ಶ್ರೀ ಕೆಂಚಾಂಬ ದೇವಿ ಸಿಡಿ ಮಹೋತ್ಸವ

ಪಟ್ಟಣದ ರಾಜಬೀದಿಗಳಲ್ಲಿ ಮೆರವಣಿಗೆ

ಪಟ್ಟಣದಲ್ಲಿ ಶ್ರೀ ವೀರಭದ್ರ ಸ್ವಾಮಿ ಜಾತ್ರಾ ಮಹೋತ್ಸವ ಅಂಗವಾಗಿ ಶ್ರೀ ಕೆಂಚಾಂಬ ದೇವಿ ಸಿಡಿ ಮಹೋತ್ಸವ ಅದ್ಧೂರಿಯಾಗಿ ಜರುಗಿತು.

ದೇವಾಲಯ ಪಕ್ಕದಲ್ಲಿರುವ ಸಿಡಿ ಕಂಬಕ್ಕೆ ಸಾಂಪ್ರ ದಾಯಿಕ ಪೂಜೆ ಸಲ್ಲಿಸಿ ಸಿಡಿ ಕಂಬದ ಮೇಲೆ ಸಿಡಿ ಆಡಿಸುವವರನ್ನು ಕೂರಿಸಲಾಯಿತು. ಅದಕ್ಕೂ ಮುನ್ನ ದೇವರುಗಳು ಸಿಡಿ ಕಂಬ ಪ್ರದಕ್ಷಿಣೆ ಮಾಡುವಾಗ ಭಕ್ತರು ಅರಿಶಿನ ಕುಂಕುಮ ಎರಚಿದರು. ಆನಂತರ ಜನಮಿತ್ರ ನಾರಾಯಣ ಕುಟುಂಬದ ಪೂಜಾರಿ ಧರಣಿಪಾಲ್ ಮಕ್ಕಳಿಗೆ ಸರಪಳಿ ಕೊಂಡಿ ಹಾಕಿ ಶ್ರೀ ಕೆಂಚಾಂಬ ದೇವಿಯವರೊಂದಿಗೆ ಪ್ರದಕ್ಷಿಣೆ ಹಾಕಿದ ಬಳಿಕ ಸಿಡಿಗೆ ಚಾಲನೆ ದೊರಕಿತು.

ಇದೇ ಸಂದರ್ಭದಲ್ಲಿ ಪುರಸಭಾ ಸದಸ್ಯರಾದ ತೋಟದ ಮನೆ ಮೋಹನ್, ಈರಳ್ಳಿ ರಮೇಶ್, ಕೆ.ಜಿ. ಶ್ರೀನಿವಾಸಮೂರ್ತಿ, ರಂಗನಾಥ್, ನಲ್ಲೂರಿ ಸುರೇಶ್, ವಿನಯ್, ಕುಮಾರ್, ದೇವಾಲಯ ಸಮಿತಿ ಪದಾಧಿಕಾರಿಗಳು ಇದ್ದರು.

ಕಡೂರು ಪಟ್ಟಣದ ಛತ್ರದ ಬೀದಿಯಲ್ಲಿರುವ ದೇವಾಲಯದ ಆವರಣದಲ್ಲಿ ಶ್ರೀ ಕೆಂಚಾಂಬ ದೇವಿ ಸಿಡಿ ಸೇವೆ ಮಹೋತ್ಸವ ನಡೆಯಿತು.