ಫೆಂಗಲ್ ಪರಿಣಾಮ: ಕಂಗೆಟ್ಟ ಶಿರಹಟ್ಟಿ ರೈತರು

ಮಹದೇವಪ್ಪ ಎಂ. ಸ್ವಾಮಿ

ತಾಲೂಕಿನಾದ್ಯಂತ ಒಂದು ವಾರದಿಂದ ಮೋಡ ಮುಸುಕಿದ ವಾತಾವರಣವಿದೆ. ಈ ಬಾರಿ ಮೊದಲೇ ವಿಪರೀತ ಮಳೆ ಸುರಿದು ಹೊಲಗಳು ಜವಳು ಬಿದ್ದು ರೈತರು ಮುಂಗಾರು ಫಸಲು ಕಳೆದುಕೊಂಡಿದ್ದಾರೆ. ಈಗ ಹಿಂಗಾರು ಪ್ರಮುಖ ವಾಣಿಜ್ಯ ಬೆಳೆ ಹಬ್ಬು ಶೇಂಗಾ ಹರಗಲು ಪ್ರಾರಂಭಿಸಿದ್ದಾರೆ.

ಹಬ್ಬು ಶೇಂಗಾ ಕಾಯಿಬಿಡುವ ಸಮಯದಲ್ಲಿ ವಿಪರೀತ ಮಳೆ ಸುರಿದು ತೇವಾಂಶ ಹೆಚ್ಚಾಗಿ ಇಳುವರಿ ಬರದೇ ರೈತರು ಸಂಕಷ್ಟಕ್ಕೆ ಸಿಲುಕಿದ್ದರು. ಈ ಕೊರಗಿನ ನಡುವೆಯೇ ಅಕಾಲಿಕ ಮಳೆಯ ಆತಂಕ ರೈತರ ಜೀವ ಹಿಂಡುತ್ತಿದೆ. ಹೀಗೆ ಹಲವಾರು ತೊಂದರೆಗಳ ಮಧ್ಯೆ ಅಪಾರ ಪ್ರಮಾಣದಲ್ಲಿ ಖರ್ಚು ಮಾಡಿ ಬಿತ್ತನೆ ಮಾಡಿದ ಬೆಳೆ ಕೈಸಿಗುವ ಸಮಯದಲ್ಲಿ ಇಂಥ ಪರಿಸ್ಥಿತಿ ಎದುರಾಗಿದ್ದು, ಸಹಜವಾಗಿ ರೈತರಲ್ಲಿ ಆತಂಕ ಮೂಡುವಂತಾಗಿದೆ.

ಫೆಂಗಲ್ ಚಂಡಮಾರುತದ ಪ್ರಭಾವ ಶನಿವಾರದಿಂದಲೇ ಆರಂಭವಾಗಿದ್ದು, ಸೋಮವಾರ ನಸುಕಿನ ವೇಳೆಯಿಂದ ಸಂಜೆ ವರೆಗೆ ತುಂತುರು ಮಳೆ ಕಾಣಿಸಿಕೊಂಡಿದೆ. ಕಳೆದ ಒಂದು ವಾರದಿಂದಲೇ ಮೋಡಕವಿದ ವಾತಾವರಣ ಇತ್ತು. ಭಾನುವಾರ ದಿನವಿಡಿ ಮಬ್ಬು ವಾತಾವರಣ, ಸಣ್ಣ ಪ್ರಮಾಣದಲ್ಲಿ ಗಾಳಿ ಬೀಸುತ್ತಿರುವುದರಿಂದ ಮೈಕೊರೆವ ಚಳಿ ಸೃಷ್ಟಿಯಾಗಿದೆ.ಮುಂಗಾರು ಹಂಗಾಮಿನಲ್ಲಿಯೂ ಯಾವುದೇ ಫಸಲು ಬರದೇ ರೈತರು ಕಂಗಾಲಾಗಿದ್ದಾರೆ. ಹಿಂಗಾರು ವಾಣಿಜ್ಯ ಬೆಳೆ ಹಬ್ಬು ಶೇಂಗಾ ಹರಗುವಷ್ಟರಲ್ಲಿ ಅಕಾಲಿಕ ಮಳೆಯಾಗುತ್ತಿದೆ. ಕೂಲಿ ಆಳುಗಳ ಕೊರತೆಯಿಂದಾಗಿ ಫಸಲು ಹಾಳಾಗುತ್ತಿದೆ ಎಂದು ರೈತರು ಕೊರಗುತ್ತಿದ್ದು, ಕೆಲವರು ಬಣವೆ ಹಾಕಿ ಪ್ಲಾಸ್ಟಿಕ್ ಹೊದಿಕೆ ಹಾಕಿದ್ದಾರೆ. ಇನ್ನು ಕೆಲವು ರೈತರು ಹರಗಿ ಹೊಲದಲ್ಲಿಯೇ ಬಿಟ್ಟಿದ್ದಾರೆ. ಹವಾಮಾನ ವೈಪರಿತ್ಯದಿಂದಾಗಿ ಒಟ್ಟಾರೆ ರೈತರಲ್ಲಿ ಕೃಷಿಯೇ ಬೇಡ ಎನ್ನುವ ಮನಸ್ಥಿತಿ ಮೂಡಿದೆ ಎಂದು ರೈತ ಗಂಗಪ್ಪ ಚವಡಾಳ ಹೇಳಿದರು.ಶಿರಹಟ್ಟಿ ತಾಲೂಕಿನಲ್ಲಿ ಒಟ್ಟು ೩,೯೦೦ ಹೆಕ್ಟೇರ್ ಪ್ರದೇಶದಲ್ಲಿ ಶೇಂಗಾ ಬಿತ್ತನೆಯಾಗಿದೆ. ಈಗಾಗಲೇ ಶೇ. ೮೦ರಷ್ಟು ರೈತರು ಶೇಂಗಾ ಹರಗಿ ಬಣವೆ ಹಾಕಿಕೊಂಡಿದ್ದಾರೆ. ಹವಾಮಾನ ಇಲಾಖೆ ವರದಿಯಂತೆ ಫೆಂಗಲ್ ಚಂಡಮಾರುತದಿಂದ ಅಕಾಲಿಕ ಮಳೆಯಾಗಿದೆ. ಹಬ್ಬು ಶೇಂಗಾ ಮತ್ತು ಹೊಟ್ಟು ಹಾನಿಯಾಗುವ ಸಾಧ್ಯತೆ ಇದೆ. ರೈತರು ಮುಂಜಾಗ್ರತಾ ಕ್ರಮವಾಗಿ ರೈತ ಸಂಪರ್ಕ ಕೇಂದ್ರದಲ್ಲಿ ದೊರೆಯುವ ತಾಡಪತ್ರಿ ಖರೀದಿಸಿ, ರಕ್ಷಣೆ ಮಾಡಿಕೊಳ್ಳಬೇಕು ಎಂದು ತಾಲೂಕು ಸಹಾಯಕ ಕೃಷಿ ನಿರ್ದೇಶಕ ರೇವಣೆಪ್ಪ ಮನಗೂಳಿ ಹೇಳಿದರು.