ಶಕ್ತಿ ಯೋಜನೆ: ವಾಯವ್ಯ ಸಾರಿಗೆ ಸಂಸ್ಥೆಗೆ ಶೇ. 66 ಹಣ ಬಿಡುಗಡೆ

- ಟಿಕೆಟ್‌ ಮೌಲ್ಯದ ಶೇ. 34ರಷ್ಟು ನೀಡುರುವುದು ಬಾಕಿಯುಳಿದಿದೆ

ಶಿವಾನಂದ ಗೊಂಬಿ

ಶಕ್ತಿ ಯೋಜನೆಗೆ ರಾಜ್ಯದಲ್ಲಿ ಅತ್ಯುತ್ತಮ ಸ್ಪಂದನೆ ದೊರೆತಿದೆ. ಆದರೆ, ಸಾರಿಗೆ ಸಂಸ್ಥೆಗಳಿಗೆ ಬರಬೇಕಾದ ದುಡ್ಡು ಮಾತ್ರ ಪೂರ್ಣವಾಗಿ ಬಂದಿಲ್ಲ. ಸಂಸ್ಥೆಗೆ ಬರೋಬ್ಬರಿ ಶೇ. 34ರಷ್ಟು ಶಕ್ತಿ ಯೋಜನೆಯ ದುಡ್ಡು ಬರಬೇಕಿದೆ. ಈ ಹಣವನ್ನು ಕೂಡಲೇ ಬಿಡುಗಡೆ ಮಾಡಬೇಕು ಎಂದು ಒಕ್ಕೊರಲಿನಿಂದ ಆಗ್ರಹಿಸುತ್ತಿರುವ ನೌಕರರ ವರ್ಗ, ಹಣ ಕೊಡದಿದ್ದಲ್ಲಿ ಹೋರಾಟಕ್ಕೆ ಇಳಿಯಲು ಅಣಿಯಾಗುತ್ತಿದೆ.

ಹಾಗಂತ ಪ್ರತಿ ತಿಂಗಳು ದುಡ್ಡು ಕೊಡುತ್ತಿಲ್ಲ ಅಂತೇನೂ ಇಲ್ಲ. ಕೊಡುತ್ತಿದೆ. ಆದರೆ ಸ್ವಲ್ಪ ಹಣವನ್ನು ಉಳಿಸಿಕೊಂಡು ಬರುತ್ತಿದೆ. ಪ್ರತಿ ತಿಂಗಳು ಹೀಗೆ ಹಣ ಉಳಿಸಿಕೊಂಡು ಬರುತ್ತಿರುವುದರಿಂದ ವಾಯವ್ಯ ಸಾರಿಗೆ ಸಂಸ್ಥೆಗೆ ಇನ್ನೂ ₹213.80 ಕೋಟಿ ಕೊಡುವುದು ಬಾಕಿಯುಳಿದಿದೆ. ಮುಂದಿನ ತಿಂಗಳಿಗೆ ಇದು ಮತ್ತಷ್ಟು ಏರಿಕೆಯಾಗುತ್ತದೆ.

ಜೂ.11ರಿಂದ ನವೆಂಬರ್‌ 30ರ ವರೆಗೆ 24.57 ಕೋಟಿಗೂ ಅಧಿಕ ಮಹಿಳೆಯರು ಶಕ್ತಿ ಯೋಜನೆಯಡಿ ಪ್ರಯಾಣಿಸಿದ್ದಾರೆ. ಇದರ ಟಿಕೆಟ್‌ ಮೌಲ್ಯ ₹631.26 ಕೋಟಿಗೂ ಅಧಿಕವಾಗಿದೆ. ಆದರೆ ಈ ವರೆಗೆ ಕೊಟ್ಟಿರುವುದು ₹417.46 ಕೋಟಿ. ಇನ್ನೂ ₹213.80 ಕೋಟಿ ಕೊಡುವುದು ಬಾಕಿಯುಳಿದಿದೆ. ಇದರಿಂದ ಟಿಕೆಟ್‌ ಮೌಲ್ಯದ ಶೇ. 66ರಷ್ಟು ಮಾತ್ರ ದುಡ್ಡನ್ನು ಕೊಟ್ಟಂತಾಗಿದೆ. ಇನ್ನು ಶೇ. 34ರಷ್ಟು ಕೊಡುವುದು ಬಾಕಿಯುಳಿದಿದೆ ಎಂದು ಮೂಲಗಳು ತಿಳಿಸುತ್ತವೆ.

ಕಾಂಗ್ರೆಸ್‌ ಸರ್ಕಾರ ಗ್ಯಾರಂಟಿ ಯೋಜನೆಯಲ್ಲಿ ಮಹಿಳೆಯರಿಗೆ ಉಚಿತ ಪ್ರಯಾಣ ಘೋಷಿಸಿದ ವೇಳೆ ಸಾರಿಗೆ ಸಂಸ್ಥೆಯ ನೌಕರರು, ಅಧಿಕಾರಿವರ್ಗವೆಲ್ಲ ಸಂತಸವಾಗಿತ್ತು. ನಷ್ಟದಲ್ಲಿರುವ ಸಂಸ್ಥೆಗೆ ಬೂಸ್ಟ್‌ ನೀಡಿದಂತಾಗುತ್ತದೆ ಎಂದು ಭಾವಿಸಿದ್ದರು. ಆದರೆ ಇದೀಗ ಮಹಿಳಾ ಪ್ರಯಾಣದ ಟಿಕೆಟ್‌ ಮೌಲ್ಯಕ್ಕಿಂತ ಕಡಿಮೆ ಕೊಡುತ್ತಿರುವುದೇಕೆ? ಟಿಕೆಟ್‌ ಮೌಲ್ಯದ ಎಲ್ಲ ಹಣವನ್ನು ಕೊಡಿ ಎಂದು ಈಗಾಗಲೇ ಮನವಿ ಕೊಟ್ಟಿದ್ದೇವೆ. ಸಚಿವರು ಸಿಎಂ ಜತೆ ಚರ್ಚಿಸಿ ಕ್ರಮ ಕೈಗೊಳ್ಳುವುದಾಗಿ ಭರವಸೆ ನೀಡಿದ್ದಾರೆ. ಆದರೆ, ಈ ವರೆಗೂ ಆಗಿಲ್ಲ. ಜ.1,2 ಮತ್ತು 3ರಂದು ನೌಕರರ ಫೆಡರೇಷನ್‌ನ ಮೀಟಿಂಗ್‌ ಇದೆ. ಅಲ್ಲಿ ಚರ್ಚಿಸುತ್ತೇವೆ. ಮತ್ತೊಮ್ಮೆ ಸರ್ಕಾರಕ್ಕೆ ಮನವಿ ಮಾಡುತ್ತೇವೆ. ಆಗಲೂ ಕೊಡದಿದ್ದರೆ ಹೋರಾಟ ನಡೆಸುತ್ತೇವೆ. ಅದಕ್ಕೆ ಅವಕಾಶ ಕೊಡದೇ ಬರಬೇಕಾದ ದುಡ್ಡನ್ನೆಲ್ಲ ಕೊಡಬೇಕು. ಈ ನಿಟ್ಟಿನಲ್ಲಿ ಸರ್ಕಾರ ಕ್ರಮ ಕೈಗೊಳ್ಳಬೇಕೆಂಬುದು ನೌಕರರ ವರ್ಗದ ಅಂಬೋಣ.