ಅಮೃತ ಯೋಜನೆಯಲ್ಲಿ ಆರು ಕೆರೆಗಳಿಗೆ ಕಾಯಕಲ್ಪ!

ಅಜೀಜಅಹ್ಮದ ಬಳಗಾನೂರ ಹುಬ್ಬಳ್ಳಿ

ಧಾರವಾಡದ 8ನೇ ವಾರ್ಡಿನಲ್ಲಿರುವ ಹಿರೇಕೆರೆ (ಕೋಳಿಕೇರಿ), ನವನಗರದ 24ನೇ ವಾರ್ಡಿನ ನವಲೂರ ಕೆರೆ, ಹುಬ್ಬಳ್ಳಿಯ 40ನೇ ವಾರ್ಡಿನ ಸಂತೋಷನಗರ ಕೆರೆ, 36ನೇ ವಾರ್ಡಿನಲ್ಲಿರುವ ಚನ್ನಪ್ಪನ ಕೆರೆ, 24ನೇ ವಾರ್ಡಿನಲ್ಲಿರುವ ಗೋಕಲ ಗ್ರಾಮದ ಕೆರೆ, 82ನೇ ವಾರ್ಡಿನಲ್ಲಿರುವ ಬಿಡ್ನಾಳ ಕೆರೆಗಳು ಯೋಜನೆಯ ವ್ಯಾಪ್ತಿಯಲ್ಲಿವೆ. ಕೆರೆಗಳಿಗೆ ಸೇರುವ ಕೊಳಚೆ ನೀರು ತಡೆ, ಕಟ್ಟೆ ಬಲಪಡಿಸುವುದು, ಜೈವಿಕ ಬೇಲಿ, ಹಸಿರುಕರಣ ಹಾಗೂ ವಾಯುವಿಹಾರ ಮಾರ್ಗ ನಿರ್ಮಾಣ ಪ್ರಮುಖ ಕಾಮಗಾರಿಗಳಾಗಿವೆ.

ಕಸದ ತಾಣವಾದ ಸಂತೋಷನಗರ: ಹುಬ್ಬಳ್ಳಿಯ ವಾರ್ಡ್‌ 40ರಲ್ಲಿರುವ ಸಂತೋಷನಗರ ಕೆರೆ ಸುಮಾರು 4 ಎಕರೆ ವಿಸ್ತೀರ್ಣ ಹೊಂದಿದೆ. ಹಿಂದೆ ಪ್ರಮುಖ ಜಲಮೂಲವಾಗಿದ್ದ ಕೆರೆ ಈಗ ಕೊಳಚೆ ನೀರು, ಕಸ ಹಾಗೂ ದುರ್ವಾಸನೆಯಿಂದ ಬಳಲುತ್ತಿದೆ. ತಡೆಗೋಡೆ ಕಾಮಗಾರಿ ಪೂರ್ಣಗೊಳ್ಳದಿರುವುದನ್ನೇ ನೆಪ ಮಾಡಿಕೊಂಡು ರಾತ್ರಿ ವೇಳೆ ತ್ಯಾಜ್ಯ ಸುರಿಯಲಾಗುತ್ತಿದೆ ಎಂಬುದು ಸ್ಥಳೀಯರ ಆರೋಪ.

ಚನ್ನಪ್ಪನ ಕೆರೆಗೂ ಮರುಜೀವ: ಉಣಕಲ್ಲಿನ ಚನ್ನಪ್ಪನ ಕೆರೆ 4.9 ಎಕರೆ ವಿಸ್ತೀರ್ಣ ಹೊಂದಿದ್ದು, ನೂರಾರು ವರ್ಷಗಳ ಇತಿಹಾಸ ಹೊಂದಿದೆ. ಹಿಂದೆ ಸ್ಥಳೀಯರ ಬಳಕೆಯಲ್ಲಿದ್ದ ಕೆರೆಗೆ ಈಗ ಕೊಳಚೆ ನೀರು ಸೇರುತ್ತಿದ್ದು, ಸುತ್ತಮುತ್ತ ತ್ಯಾಜ್ಯ ಸುರಿಯಲಾಗುತ್ತಿದೆ. ಮೊದಲು ಕೆರೆಗೆ ಹರಿದುಬರುವ ಕೊಳಚೆ ನೀರನ್ನು ತಡೆಯಲಾಗುವುದು. ಬಳಿಕ ಕಟ್ಟೆ ಬಲಪಡಿಸುವುದು, ಜೈವಿಕ ಬೇಲಿ ಸೇರಿದಂತೆ ಅಗತ್ಯ ಕಾಮಗಾರಿ ಕೈಗೊಂಡು ವಾಯುವಿಹಾರ ಮಾರ್ಗ ಹಾಗೂ ಸಾರ್ವಜನಿಕ ಸೌಲಭ್ಯ ಅಭಿವೃದ್ಧಿಪಡಿಸಲು ಯೋಜನೆ ಹಾಕಿಕೊಳ್ಳಲಾಗಿದೆ.

ಈಗ ಅಮೃತ ಯೋಜನೆಯಡಿ ಕೈಗೊಳ್ಳಲಿರುವ ಕಾಮಗಾರಿ ಸಮರ್ಪಕವಾಗಿ ಜಾರಿಯಾದರೆ, ಕಸದ ತಾಣಗಳಂತಾಗಿರುವ ಕೆರೆಗಳು ಮತ್ತೆ ಜಲಮೂಲಗಳಾಗಿ, ಸುತ್ತಲಿನ ಪ್ರದೇಶಗಳು ಹಸಿರು ವಾಯುವಿಹಾರ ತಾಣಗಳಾಗಿ ರೂಪುಗೊಳ್ಳುವ ನಿರೀಕ್ಷೆ ಮೂಡಿದೆ. ನೂರಾರು ನಿವಾಸಿಗಳಿಗೆ ಬೆಳಗ್ಗೆ- ಸಂಜೆ ವಾಯುವಿಹಾರಕ್ಕೆ ಸ್ವಚ್ಛ, ಸುರಕ್ಷಿತ ಸಾರ್ವಜನಿಕ ಸ್ಥಳವೂ ಸಿಗಲಿದೆ.

ಕೆರೆಗಳು ಅನುದಾನ

ಧಾರವಾಡ ನವನಗರ ಕೆರೆ₹3.85 ಕೋಟಿ

ಉಣಕಲ್ಲ ಚನ್ನಪ್ಪನ ಕೆರೆ ₹2.75 ಕೋಟಿ

ಹುಬ್ಬಳ್ಳಿ ಬಿಡ್ನಾಳ ಕೆರೆ ₹2.75 ಕೋಟಿ