ಮಳೆ ಮಾಪನ ವೀಕ್ಷಕರಿಗೆ ಗೌರವಧನದ ಬರಗಾಲ

ಬಿಜಿಕೆರೆ ಬಸವರಾಜ

ಜಲ ಸಂಪನ್ಮೂಲ ಇಲಾಖೆಯ ಮಳೆ ಮಾಪನ ಕೇಂದ್ರಗಳಲ್ಲಿ ದಿನನಿತ್ಯ ಮಳೆ ಪ್ರಮಾಣದ ದತ್ತಾಂಶ ಸಂಗ್ರಹಿಸಿ ಸಂಬಂಧಿಸಿದ ಅಧಿಕಾರಿಗಳಿಗೆ ವರದಿ ಸಲ್ಲಿಸುತ್ತಿರುವ ತಾಲೂಕಿನ ಅರೆಕಾಲಿಕ ಸಿಬ್ಬಂದಿಗೆ ಕಳೆದ 21 ತಿಂಗಳಿಂದ ಗೌರವಧನ ನೀಡದಿರುವುದು ಇಲಾಖೆಯ ಕಾರ್ಯವೈಖರಿಯ ಬಗ್ಗೆ ಪ್ರಶ್ನೆ ಮೂಡಿಸಿದೆ.

ಸಾಮಾನ್ಯ ಮಳೆ ಮಾಪನ ಕೇಂದ್ರಗಳ ವೀಕ್ಷಕರಿಗೆ ಮಾಸಿಕ 900, ಸ್ವಯಂ ಚಾಲಿತ ಮಳೆ ಮಾಪನ ಕೇಂದ್ರಗಳ ವೀಕ್ಷಕರಿಗೆ 1,200 ಹಾಗೂ ಜಲ ಮತ್ತು ಹವಾಮಾನ ಮಾಪನ ಕೇಂದ್ರಗಳ ವರದಿಗಾರರಿಗೆ 7,500 ರು.ನಂತೆ ಇಲಾಖೆಯಿಂದ ನೇರವಾಗಿ ಗೌರವಧನ ಪಾವತಿಸಲಾಗುತ್ತದೆ. ಆದರೆ ಎರಡು ವರ್ಷಗಳ ಅವಧಿಯಲ್ಲಿ ಗೌರವಧನ ಪಾವತಿಯಾಗದಿರುವುದು ಸಿಬ್ಬಂದಿಯ ತೀವ್ರ ಅಸಮಾಧಾನಕ್ಕೆ ಕಾರಣವಾಗಿದೆ.

ಮಳೆಗಾಲದ ಸಂದರ್ಭದಲ್ಲಿ ಬೆಳಗ್ಗೆ 8.30ರೊಳಗೆ ತಾಲೂಕು ಕೇಂದ್ರಕ್ಕೆ ಮಳೆಯ ಪ್ರಮಾಣದ ವರದಿ ನೀಡಬೇಕಾಗಿರುವ ವೀಕ್ಷಕರು ಯಾವುದೇ ವಿಳಂಬವಿಲ್ಲದೆ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಆದರೆ ಕನಿಷ್ಠ ಗೌರವಧನವ ಕೂಡ ಸಮಯಕ್ಕೆ ಸರಿಯಾಗಿ ಸಿಗದಿರುವುದು ಅವರ ಆರ್ಥಿಕ ಸಂಕಷ್ಟ ಮತ್ತಷ್ಟು ಹೆಚ್ಚಿಸಿದೆ. ಇನ್ನಾದರೂ ಸಂಬಂಧಿಸಿದ ಇಲಾಖಾಧಿಕಾರಿಗಳು ಮಳೆ ಮಾಪನ ವೀಕ್ಷಕರಿಗೆ ಮತ್ತು ವರದಿಗಾರರಿಗೆ ಬಾಕಿ ಇರುವ ವೇತನ ನೀಡಬೇಕು ಎಂಬುದು ಸಾರ್ವಜನಿಕರ ಒತ್ತಾಯ.ಕಳೆದ 21 ತಿಂಗಳಿಂದ ಗೌರವಧನ ನೀಡದಿದ್ದರೂ ಮಳೆ ಮಾಪನದ ಮಾಹಿತಿಯನ್ನು ನಿತ್ಯವೂ ಸಮಯಕ್ಕೆ ಸರಿಯಾಗಿ ಸಂಗ್ರಹಿಸಿ ವರದಿ ಮಾಡುತ್ತಿದ್ದೇವೆ. ಅಲ್ಪ ಗೌರವಧನವನ್ನೇ ನಂಬಿಕೊಂಡಿರುವ ನಮಗೆ ಕುಟುಂಬ ನಿರ್ವಹಣೆ ಕಷ್ಟವಾಗಿದೆ. ಅಧಿಕಾರಿಗಳು ನಮ್ಮ ಸಮಸ್ಯೆಯನ್ನು ಗಂಭೀರವಾಗಿ ಪರಿಗಣಿಸಿ ಬಾಕಿ ಇರುವ ಗೌರವಧನ ಕೂಡಲೇ ಪಾವತಿಸಬೇಕು.