ಐಟಾದಿಂದ ವಿಶೇಷ ಇಫ್ತಾರ್‌ ಕೂಟ

ಭಟ್ಕಳ: ಇಲ್ಲಿನ ಆಲ್ ಇಂಡಿಯಾ ಐಡಿಯಲ್ ಟೀಚರ್ಸ್ ಅಸೋಸಿಯೇಶನ್ (ಐಟಾ) ಶಾಖೆಯಿಂದ ರಮಜಾನ್ ಕುರಿತು ಇಫ್ತಾರ್ ಕಾರ್ಯಕ್ರಮ ಆಯೋಜಿಸಲಾಯಿತು.ಈ ಸಂದರ್ಭದಲ್ಲಿ ಮಾತಾನಾಡಿದ ಭಟ್ಕಳ ತಾಲೂಕು ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷ ಎಂ.ಎನ್. ನಾಯ್ಕ, ಉಪವಾಸವು ಬಡವ-ಶ್ರೀಮಂತ ಎಂಬ ಭೇದವನ್ನು ನಿವಾರಿಸಲು ಸಹಾಯಕವಾಗುತ್ತದೆ. ಶ್ರೀಮಂತರಿಗೂ ಹಸಿವಿನ ಸಂಕಟ ಅರಿವಾಗಲು ಈ ತಿಂಗಳು ಒಂದು ಉಪಯುಕ್ತ ಅವಕಾಶ. ಭಟ್ಕಳದಲ್ಲಿ ಅಂಗಡಿ ಮಾಲಕರು ಮತ್ತು ನೌಕರರು ಸಹಭಾಗಿಯಾಗಿ ಉಪವಾಸ ವೃತ ಪಾಲಿಸುತ್ತಿದ್ದಾರೆ ಎಂದು ಅವರು ಹೇಳಿದರು.

ಇಫ್ತಾರ್ ಸಂದೇಶ ನೀಡಿದ ಐಟಾ ರಾಜ್ಯಾಧ್ಯಕ್ಷ ಮುಹಮ್ಮದ್ ರಝಾ ಮಾನ್ವಿ, ಅಂತರಂಗ ಶುದ್ಧಿ ಮತ್ತು ಆತ್ಮ ನಿಯಂತ್ರಣ ಮಾನವನಿಗೆ ಅತ್ಯಗತ್ಯ. ಉಪವಾಸದ ಮೂಲಕ ನಾವು ಇದನ್ನು ಸಾಧಿಸಬಹುದು. ಪವಿತ್ರ ಕುರ್‌ಆನ್ ಅವತೀರ್ಣಗೊಂಡ ತಿಂಗಳು ರಮಜಾನ್ ಆಗಿದ್ದು, ಇದು ಅತ್ಯಂತ ಸರಳ ಭಾಷೆಯಲ್ಲಿದೆ. ಇದನ್ನು ಸಾಮಾನ್ಯ ವ್ಯಕ್ತಿಯೂ ಅರ್ಥೈಸಿಕೊಳ್ಳಬಹುದಾಗಿದೆ. ಇದು ಕೇವಲ ಮುಸ್ಲಿಮರ ಗ್ರಂಥವಲ್ಲ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಐಟಾದ ತಾಲೂಕು ಅಧ್ಯಕ್ಷ ಸಾದಿಕ್ ಅಹಮದ್, ಉಪಾಧ್ಯಕ್ಷ ಮುತಾಹಿರ್ ಶೇಖ್, ಕಾರ್ಯದರ್ಶಿ ಮುಷ್ತಾಖ್ ಅಹಮದ್ ಸೈಯದ್, ಮಹಿಳಾ ವಿಭಾಗದ ಸಂಚಾಲಕಿ ಸಿ.ಆರ್.ಪಿ. ಮುನಿರಾ ಖಾನಂ, ರಾಜ್ಯ ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷ ಎಂ.ಎನ್. ನಾಯ್ಕ ಅವರಿಗೆ ಶಾಲು ಹೊದಿಸಿ ಗೌರವಿಸಿದರು.