ಆಸ್ತಿ ನೋಂದಣಿಗೆ ವಿದ್ಯುತ್‌ ಸಂಪರ್ಕ ಕಡಿತದ ಶಾಕ್‌!

ಧಾರವಾಡ:

ಕೆಲವು ತಿಂಗಳುಗಳ ವಿದ್ಯುತ್‌ ಬಿಲ್‌ ಬಾಕಿ ಹಿನ್ನೆಲೆಯಲ್ಲಿ ಹೆಸ್ಕಾಂ ಅಧಿಕಾರಿಗಳು ಶುಕ್ರವಾರ ಕಚೇರಿಯ ವಿದ್ಯುತ್‌ ಸಂಪರ್ಕ ಕಡಿತಗೊಳಿಸಿದ್ದಾರೆ. ಬೆಳಗ್ಗೆ 10.30ರಿಂದ ಆಸ್ತಿ ನೋಂದಣಿಗಾಗಿ ಬೆಂಗಳೂರು ಸೇರಿದಂತೆ ಹಲವು ಕಡೆಗಳಿಂದ ಬಂದ ಜನರು ವಿದ್ಯುತ್‌ ಸಂಪರ್ಕ ಇಲ್ಲದ ಕಾರಣ ಮಧ್ಯಾಹ್ನ ವರೆಗೂ ಕಾದು ಬೇಸತ್ತು ಸರ್ಕಾರದ ವಿರುದ್ಧ ಹರಿಹಾಯ್ದರು. ಕೆಲವರಂತೂ ನೋಂದಣಿ ಇಲಾಖೆ ಮೂಲಕ ಸರ್ಕಾರ ನೋಂದಣಿಗೆ ಸಾಕಷ್ಟು ಪ್ರಮಾಣದಲ್ಲಿ ಹಣ ಪಡೆಯುತ್ತಿದ್ದು ಆ ಹಣವನ್ನು ಏನು ಮಾಡುತ್ತಿದೆ? ಗ್ಯಾರಂಟಿಗೆ ಕೊಡುತ್ತಿದೆಯಾ? ಎಂದು ಹರಿಹಾಯ್ದರು. ಕಚೇರಿ ನಿರ್ವಹಣೆಗೆ ಹಣ ನೀಡಿಲ್ಲ ಎಂಬ ಸಬೂಬೂ ಬೇಡ. ನಾವು ನೋಂದಣಿಗೆ ಹಣ ತುಂಬಿದ್ದೇವೆ. ಕೂಡಲೇ ನೋಂದಣಿ ಮಾಡಿಕೊಡಿ ಎಂದು ದುಂಬಾಲು ಬಿದ್ದರು. ಕಚೇರಿ ಅಧಿಕಾರಿಗಳು ಇಂತಹ ಸಂಗತಿಗಳಿಗೆ ಅನುವು ಮಾಡಿಕೊಡಬಾರದು ಎಂದು ಉಪ ನೋಂದಣಾಧಿಕಾರಿಗಳ ಮೇಲೂ ಹರಿಹಾಯ್ದರು.