ಸಾಹಿತ್ಯ ಸಮ್ಮೇಳನ ಕನ್ನಡದ ಮನಸ್ಸುಗಳ ಕಟ್ಟಬೇಕು: ಪಂಡಿತಾರಾಧ್ಯ ಶ್ರೀ

ಜಿಲ್ಲಾ ಸಾಹಿತ್ಯ ಸಮ್ಮೇಳನ ಸಮಾರೋಪ । ಸಾಹಿತಿಗಳಿಗೆ ಆದ್ಯತೆ ನೀಡಲು ಸಲಹೆ

ಸಾಹಿತ್ಯ ಸಮ್ಮೇಳನಗಳು ನುಡಿಜಾತ್ರೆಯ ಕಲ್ಪನೆಯಿಂದ ಹೊರಬಂದು ಕನ್ನಡದ ಮನಸ್ಸುಗಳನ್ನು ಕಟ್ಟುವ ಕೆಲಸ ಮಾಡಬೇಕು ಎಂದು ಸಾಣೆಹಳ್ಳಿ ತರಳಬಾಳು ಶಾಖಾಮಠದ ಪಟ್ಟಾಧ್ಯಕ್ಷ ಡಾ. ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.

ಇಂಗ್ಲಿಷ್‌ ಕಲಿತ ಮಾತ್ರಕ್ಕೆ ತಮ್ಮ ಮಕ್ಕಳಿಗೆ ಉದ್ಯೋಗಗಳು ಲಭಿಸುತ್ತವೆ ಎನ್ನುವ ನಂಬಿಕೆ ಪೋಷಕರಲ್ಲಿ ಬಲವಾಗಿ ಬೆಳೆದಿರುವುದರಿಂದ ಅವರು ತಮ್ಮ ಮಕ್ಕಳನ್ನು ಇಂಗ್ಲಿಷ್‌ ಮಾಧ್ಯಮದ ಶಾಲೆಗಳಿಗೆ ಸೇರಿಸುವುದು ಹೆಚ್ಚಾಗಿದೆ. ಕನ್ನಡ ನಮ್ಮ ತಾಯಿ, ನಮ್ಮ ಮಾತೃಭಾಷೆ. ಅದರ ಬಗ್ಗೆ ನಿರ್ಲಕ್ಷ್ಯ ತೋರಿದರೆ ಸಂಸ್ಕೃತಿ ಮತ್ತು ಸಂಸ್ಕಾರಗಳನ್ನು ಮರೆತಂತೆ ಎಂದು ಶ್ರೀಗಳು ಹೇಳಿದರು.

ಸಾಹಿತ್ಯ ಸೃಷ್ಟಿಗೆ ವಯಸ್ಸು ಎಂದಿಗೂ ಅಡ್ಡಿಯಾಗಬಾರದು. ಎಲ್ಲರಲ್ಲಿಯೂ ಭಾಷೆ, ಸಾಹಿತ್ಯದ ಬಗ್ಗೆ ಪ್ರೀತಿ ಇರುತ್ತದೆ. ಅದು ಇರುವ ತನಕವೂ ಸಾಹಿತ್ಯ ಸೃಷ್ಟಿಯಾಗುತ್ತಲೇ ಇರುತ್ತದೆ ಎಂದರು.

ಮಧ್ಯ ಕರ್ನಾಟಕದಲ್ಲಿ ಮಳೆ ಬರದಿದ್ದರೂ ಸಾಹಿತ್ಯಕ್ಕೆ ಎಂದೂ ಬರವಿಲ್ಲ ಎಂಬುದನ್ನು ತೋರಿಸಿರುವ ಏಕೈಕ ಜಿಲ್ಲೆ ಚಿತ್ರದುರ್ಗ. ಕನ್ನಡ ಸಾಹಿತ್ಯ ಲೋಕಕ್ಕೆ ವಿಶೇಷ ಕೊಡುಗೆ ನೀಡಿದ ಸಾಹಿತಿಗಳು ಇಲ್ಲಿ ಜನಿಸಿದ್ದಾರೆ. ಇದು ನಮ್ಮೆಲ್ಲರಿಗೂ ಹೆಮ್ಮೆಯ ಸಂಗತಿ ಎಂದರು.

ಸಾಹಿತಿಗಳಿಗೆ ಆದ್ಯತೆ ನೀಡಬೇಕು:

ಜಿಲ್ಲಾ ಸಮ್ಮೇಳನದ ಆಹ್ವಾನ ಪತ್ರಿಕೆ ಮತದಾರರ ಪಟ್ಟಿಯಂತಿದೆ. ಸಮ್ಮೇಳನದ ಆಹ್ವಾನ ಪತ್ರಿಕೆಯಲ್ಲಿ ರಾಜಕೀಯ ಮುಖಂಡರ ಹೆಸರುಗಳೇ ಪ್ರಾಧಾನ್ಯತೆ ಪಡೆದುಕೊಂಡಿವೆ. ಸಮ್ಮೇಳನದಲ್ಲಿ ಸಾಹಿತಿಗಳಿಗೆ ಆದ್ಯತೆ ನೀಡುವ ಕೆಲಸ ಆಗಬೇಕು ಎಂದರು.

ರಾಜಕಾರಣಿಗಳ ವೇತನ ಏರಿಕೆ

ಮೊದಲ ದಿನದ ಕಾರ್ಯಕ್ರಮದಲ್ಲಿ ಸ್ವಾಮೀಜಿ ಒಬ್ಬರು ಹಾಜರಾಗಿ, ವೇದಿಕೆ ಏರದೇ ಹಿಂದಿರುಗಿದ ಘಟನೆ ಮನಸ್ಸಿಗೆ ತುಂಬಾ ನೋವುಂಟು ಮಾಡಿದೆ. ಇದಕ್ಕೆ ಕಾರ್ಯಕರ್ತರ ಲೋಪವೇ ಕಾರಣ. ಎಂದೂ ಈ ರೀತಿಯಾಗಬಾರದು ಎಂದು ಪಂಡಿತಾರಾಧ್ಯ ಶ್ರೀ ಸಲಹೆ ನೀಡಿದರು.