ಮೇ ೩೧ರ ವರೆಗೆ ವಿಜಯನಗರ ಕಾಲುವೆಗೆ ನೀರು ಹರಿಸಿ

ಕನ್ನಡಪ್ರಭ ವಾರ್ತೆ ಹೊಸಪೇಟೆವಿಜಯನಗರ ಕಾಲುವೆಗಳಿಗೆ ಮೇ ೩೧ರ ವರೆಗೆ ನೀರು ಹರಿಸಬೇಕು ಎಂದು ಒತ್ತಾಯಿಸಿ ಹೊಸಪೇಟೆ ರೈತ ಸಂಘದ ವತಿಯಿಂದ ಜಿಲ್ಲಾಧಿಕಾರಿ ಕಚೇರಿ ಎದುರು ಬುಧವಾರ ರೈತರು ಪ್ರತಿಭಟನೆ ನಡೆಸಿದರು.

ತುಂಗಭದ್ರಾ ಅಣೆಕಟ್ಟು ನಿರ್ಮಾಣ ಪೂರ್ವದಿಂದಲೂ ವಿಜಯನಗರ ಕಾಲುವೆಗಳಾದ ರಾಯ, ಬಸವ, ಬೆಲ್ಲ, ತುರ್ತಾ ಮತ್ತು ಕಾಳಘಟ್ಟ ಕಾಲುವೆಗಳಿಂದ ನೀರನ್ನು ಪಡೆಯುವ ರೈತರು ನಿರಂತರವಾಗಿ ಬಹುವಾರ್ಷಿಕ ಬೆಳೆಗಳನ್ನು ಬೆಳೆಯುತ್ತಿದ್ದಾರೆ.

ಈ ಹಿಂದೆಯೂ ಜಲಾಶಯದಲ್ಲಿ ಎಷ್ಟೇ ನೀರಿನ ಕೊರತೆ ಇದ್ದರೂ ವಿಜಯನಗರ ಕಾಲುವೆಗಳಿಗೆ ನೀರು ಹರಿಸುವುದನ್ನು ನೀರಾವರಿ ಸಲಹಾ(ಐಸಿಸಿ) ಸಮಿತಿ ಸ್ಥಗಿತ ಮಾಡುವ ತೀರ್ಮಾನವನ್ನು ಎಂದೂ ತೆಗೆದುಕೊಂಡಿಲ್ಲ. ಆದರೆ, ಕಳೆದ ಅ. ೫ರಂದು ಬೆಂಗಳೂರಿನಲ್ಲಿ ನಡೆದ ಐಸಿಸಿ ಸಭೆಯಲ್ಲಿ ಕಾಲುವೆ ಆಧುನೀಕರಣ ಸಲುವಾಗಿ ಮೇ ತಿಂಗಳವರೆಗೆ ನೀರು ಹರಿಸದಿರಲು ತೀರ್ಮಾನಿಸಲಾಗಿದೆ. ಈ ತೀರ್ಮಾನವನ್ನುರೈತರು ಒಪ್ಪುವುದಿಲ್ಲ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಮುಖಂಡರಾದ ಗೋಸಲ ಭರಮಪ್ಪ, ಉತ್ತಂಗಿ ಕೊಟ್ರೇಶ್, ಗಾದಿಲಿಂಗಪ್ಪ, ಅಂಜಿನಪ್ಪ, ಬಿ. ನಾಗರಾಜ, ರಾಂಪುರ ಯಲ್ಲಪ್ಪ, ಮಟ್ಟೆ ಮೈಲಾರಿ, ಆರ್. ಕೊಟ್ರೇಶ್, ರಾಮನಗೌಡ, ಎಸ್. ಗಾಳೆಪ್ಪ, ಪ್ರಶಾಂತ್ ಸಿಂಗ್, ಡಿ. ಜಂಬಯ್ಯ, ಬಿ. ಚಂದ್ರಶೇಖರ್ ಸೇರಿದಂತೆ ಹೊಸಪೇಟೆ ಹಾಗೂ ಕಮಲಾಪುರ ಭಾಗದ ರೈತ ಮುಖಂಡರು ಇದ್ದರು.