ಶಿವರಾಂ ಒಬ್ಬರೇ ಪ್ರಶ್ನಾತೀತ ನಾಯಕರು, ಅವರು ಗೆದ್ದಿದ್ದರೆ ಬೇಲೂರಿನ ಸಮಗ್ರ ಅಭಿವೃದ್ಧಿಯಾಗುತಿತ್ತು. ಆದರೆ ಅವರ ಸೋಲಲು ಬೆನ್ನಿಗೆ ಚೂರಿ ಹಾಕಿದವರಿಗೆ ಮುಂದಿನ ದಿನಗಳಲ್ಲಿ ತಕ್ಕ ಪಾಠ ಕಲಿಸಲಾಗುತ್ತದೆ ಎಂದರು.