ರಾಜ್ಯಮಟ್ಟದ ವಾಲಿಬಾಲ್‌: ಮಂಗಳೂರು ಚಾಂಪಿಯನ್‌

ಯಲ್ಲಾಪುರ: ಗೋರ್ಸಗದ್ದೆಯ ವರಸಿದ್ಧಿವಿನಾಯಕ ಸ್ಪೋರ್ಟ್ಸ್ ಕ್ಲಬ್, ಹಾಸಣಗಿ ಮತ್ತು ಕಂಪ್ಲಿಯ ಗ್ರಾಪಂ, ಉಮ್ಮಚಗಿಯ ಶ್ರೀಮಾತಾ ವಿ.ಸೌ.ಸ. ಸಂಘ, ವಿವಿಧ ದಾನಿಗಳ ಹಾಗೂ ಪ್ರಾಯೋಜಕರ ಸಂಯುಕ್ತ ಆಶ್ರಯದಲ್ಲಿ ತಾಲೂಕಿನ ಹಾಸಣಗಿ ಬಳಿಯ ಒಳ್ಳೇಸರದ ಕ್ರೀಡಾಂಗಣದಲ್ಲಿ ಮಾ. ೧೫ರಂದು ನಡೆದ ರಾಜ್ಯ ಮಟ್ಟದ ಹೊನಲು ಬೆಳಕಿನ ವಾಲಿಬಾಲ್ ಪಂದ್ಯಾವಳಿಯಲ್ಲಿ ವರಸಿದ್ಧಿವಿನಾಯಕ ವಾರಿಯರ್ಸ್ ಗೋರ್ಸಗದ್ದೆ ಫ್ರಾಂಚೈಸಿಯ ಮಂಗಳೂರು ತಂಡ ಚಾಂಪಿಯನ್ ಆಗಿ ಆಯ್ಕೆಗೊಂಡಿತು. ಮಂಚೀಕೇರಿಯ ಶ್ರೀಸಾಯಿ ಪ್ರಾಂಚೈಸಿಯ ರೈಲ್ವೇಸ್ ತಂಡ ದ್ವಿತೀಯ, ಒಳ್ಳೇಸರದ ಶ್ರೀನಾಗ ಸ್ವರ್ಣಯಕ್ಷಿ ಪ್ರಾಂಚೈಸಿಯ ಕುಮಟಾದ ಬರ್ಗಿ ತಂಡ ತೃತೀಯ, ಮಂಚೀಕೇರಿಯ ಶ್ರೀ ಮಹಿಷಾಸುರಮರ್ದಿನಿ ಪ್ರಾಂಚೈಸಿಯ ಆಳ್ವಾಸ್ ತಂಡ ಚತುರ್ಥ ಸ್ಥಾನ ಪಡೆದವು.