ಸಂತೋಷ್ ಲಾಡ್ ಹಾಗೂ ಈ. ತುಕಾರಾಂ ಕ್ಷೇತ್ರದ ಅಭಿವೃದ್ಧಿಯ ಜೋಡೆತ್ತುಗಳು- ಅನ್ನಪೂರ್ಣಾ ತುಕಾರಾಂ

ಸಂಡೂರು: ಸಚಿವ ಸಂತೋಷ್ ಲಾಡ್, ಸಂಸದ ತುಕಾರಾಂ ಸಂಡೂರು ಅಭಿವೃದ್ಧಿಯ ಜೋಡೆತ್ತುಗಳು. ಅವರ ಅಭಿವೃದ್ಧಿಯ ರಥಕ್ಕೆ ನಾನು ಹೆಗಲು ಕೊಡಲು ಚುನಾವಣೆಗೆ ಸ್ಪರ್ಧಿಸಿದ್ದೇನೆ ಎಂದು ಕಾಂಗ್ರೆಸ್ ಅಭ್ಯರ್ಥಿ ಈ.ಅನ್ನಪೂರ್ಣಾ ತುಕಾರಾಂ ಮನವಿ ಮಾಡಿದರು.

ಸಚಿವ ಸಂತೋಷ್ ಲಾಡ್ ಮಾತನಾಡಿ, ಬಿಜೆಪಿಯಾಗಲಿ ಅಥವಾ ಕಾಂಗ್ರೆಸ್ ಆಗಲಿ ಯಾರೂ ಅವರ ಮನೆಯಿಂದ ಜನತೆಗೆ ಹಣ ನೀಡುವುದಿಲ್ಲ. ಜನತೆ ನೀಡುತ್ತಿರುವ ತೆರಿಗೆಯ ಹಣವನ್ನು ಅವರಿಗೆ ಮುಟ್ಟಿಸುವ ಕೆಲಸ ಸರ್ಕಾರದ ಕೆಲಸವಾಗಿದೆ. ಆ ಕೆಲಸವನ್ನು ಕಾಂಗ್ರೆಸ್ ಪ್ರಾಮಾಣಿಕವಾಗಿ ಮಾಡುತ್ತಿದೆ. ರಾಜ್ಯದಲ್ಲಿ ೨೦೦೮ರಿಂದ ೨೦೨೨ರ ಮಧ್ಯ 10 ವರ್ಷ ಬಿಜೆಪಿ ಆಡಳಿತವಿತ್ತು. ಬಿಜೆಪಿಯ ಜನಾರ್ದನ ರೆಡ್ಡಿ, ಬಿ. ಶ್ರೀರಾಮುಲು, ಕರುಣಾಕರ ರೆಡ್ಡಿ ಸಚಿವರಾಗಿದ್ದರು. ಶಾಂತಕ್ಕ, ವೈ.ದೇವೇಂದ್ರಪ್ಪ ಸಂಸದರಾಗಿದ್ದರು. ತಾಳೂರು, ವಡ್ಡು ಬಸಾಪುರ ಮುಂತಾದ ಗ್ರಾಮಗಳ ಅಭಿವೃದ್ಧಿಗೆ ಏನಾದರೂ ಗ್ರ್ಯಾಂಟ್‌ ಬಂದಿದೆಯಾ? ತಾಲೂಕಿನ ಎಲ್ಲ ಗ್ರಾಮಗಳು ಅಭಿವೃದ್ಧಿ ಕಂಡಿರುವುದು ಕಾಂಗ್ರೆಸ್ ಅಧಿಕಾರಾವಧಿಯಲ್ಲಿ ಎಂದರು.

ಸಂಸದ ಈ.ತುಕಾರಾಂ ಅಭ್ಯರ್ಥಿಯ ಪರ ಮತಯಾಚಿಸಿ, ಕ್ಷೇತ್ರದಲ್ಲಿ ಜನತೆಗೆ ಮೂಲ ಸೌಕರ್ಯಗಳನ್ನು ಒದಗಿಸಲು ನಾವು ಪ್ರಾಮಾಣಿಕವಾಗಿ ಶ್ರಮಿಸಿದ್ದೇವೆ. ಕ್ಷೇತ್ರದಲ್ಲಿ ಉತ್ತಮ ರಸ್ತೆಗಳಾಗಿವೆ. ತಾಳೂರಿನಲ್ಲಿ ₹೫೪ ಲಕ್ಷ ವೆಚ್ಚದಲ್ಲಿ ನೂತನ ಗ್ರಾಪಂ ಕಟ್ಟಡವನ್ನು ನಿರ್ಮಿಸಲಾಗಿದೆ. ಬ್ರಿಡ್ಜ್ ಆಗಿದೆ. ಆಗಾಗ್ಗೆ ತಾಳೂರು, ನಾಗಲಾಪುರ ಮಾರ್ಗದ ನಾಲೆಯನ್ನು ದುರಸ್ತಿಗೊಳಿಸಿ, ನಾರಿಹಳ್ಳದ ನೀರನ್ನು ಪೂರೈಕೆ ಮಾಡುತ್ತಿರುವುದರಿಂದ, ಈ ಭಾಗದ ಕೃಷಿಗೆ ಅನುಕೂಲವಾಗಿದೆ. ತಾಳೂರಿನಲ್ಲಿ ₹೧.೪೮ ಕೋಟಿ ವೆಚ್ಚದಲ್ಲಿ ಪ್ರೌಢಶಾಲೆಯನ್ನು ನಿರ್ಮಿಸಲಾಗಿದೆ. ಬನ್ನಿಹಟ್ಟಿಯಲ್ಲಿ ₹೧೦ ಕೋಟಿ ವೆಚ್ಚದಲ್ಲಿ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯನ್ನು ಆರಂಭಿಸಲಾಗಿದೆ ಎಂದರು.

ಆಶಾಲತಾ ಸೋಮಪ್ಪ, ತಿಪ್ಪೇಸ್ವಾಮಿ ಸೇರಿದಂತೆ ಹಲವು ಪಕ್ಷದ ಮುಖಂಡರು ಉಪಸ್ಥಿತರಿದ್ದರು.