ಅನಕ್ಷರಸ್ಥರು ಉದ್ಯಮ ನಡೆಸಲು ಬಾಹ್ಯಾಕಾಶ ವಿಜ್ಞಾನ ನೆರವು

ಗದಗ: ಓದಲು ಬರೆಯಲು ಬಾರದ ಅನಕ್ಷರಸ್ಥ ವ್ಯಕ್ತಿ ಕೂಡ ತನ್ನ ದೈನಂದಿನ ಉದ್ಯಮವನ್ನು ಸುಸೂತ್ರವಾಗಿ ನಡೆಸಲು ಬಾಹ್ಯಾಕಾಶ ವಿಜ್ಞಾನ ನೆರವಾಗಿದೆ ಎಂದು ಇಸ್ರೊ ಮಾಜಿ ಅಧ್ಯಕ್ಷ ಎ.ಎಸ್‌. ಕಿರಣ್‌ ಕುಮಾರ್‌ ಹೇಳಿದರು.

ಬಾಹ್ಯಾಕಾಶ ವಿಜ್ಞಾನದಿಂದ ಯಾವ ಜಾಗದಲ್ಲಿ ಸೈಕ್ಲೋನ್‌ ಬರುತ್ತದೆ,ಯಾವಾಗ ಬರುತ್ತದೆ ಎಂಬುದನ್ನು ಮೊದಲೇ ತಿಳಿದುಕೊಳ್ಳಬಹುದಾಗಿದೆ. ಇದರಿಂದ ಸಾವಿರಾರು ಜನರ ಜೀವರಕ್ಷಣೆ ಆಗಿದೆ. ಉಪಗ್ರಹಗಳ ನೆರವಿನಿಂದ ಮೀನಿನ ಆಹಾರ ಸರಪಳಿ ಹುಡುಕಿ ಯಾವ ಜಾಗದಲ್ಲಿ ಮೀನು ಸಿಗುತ್ತದೆ ಎಂಬುದನ್ನು ನಿಖರವಾಗಿ ತಿಳಿಸಲು ಸಾಧ್ಯವಾಗಿದೆ. ನಮ್ಮ ದೇಶದಲ್ಲಿ 7500 ಕಿ.ಮೀ.ಕರಾವಳಿ ಪ್ರದೇಶ, ಲಕ್ಷಾಂತರ ಮೀನುಗಾರಿದ್ದು, ಬಾಹ್ಯಾಕಾಶ ವಿಜ್ಞಾನದಿಂದ ವರ್ಷಕ್ಕೆ 15 ಸಾವಿರ ಕೋಟಿ ಇಂಧನ ವೆಚ್ಚ ಕಡಿಮೆ ಆಗಿದೆ. ಅದೇರೀತಿ, ನಾವಿಕ್‌ ತಂತ್ರಜ್ಞಾನದಿಂದ ಅವರಿಗೆ ಸಾಕಷ್ಟು ಅನುಕೂಲ ಆಗಿದೆ ಎಂದರು.

ಇಸ್ರೊ ವಿಜ್ಞಾನಿ ಆರ್‌.ವಿ. ನಾಡಗೌಡ ಮಾತನಾಡಿ, ಬಾಹ್ಯಾಕಾಶ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ ಹೇರಳ ಅವಕಾಶಗಳಿವೆ. ಸದ್ಯ ಬಾಹ್ಯಾಕಾಶ ಉದ್ಯಮ ₹40 ಲಕ್ಷ ಕೋಟಿಗಳಷ್ಟಿದ್ದು, ಇದರಲ್ಲಿ ಭಾರತದ ಪಾಲು ಶೇ.2ರಷ್ಟು ಮಾತ್ರ. ಬಾಹ್ಯಾಕಾಶ ವಿಜ್ಞಾನ ಮತ್ತು ತಂತ್ರಜ್ಞಾನ ಕ್ಷೇತ್ರಕ್ಕೆ ಸಂಬಂಧಿಸಿದಂತೆ ಸುಮಾರು 650 ಕೈಗಾರಿಕೆಗಳು ತೊಡಗಿಸಿಕೊಂಡಿವೆ. ಇವೆಲ್ಲವೂ ಇಸ್ರೊ ಸಂಸ್ಥೆ ಅವಲಂಬಿಸಿವೆ. ಆದರೆ, ಅವಕಾಶಗಳು ವಿಫುಲವಾಗಿರುವುದರಿಂದ ಯುವಜನರು ಬಾಹ್ಯಾಕಾಶ ಕ್ಷೇತ್ರದಲ್ಲಿ ಆಸಕ್ತಿ ತಳೆದು ಇದರ ಸದುಯೋಗ ಪಡೆದರೆ ದೇಶ ಅಭಿವೃದ್ಧಿ ಸಾಧಿಸುತ್ತದೆ ಎಂದರು.

ಚಂದ್ರಯಾನ–3 ಯಶಸ್ಸಿನ ನೆನಪಿನಲ್ಲಿ ಬಾಹ್ಯಾಕಾಶ ದಿನ ಆಚರಿಸಲಾಗುತ್ತಿದೆ. ಚಂದ್ರಯಾನ–3 ಮುಗಿದಿದೆ. ಮುಂದೇನು ಮಾಡಬೇಕು ? ಇಂತಹ ಇನ್ನೂ ನೂರಾರು ಹೊಸ ಹೊಸ ಯೋಜನೆಗಳಿಗೆ ಈ ಕಾರ್ಯಕ್ರಮ ಸ್ಫೂರ್ತಿ ಆಗಬೇಕು. ಅದಕ್ಕಾಗಿ ಯುಜನರು ಸಜ್ಜಾಗಬೇಕು ಎಂದು ತಿಳಿಸಿದರು.