ಶಿರಹಟ್ಟಿಯಲ್ಲಿ ಪ್ರತಿಭಟನೆ, ಕರಾಳ ದಿನಕ್ಕೆ ಪೊಲೀಸರ ತಡೆ

ಶಿರಹಟ್ಟಿ: ತೋಂಟದಾರ್ಯ ಮಠದ ಭಾವೈಕ್ಯತಾ ದಿನಾಚರಣೆ ವಿರೋಧಿಸಿ ಶಿರಹಟ್ಟಿ ಫಕೀರೇಶ್ವರ ಮಠದಿಂದ ನಡೆಸಲು ನಿರ್ಧರಿಸಿದ್ದ ಕರಾಳ ದಿನಾಚರಣೆ ತಡೆಯಲು ತಾಲೂಕಾಡಳಿತ ಯಶಸ್ವಿಯಾಗಿದೆ.ಪಟ್ಟಣದಲ್ಲಿ ಫೆ. 20ರ ಮಧ್ಯರಾತ್ರಿಯಿಂದಲೇ ಕಲಂ 144 ಜಾರಿಗೊಳಿಸಲಾಗಿದ್ದು, ಯಾವುದೇ ಪ್ರತಿಭಟನೆ ನಡೆಸಲು ಅವಕಾಶ ನೀಡಲಾಗಿಲ್ಲ.೧೬ನೇ ಶತಮಾನದಿಂದಲೂ ಶಿರಹಟ್ಟಿ ಶ್ರೀ ಜಗದ್ಗುರು ಫಕೀರೇಶ್ವರ ಭಾವೈಕ್ಯತಾ ಸಂಸ್ಥಾನ ಮಠದ ಜಗದ್ಗುರುಗಳಿಗೆ ಮೀಸಲಾಗಿರುವ ಭಾವೈಕ್ಯತಾ ಹರಿಕಾರ ಎಂಬ ಪದವನ್ನು ಗದಗ ತೋಂಟದ ಸಿದ್ದಲಿಂಗ ಶ್ರೀಗಳ ೭೫ನೇ ಜಯಂತಿ ದಿನದಂದು ಬಳಸುವುದನ್ನು ವಿರೋಧಿಸಿ ಫೆ. ೨೧ರಂದು ಗದಗ ನಗರದಲ್ಲಿ ಕರಾಳ ದಿನಾಚರಣೆ ನಡೆಸಲು ನಿರ್ಧರಿಸಲಾಗಿತ್ತು.ತಾಲೂಕು ಆಡಳಿತ ಮಂಗಳವಾರ ರಾತ್ರಿಯೇ ಪಟ್ಟಣದ ಕೆಲವರ ಮೇಲೆ ನೋಟಿಸ್ ಜಾರಿ ಮಾಡಿ, ಪಟ್ಟಣದಾದ್ಯಂತ ಮತ್ತು ಶ್ರೀಮಠದ ಸುತ್ತಲೂ ಪೊಲೀಸ್ ಬಂದೋಬಸ್ತ್ ಮಾಡಿದ್ದರು. ಮಠಕ್ಕೆ ಯಾರೂ ಪ್ರವೇಶಿಸದಂತೆ ಪೊಲೀಸರು ತಡೆಹಿಡಿದರು.

ಪೊಲೀಸರು ನಮ್ಮ ಮಠದ ಭಕ್ತರ ಮೇಲೆ ದೌರ್ಜನ್ಯ ನಡೆಸಿರುವುದು ದುರದೃಷ್ಟಕರ. ನಮ್ಮನ್ನು ಬಂಧಿಸಬಹುದೇ ಹೊರತು ನಮ್ಮ ಪರಂಪರೆಯನ್ನು ಬಂಧಿಸಲು ಸಾಧ್ಯವಿಲ್ಲ. ಜತೆಗೆ ನಮ್ಮ ವಾಹನ ಚಾಲಕನನ್ನು ಕೂಡ ಮಠದ ಹೊರಗಡೆ ತಡೆದು ನಿಲ್ಲಿಸಿದ್ದಾರೆ. ಪೊಲೀಸ್ ಇಲಾಖೆ ಒಂದು ಮಠದ ಪರವಾಗಿ ಸೇವಕರಂತೆ ಕೆಲಸ ಮಾಡುವ ಜತೆಗೆ ಮಾರಾಟವಾಗಿದೆ ಎಂದು ಆರೋಪಿಸಿದರು.

ಶ್ರೀಗಳನ್ನು ಹೊರಗೆ ಬಿಡದೇ ತಡೆದ ಪೊಲೀಸರು: ೧೨.೩೦ರ ಸುಮಾರಿಗೆ ಫಕೀರ ದಿಂಗಾಲೇಶ್ವರ ಶ್ರೀಗಳು ಪತ್ರಿಕಾಗೋಷ್ಠಿ ಮುಗಿಸಿ ತಾಲೂಕಿನ ಬೆಳ್ಳಟ್ಟಿ ಗ್ರಾಮದಲ್ಲಿರುವ ಮಠದ ಶಿಕ್ಷಣ ಸಂಸ್ಥೆಗೆ ಭೇಟಿ ನೀಡಿ ಅಲ್ಲಿ ನಡೆದಿರುವ ಕಾಮಗಾರಿ ವೀಕ್ಷಣೆಗೆ ತೆರಳುವ ವೇಳೆ ಮಠದ ಅಗಸಿ ಬಾಗಿಲಿನ ಹತ್ತಿರವೇ ಪೊಲೀಸರು ಶ್ರೀಗಳ ವಾಹನ ಹೊರಗೆ ಹೋಗದಂತೆ ತಡೆದರು. ಕೆಲ ಹೊತ್ತು ಬಿಗುವಿನ ವಾತಾವರನ ಸೃಷ್ಟಿಯಾಗಿ ಕೊನೆಗೂ ಶ್ರೀಗಳೇ ಮರಳಿ ಮಠದ ಒಳಗೆ ತೆರಳಿದ ಪ್ರಸಂಗ ನಡೆಯಿತು.

ಡಿವೈಎಸ್ಪಿ ಜೆಡ್.ಎಚ್. ಇನಾಮದಾರ, ಸಿಪಿಐ ನಾಗರಾಜ ಮಾಡಳ್ಳಿ, ಪಿಎಸ್‌ಐ ಈರಪ್ಪ ರಿತ್ತಿ ನೇತೃತ್ವದಲ್ಲಿ ಬಂದೋಬಸ್ತ್ ಕೈಗೊಳ್ಳಲಾಗಿತ್ತು.