ಪಾಲಿಕೆ ಸಿಬ್ಬಂದಿಯಿಂದಲೇ ರಸ್ತೆ ಬದಿ ತ್ಯಾಜ್ಯ ವಿಲೇವಾರಿ!

ಶಿವಾನಂದ ಗೊಂಬಿ

ಪಾಲಿಕೆಯ ತ್ಯಾಜ್ಯ ವಿಲೇವಾರಿ ಟ್ರಕ್‌, ಆಟೋ ಟಿಪ್ಪರ್‌ ಸೇರಿದಂತೆ ಇತರ ವಾಹನಗಳು ಮನೆ ಮನೆಗಳಿಂದ, ಕಲ್ಯಾಣ ಮಂಟಪ, ಹೋಟೆಲ್‌ಗಳಿಂದ ಸಂಗ್ರಹಿಸಿದ ತ್ಯಾಜ್ಯವನ್ನು ಹೇಸಿಗೆ ಮಡ್ಡಿ ಅಥವಾ ಡಂಪಿಂಗ್‌ ಯಾರ್ಡ್‌ನಲ್ಲಿ (ಕಸ ಸಂಗ್ರಹಗಾರಕ್ಕೆ) ವಿಲೇವಾರಿ ಮಾಡುತ್ತಿಲ್ಲ. ಬದಲಿಗೆ ಊರ ಹೊರವಲಯಗಳಲ್ಲಿ ರಸ್ತೆ ಬದಿಗಳಲ್ಲಿ ತ್ಯಾಜ್ಯವನ್ನು ಎಸೆದು ಹೋಗುತ್ತಿದ್ದಾರೆ.

ಕುಸುಗಲ್‌ ರಸ್ತೆ ಬದಿಯಲ್ಲಿ ಭಾನುವಾರ ಬೆಳಗ್ಗೆ ಟ್ರಕ್‌ವೊಂದು ಮುಂದುಗಡೆ ಎಚ್‌ಡಿಎಂಸಿ ಎಂದು ಆಂಗ್ಲ ಭಾಷೆಯಲ್ಲಿ ಬರೆದಿರುವ (ವಾಹನ ಸಂಖ್ಯೆ- ಕೆಎ- 25, 7583) ಕಸ ಎಸೆದು ಅಲ್ಲಿಂದ ತೆರಳಿತು. ಇದು ಒಂದು ದಿನದ ಕಥೆಯಲ್ಲ. ಪ್ರತಿ ಎರಡ್ಮೂರು ದಿನಗಳಿಗೊಮ್ಮೆ ಈ ರೀತಿ ಪಾಲಿಕೆಯ ಸಿಬ್ಬಂದಿ ಬೇರೆ ಬೇರೆಡೆಗಳಲ್ಲಿ ಸಂಗ್ರಹಿಸಿದ ಕಸವನ್ನು ಇಲ್ಲಿ ಎಸೆದು ಹೋಗುತ್ತಾರೆ. ಈ ಬಗ್ಗೆ ಕೇಳಿದರೆ ನಮ್ಮನ್ನೇ ದಬಾಯಿಸುತ್ತಾರೆ ಎಂದು ಅಲ್ಲೇ ಡಬ್ಬಾ ಅಂಗಡಿ ಇಟ್ಟುಕೊಂಡು ಜೀವನ ಸಾಗಿಸುವವರು ಹೇಳುತ್ತಾರೆ.

ಇನ್ನು ಸಾರ್ವಜನಿಕರು ಕಸ ಎಸೆಯುವ ಜಾಗಗಳನ್ನು ಬ್ಲ್ಯಾಕ್‌ ಸ್ಪಾಟ್‌ಗಳೆಂದು ಗುರುತಿಸಿ ಅಲ್ಲಿ ಕಸ ಸುರಿದರೆ ಪಾಲಿಕೆ ದಂಡ ವಸೂಲಿ ಮಾಡುತ್ತಿದೆ. ಇದೀಗ ಪಾಲಿಕೆ ಸಿಬ್ಬಂದಿಯೇ ಅನಧಿಕೃತವಾಗಿ ಹೊರವಲಯಗಳಲ್ಲಿ ಡಂಪಿಂಗ್‌ ಯಾರ್ಡ್‌ಗಳಂತೆ ಮಾಡುತ್ತಿದ್ದಾರಲ್ಲ? ಈಗ ಯಾರ ಮೇಲೆ ಪಾಲಿಕೆ ಆಡಳಿತ ಮಂಡಳಿ ಕ್ರಮ ಕೈಗೊಳ್ಳುತ್ತದೆ ಎಂಬ ಪ್ರಶ್ನೆ ಪ್ರಜ್ಞಾವಂತರದ್ದು. ಇದಕ್ಕೆ ಶಾಸಕರು, ಪಾಲಿಕೆ ಆಡಳಿತ ಮಂಡಳಿ, ಆಯುಕ್ತರೇ ಉತ್ತರ ನೀಡಬೇಕಿದೆ.