ಪ್ರಚಾರ ಬಿಟ್ಟು ಗಾಯಾಳು ನೆರವಿಗೆ ಸಿದ್ದೇಶ್ವರ ಪುತ್ರಿ ಅಶ್ವಿನಿ

ಕನ್ನಡಪ್ರಭ ವಾರ್ತೆ ದಾವಣಗೆರೆ

ತಮ್ಮ ತಾಯಿ ಗಾಯತ್ರಿ ಸಿದ್ದೇಶ್ವರ ಪರ ಪ್ರಚಾರಕ್ಕೆಂದು ದಾವಣಗೆರೆಯಿಂದ ಹರಿಹರ ತಾ. ಮಲೆಬೆನ್ನೂರು ಕಡೆಗೆ ಜಿ.ಎಸ್.ಅಶ್ವಿನಿ ತೆರಳುತ್ತಿದ್ದರು. ಹರಿಹರ ಬೈಪಾಸ್ ರಸ್ತೆಯ ಬಳಿ ಮುಳ್ಳುಗಳು ತುಂಬಿದ್ದ ನಾಲ್ಕೈದು ಟ್ರ್ಯಾಕ್ಟರ್ ಪೈಕಿ ಒಂದು ಟ್ರ್ಯಾಕ್ಟರ್ ಪಲ್ಟಿಯಾಗಿ ಅದು ಹಾಗೂ ಮುಳ್ಳುಗಳ ಅಡಿಯಲ್ಲಿ ನಾಲ್ಕೈದು ಯುವಕರು ಸಿಲುಕಿರುವುದನ್ನು ಕಂಡ ಜಿ.ಎಸ್.ಅಶ್ವಿನಿ ತಮ್ಮ ವಾಹನ ನಿಲ್ಲಿಸುವಂತೆ ಹೇಳಿ, ಗಾಯಾಳುಗಳ ನೆರವಿಗೆ ಧಾವಿಸಿದ್ದಾರೆ.

ಹರಿಹರ ತಾಲೂಕು ಆಸ್ಪತ್ರೆ ವೈದ್ಯಾಧಿಕಾರಿಗಳು, ವೈದ್ಯರೊಂದಿಗೆ ಚರ್ಚಿಸಿ, ಗಾಯಾಳುಗಳಿಗೆ ಚಿಕಿತ್ಸೆಗೆ ವ್ಯವಸ್ಥೆ ಮಾಡಿದ್ದಾರೆ. ಸಂಪೂರ್ಣ ಚಿಕಿತ್ಸೆ ಮುಗಿಯುವವರೆಗೂ ಸ್ಥಳದಲ್ಲೇ ಹಾಜರಿದ್ದ ಜಿ.ಎಸ್.ಅಶ್ವಿನಿ ಗಾಯಾಳುಗಳ ಯೋಗಕ್ಷೇಮ ವಿಚಾರಿಸಿ, ಧೈರ್ಯ ತುಂಬಿದ್ದಾರೆ. ತಮ್ಮ ತಾಯಿ ಪರ ಪ್ರಚಾರಕ್ಕೆ ಹೋಗುವುದನ್ನು ಬಿಟ್ಟು ಮಾನವೀಯತೆ ಮೆರೆದ ಜಿ.ಎಸ್.ಅಶ್ವಿನಿ ಮಾನವೀಯ ಸ್ಪಂದನೆಗೆ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಗಾಯಾಳುಗಳಿಗೆ ಯಾವುದೇ ಅಪಾಯವಿಲ್ಲವೆಂಬುದನ್ನು ವೈದ್ಯರಿಂದ ಖಚಿತಪಡಿಸಿಕೊಂಡ ನಂತರ ಜಿ.ಎಸ್.ಅಶ್ವಿನಿ ಮಲೆಬೆನ್ನೂರಿಗೆ ಪ್ರಚಾರಕ್ಕೆ ತೆರಳಿದರು.