ಮನೆಗಳಿಗೆ ನುಗ್ಗುದ ಮಳೆ ನೀರು: ಜನಜೀವನ ತತ್ತರ

ಕನ್ನಡಪ್ರಭ ವಾರ್ತೆ ಚಿಂಚೋಳಿ

ತಾಲೂಕಿನಲ್ಲಿ ಶನಿವಾರ, ಭಾನುವಾರ ಹಗಲು ರಾತ್ರಿ ಸುರಿದ ಮಳೆಯಿಂದಾಗಿ ಪಟಪಳ್ಳಿ, ಅಣವಾರ, ಎಂಪಳ್ಳಿ, ಶಾದೀಪೂರ, ಸಲಗರ ಬಸಂತಪೂರ, ಕನಕಪೂರ, ಲಿಂಗಾನಗರ, ಸಂಗಾಪೂರ ತಾಂಡಾ, ಬೆನಕೆಪಳ್ಳಿ, ರುದನೂರ, ಕೆರೋಳ್ಳಿ, ಗಣಾಪೂರ, ಬಂಟನಳ್ಳಿ, ರಾಯಕೋಡ, ಚಿಂತಪಳ್ಳಿ, ತಾಜಲಾಪೂರ ಗ್ರಾಮಗಳ ಹತ್ತಿರ ಇರುವ ನಾಲಾಗಳು ತುಂಬಿ ಹದಿದ್ದರಿಂದ ಜನರು ಹೊರಗೆ ಹೋಗಲು ಬಾರದಂತಾಯಿತು. ಬೆನಕನಹಳ್ಳಿ ಗ್ರಾಮದ ಪಕ್ಕದ ನಾಲೆ ನೀರು ಮನೆಗೆ ನುಗ್ಗಿದ್ದರಿಂದ ಜನರು ಬೆಚ್ಚಿಬಿದ್ದು ಮನೆಯೊಳಗಿನ ಸಾಮಗ್ರಿಗಳನ್ನು ಬಿಟ್ಟು ಹೊರಗೆ ಮಳೆಯಲ್ಲಿಯೇ ಕುಳಿತುಕೊಳ್ಳುವಂತಾಗಿದೆ. ಮನೆಯಲ್ಲಿ ಸಂಗ್ರಹಿಸಿದ್ದ ದವಸ-ಧಾನ್ಯಗಳು ಹಾನಿಗೊಂಡಿವೆ ಎಂದು ಬಿಜೆಪಿ ಮುಖಂಡ ಮಲ್ಲುಗೌಡ ರಾಯಪ್ಪಗೋಳ ತಿಳಿಸಿದ್ದಾರೆ.

ತೆಲಂಗಾಣ ಗಡಿಪ್ರದೇಶಕ್ಕೆ ಹೊಂದಿಕೊಂಡಿರುವ ಮಿರಿಯಾಣ-ಕೊತಲಾಪೂರ ಗ್ರಾಮದಲ್ಲಿ ಭಾರಿ ಮಳೆ ಆಗಿದ್ದರಿಂದ ತೆಲಂಗಾಣ ರಾಜ್ಯದ ತಾಂಡೂರಿಗೆ ರಸ್ತೆ ಸಂಪರ್ಕ ಕಲ್ಪಿಸುವ ಮಿರಿಯಾಣ ಸೇತುವೆ ಮೇಲೆ ಅಪಾರಪ್ರಮಾಣದಲ್ಲಿ ನೀರು ಹರಿದರಿಂದ ತಾಂಡೂರ ಚಿಂಚೋಳಿ ವಾಹನಗಳ ಸಂಚಾರ ನಿಂತು ಹೋಗಿತ್ತು.

ತುಂಬಿ ಹರಿದ ೧೪ ಸಣ್ಣ ನೀರಾವರಿ ಕೆರೆಗಳು: ತಾಲೂಕಿನಲ್ಲಿ ಸುರಿಯುತ್ತಿರುವ ಮಳೆಯಿಂದಾಗಿ ಕುಂಚಾವರಂ ವನ್ಯಜೀವಿಧಾಮ ಅರಣ್ಯಪ್ರದೇಶದಲ್ಲಿ ಇರುವ ಧರ್ಮಸಾಗರ, ಲಿಂಗಾನಗರ, ಅಂತಾಪೂರ, ಚಿಕ್ಕನಿಂಗದಳ್ಳಿ ಕೆರೆಗಳು ಭರ್ತಿಯಾಗಿ ಕೋಡಿಗಳಿಂದ ನೀರು ಹರಿಯುತ್ತಿದೆ. ಪಂಗರಗಾ, ದೋಟಿಕೊಳ, ಹುಲಸೂಡ, ಚಂದನಕೇರಾ, ಐನಾಪೂರ, ಮುಕರಂಬಾ, ಚಿಂದಾನೂರ, ಎಲಕಳ್ಳಿಕೆರೆಗಳು ಭರ್ತಿಯಾಗಿ ವೇಸ್ಟವೇರದಿಂದ ನೀರು ಹರಿಯುತ್ತಿವೆ ಇನ್ನು ೭ ಸಣ್ಣಕೆರೆಗಳು ಭರ್ತಿಗೊಳ್ಳುತ್ತಿವೆ ಎಂದು ಎಇ ಅನೀಲಕುಮಾರ ಕಳಸ್ಕರ ತಿಳಿಸಿದ್ದಾರೆ.