ನಿಬ್ಬೆರಗಾಗಿಸುತ್ತೆ ಶಿವಾನ್ಯ ಬಿರಾದಾರ ಸಾಧನೆ

ಶಶಿಕಾಂತ ಮೆಂಡೆಗಾರ

ಸಾಧನೆಗೆ ವಯಸ್ಸಿನ ಭೇದವಿಲ್ಲ ಎಂಬಂತೆ ಕೇವಲ 8 ವರ್ಷದ ಬಸವನಾಡಿನ ಬಾಲಕಿಯೊಬ್ಬಳು 4 ಸಾವಿರ ಸಾಮಾನ್ಯಜ್ಞಾನ ಪ್ರಶ್ನೆಗಳಿಗೆ ಎಳ್ಳು ಹುರಿದಂತೆ ಸರಿಯಾಗಿ ಉತ್ತರಿಸಿ ಹಲವು ದಾಖಲೆಗಳನ್ನು ಮಾಡಿದ್ದಾಳೆ. ವಿಜಯಪುರ ಜಿಲ್ಲೆಯ ಸಿಂದಗಿಯ ಸರ್ಕಾರಿ ಆದರ್ಶ ವಿದ್ಯಾಲಯದ ಮುಖ್ಯೋಪಾಧ್ಯಾಯ ಶಿವಪ್ಪಗೌಡ ಬಿರಾದಾರ ಹಾಗೂ ಪತ್ನಿ ಗೀತಾ ಬಿರಾದಾರ ಅವರ 2ನೇ ಪುತ್ರಿ ಈ ಪುಟ್ಟ ಪುಟಾಣಿ ಶಿವಾನ್ಯಳ ಅಗಾಧವಾದ ಜ್ಞಾನ ನೋಡಿದವರೆಲ್ಲ ಇವಳ ತೆಲೆಯೇ ಒಂದು ನಿಘಂಟು ಇದ್ದಂತಿದೆ ಎಂದು ಬೆರಗಾಗುತ್ತಾರೆ. ಏಕೆಂದರೆ ಕೇವಲ 3ನೇ ತರಗತಿಯಲ್ಲೇ ಕಾಂಪಿಟೆಟಿವ್ ಎಕ್ಸಾಂ ಫೇಸ್ ಮಾಡುವಷ್ಟು ಅಕ್ಷರ ನಿಘಂಟು ಸಾಮಾನ್ಯ ಜ್ಞಾನ ಹಾಗೂ ಜ್ಞಾಪಕಶಕ್ತಿ ಇವಳ ಬಳಿ ಇದೆ.

ಯಾವುದೇ ಪ್ರಶ್ನೆಗೆ ಥಟ್ ಅಂತ ಉತ್ತರಿಸುವ ಪುಟಾಣಿ ಶಿವಾನ್ಯಳಿಗೆ 4 ಸಾವಿರ ಜನರಲ್ ನಾಲೆಡ್ಜ್‌ ಪ್ರಶ್ನೋತ್ತರಗಳು ಬಾಯಿಪಾಠವಾಗಿದ್ದು, ಈಕೆ ಈಗಾಗಲೇ ಹಲವು ಗಿನ್ನೆಸ್ ರೆಕಾರ್ಡ್ ಮಾಡಿದ್ದಾಳೆ. ರಾಮಾಯಣ, ಮಹಾಭಾರತದಲ್ಲಿನ ಘಟನೆಗಳು ಹಾಗೂ ಅವುಗಳಲ್ಲಿ ಬರುವ ಪಾತ್ರಗಳು, ಕನ್ನಡ, ಇತಿಹಾಸ, ವಿಜ್ಞಾನ ಸೇರಿದಂತೆ ಹಲವು ವಿಭಾಗಗಳಲ್ಲಿನ ಪ್ರಶ್ನೆಗಳಿಗೆ ಥಟ್ ಅಂತ ಉತ್ತರಿಸುತ್ತಾಳೆ.ಅಲ್ಲದೆ ಕನ್ನಡದ ಮಹಾನ್ ನಾಯಕರು, ಕವಿಗಳು, ಆವಿಷ್ಕಾರಗಳು, ಸಂಶೋಧಕರು, ಗ್ರಹಗಳು, ಉಪಗ್ರಹಗಳು ಸೇರಿದಂತೆ ಎಲ್ಲ ವಿಭಾಗದ ಕ್ವಿಜ್‌ಗಳಿಗೂ ಶಿವಾನ್ಯಳ ಬಳಿ ಕ್ಷಣಾರ್ಧದಲ್ಲಿ ಉತ್ತರ ಸಿಗುತ್ತವೆ. ಜಗತ್ತಿನಲ್ಲಿನ ಎಲ್ಲ ದೇಶಗಳ ಹೆಸರು ಹಾಗೂ ಅವುಗಳ ರಾಜಧಾನಿಗಳನ್ನೂ ಸಹ ಕ್ಷಣಮಾತ್ರದಲ್ಲಿ ಹೇಳಿಬಿಡುತ್ತಾಳೆ. ಕೇಳಿವವರಿಗೆ ಸುಸ್ತಾಗುವಂತೆ ಮಾಡುವ ಈಕೆಯ ಸ್ಮೃತಿಪಟಲದ ಜ್ಞಾಪಕಶಕ್ತಿ ಅಗಾಧವಾಗಿದೆ. ಅರಸಿಬಂದ ಅವಾರ್ಡ್‌ಗಳು:

ಮಕ್ಕಳಿಗೆ ಏನಾದ್ರೂ ಕಲಿಸಬೇಕು ಎಂದು ಪಣ ತೊಟ್ಟ ತಾಯಿ ಗೀತಾ ಹಾಗೂ ತಂದೆ ಶಿವಪ್ಪಗೌಡ ತಾವೇ ಮನೆಯಲ್ಲೇ ಶಿಕ್ಷಣದ ಬಗ್ಗೆ ತಿಳುವಳಿಕೆ ನೀಡಿದ್ರು. ತಂದೆ-ತಾಯಿ ಹೇಳಿಕೊಟ್ಟ ಪ್ರಶ್ನೋತ್ತರಗಳನ್ನು ನೆನಪಿನಲ್ಲಿಟ್ಟುಕೊಂಡು ಕಲಿಯುತ್ತ ಹೋದ ಇವಳು ಇಂದು 4ಸಾವಿರ ಪ್ರಶ್ನೆಗಳಿಗೆ ಉತ್ತರಿಸುತ್ತಾಳೆ. ಅಷ್ಟೆ ಅಲ್ಲದೆ ಕನ್ನಡ ಹಾಗೂ ಇಂಗ್ಲೀಷ್ ಭಾಷೆಯನ್ನು ಓದುವುದು, ಬರೆಯುವುದು ಅತ್ಯಂತ ಸಲೀಸಾಗಿ ಮಾಡುತ್ತಾಳೆ.