ಬೆಳೆವಿಮೆ ಹಣ ಬಿಡುಗಡೆಗೆ ಆಗ್ರಹಿಸಿ ಮುಂಡಗೋಡಲ್ಲಿ ರಸ್ತೆತಡೆ

ಮುಂಡಗೋಡ: ವಿವಿಧ ಬೇಡಿಕೆಗಳ ಈಡೇರಿಸುವಂತೆ ಆಗ್ರಹಿಸಿ ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ಹಸಿರುಸೇನೆ ವತಿಯಿಂದ ಗುರುವಾರ ತಾಲೂಕಿನ ಮಳಗಿ ಗ್ರಾಮದ ಶಿರಸಿ- ಹುಬ್ಬಳ್ಳಿ ಹೆದ್ದಾರಿ ತಡೆದು ಪ್ರತಿಭಟನೆ ನಡೆಸಿದರು.ಅತಿವೃಷ್ಟಿ ಮತ್ತು ಆನಾವೃಷ್ಟಿಯಿಂದ ಹಾಳಾದ ಎಲ್ಲ ಬೆಳೆಗಳಿಗೆ ಸಂಬಂಧಿಸಿದಂತೆ ಬೆಳೆವಿಮೆ ಹಣ ಶೀಘ್ರ ಬಿಡುಗಡೆಯಾಗಬೇಕು. ಅತಿವೃಷ್ಟಿಯಿಂದ ಹಾಳಾದ ಎಲ್ಲ ಬೆಳೆಗಳಿಗೆ ಸೂಕ್ತ ಪರಿಹಾರ ಖಾತೆಗೆ ಜಮಾ ಮಾಡಬೇಕು. ರೈತರ ಸಂಪೂರ್ಣ ಸಾಲಮನ್ನಾ ಆಗಬೇಕು. ಅತಿಕ್ರಮಣದಾರರಿಗೆ ಹಕ್ಕುಪತ್ರ ನೀಡಿ ಬೆಳೆಹಾನಿ ಪರಿಹಾರ ನೀಡಬೇಕಲ್ಲದೇ, ಜಿಪಿಎಸ್ ಮಾಡಿ ಹಕ್ಕು ಪತ್ರ ನೀಡಬೇಕು.

ರೈತರು ಬೆಳೆದ ಬೆಳೆಗಳಿಗೆ ನಿಗದಿತ ಬೆಲೆ ನಿಗದಿಪಡಿಸಬೇಕು. ಅಡಕೆ ಬೆಳೆವಿಮೆ ಈಗಿನ ಬರಗಾಲ ಪರಿಹಾರ ಮತ್ತು ವಿಮೆಯನ್ನು ತಕ್ಷಣ ಜಾರಿಗೋಳಿಸಬೇಕೆಂದು ರಸ್ತೆತಡೆದು ನಡೆಸಿ ಪ್ರತಿಭಟನೆ ಆರಂಭಿಸಿ ಎರಡು ಘಂಟೆಯಾದರೂ ತಹಸೀಲ್ದಾರ್ ಸ್ಥಳಕ್ಕಾಗಮಿಸದೆ ಇದ್ದಿದ್ದದರಿಂದ ತೀವ್ರ ಆಕ್ರೋಶಗೊಂಡ ಪ್ರತಿಭಟನಾಕಾರರು, ರೈತರ ಹಾಗೂ ಸಾರ್ವಜನಿಕರ ಬಗ್ಗೆ ಕಾಳಜಿ ಇಲ್ಲದೆ ಇರುವ ಅಧಿಕಾರಿಗಳು ತಮಗೆ ಬೇಕಾಗಿಲ್ಲ ಎಂದು ತಹಸೀಲ್ದಾರ್‌ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸುವ ಮೂಲಕ ರಸ್ತೆಯಲ್ಲಿಯೇ ಅಡುಗೆ ಮಾಡಿ ಊಟ ಮಾಡುವುದಾಗಿ ಗ್ಯಾಸ್ ಸಿಲಿಂಡರ್ ಹಾಗೂ ಪಾತ್ರೆಗಳನ್ನು ತರಿಸಿ ಅಡುಗೆ ಮಾಡಲು ಸಿದ್ಧತೆ ನಡೆಸಿದರು.

ಪ್ರಯಾಣಿಕರ ಪರದಾಟ: ಸುಮಾರು ೨ ಗಂಟೆಗಳ ಕಾಲ ರಸ್ತೆತಡೆ ನಡಸಿದ್ದರಿಂದ ಹತ್ತಾರು ಬಸ್, ಕಾರುಗಳು ಮತ್ತು ಮುಂತಾದ ಸರಕು ವಾಹನಗಳು ಸಾಲುಗಟ್ಟಿ ನಿಂತಿದ್ದವು. ಇದರಿಂದ ಪ್ರಯಾಣಿಕರರು ಮುಂದೆ ಹೋಗಲಾಗದೆ ಪರದಾಡಬೇಕಾಯಿತು. ಪಿಎಸ್‌ಐ ಪರಶುರಾಮ ಮಿರ್ಜಗಿ ನೇತೃತ್ವದಲ್ಲಿ ಪೊಲೀಸ್ ಬಿಗಿ ಬಂದೋಬಸ್ತ್ ಏರ್ಪಡಿಸಲಾಗಿತ್ತು.