ಗಂಗೆ ಹೊಳೆದಂಡೆಗೆ ನಿಂತು ನಾಲ್ಕು ಭಾಗ ಮಾಡ್ಯಾಳ

ಕನ್ನಡಪ್ರಭ ವಾರ್ತೆ ಬಳ್ಳಾರಿ

- ಇದು ಆಂಧ್ರಪ್ರದೇಶದ ಗಡಿಭಾಗ ಕರ್ನೂಲ್ ಜಿಲ್ಲೆಯ ದೇವರಗುಡ್ಡದ ಜಾತ್ರೆಯಲ್ಲಿ ಈ ಬಾರಿ ಗೊರವಯ್ಯ ನುಡಿದಿರುವ ಕಾರಣಿಕ.

ಕಾರಣಿಕವನ್ನು ನಾನಾ ರೀತಿಯಲ್ಲಿ ವಿಶ್ಲೇಷಣೆ ಮಾಡಲಾಗುತ್ತಿದ್ದು, ಗಂಗೆ ಹೊಳೆದಂಡೆಗೆ ನಿಂತು ನಾಲ್ಕು ಭಾಗ ಮಾಡ್ಯಾಳ ಎಂಬುದು ಈ ಬಾರಿಯೂ ಮತ್ತೆ ನೀರಿನ ಅಭಾವವನ್ನು ಸೂಚಿಸುತ್ತದೆ. ಕೃಷಿಕರು ನೀರಿನ ಸಂಕಷ್ಟಕ್ಕೆ ಗುರಿಯಾಗುತ್ತಾರೆ ಎಂದು ಕಾರಣಿಕ ನುಡಿದಿದೆ ಎಂದು ಭಕ್ತರು ವಿಶ್ಲೇಷಿಸುತ್ತಿದ್ದಾರೆ. ಹತ್ತಿ ಮತ್ತು ಜೋಳಕ್ಕೆ ಉತ್ತಮ ಧಾರಣೆ ಸಿಗಲಿದೆ. ಕೃಷಿಕರ ಬೆಳೆಯ ಧಾರಣೆಯಲ್ಲಿ ಹೊಯ್ದಾಟ ಇರಲಿದೆ ಎಂದು ಹೇಳಲಾಗುತ್ತಿದೆ.

ಆಂಧ್ರಪ್ರದೇಶದ ಆಲೂರು ತಾಲೂಕಿನಲ್ಲಿ ಗುಡ್ಡದ ಮಲ್ಲಯ್ಯನ ಜಾತ್ರೆಯಲ್ಲಿ ಕನ್ನಡದಲ್ಲಿಯೇ ಕಾರಣಿಕ ನುಡಿಯುವುದು ವಿಶೇಷ. ಮಾಳ ಮಲ್ಲೇಶ್ವರ ಜಾತ್ರೆ ಜರುಗುವ ಆಂಧ್ರಪ್ರದೇಶದ ಗಡಿ ಭಾಗದಲ್ಲಿ ಹತ್ತಾರು ಗ್ರಾಮಗಳಲ್ಲಿ ಕನ್ನಡವೇ ಮುಖ್ಯಭಾಷೆ. ಈ ಜಾತ್ರೆಗೆ ಬಳ್ಳಾರಿ ಜಿಲ್ಲೆ ಸೇರಿದಂತೆ ಕರ್ನಾಟಕದ ವಿವಿಧ ಭಾಗಗಳಿಂದ ಸಾವಿರಾರು ಜನರು ತೆರಳಿ, ದೇವರ ಕಾರಣಿಕ ಕೇಳಿ ಬರುತ್ತಾರೆ.