ಸಿಪಿ ಬಜಾರದಲ್ಲಿ ಪಾರ್ಕಿಂಗ್‌ ವ್ಯವಸ್ಥೆಗೆ ಕಟ್ಟುನಿಟ್ಟಿನ ಕ್ರಮ

ಶಿರಸಿ: ಜನದಟ್ಟಣೆಯಿಂದ ಕೂಡಿರುವ ನಗರದ ಸಿಪಿ ಬಜಾರದಲ್ಲಿ ಒಂದೂವರೆ ತಾಸಿಗಿಂತ ಹೆಚ್ಚು ವಾಹನ ಪಾರ್ಕಿಂಗ್ ಮಾಡಿದರೆ ವಾಹನವನ್ನು ಪೊಲೀಸರು ವಶಪಡಿಸಿಕೊಳ್ಳಲಿದ್ದು, ವಾಹನ ಮಾಲೀಕರು ತಮ್ಮ ವಾಹನವನ್ನು ಸಂಚಾರಿ ಪೊಲೀಸ್ ಠಾಣೆಗೆ ತೆರಳಿಯೇ ಬಿಡಿಸಿಕೊಳ್ಳಬೇಕಾಗಲಿದೆ.

ಇಲ್ಲಿಯ ಜಿ.ಜಿ.ಹೆಗಡೆ ಕಡೆಕೋಡಿ ಶಾಸಕ ಭೀಮಣ್ಣ ನಾಯ್ಕ ಅವರಿಗೆ ಚೆನ್ನಪಟ್ಟಣ ಬಜಾರಿನಲ್ಲಿ ಉಂಟಾಗುತ್ತಿರುವ ವಾಹನ ದಟ್ಟಣೆ ನಿಯಂತ್ರಿಸಲು ಪೊಲೀಸ್ ಇಲಾಖೆ ಹೆಣಗಾಡುತ್ತಿರುವ ಬಗ್ಗೆ ವಿವರಿಸಿದರು. ನಗರದ ಉಳಿದ ರಸ್ತೆಗಳಂತೆ ಇಕ್ಕಟ್ಟಾಗೇ ಇದ್ದ ಸಿಪಿ ಬಜಾರದ ರಸ್ತೆ ಕೆಲ ವರ್ಷಗಳ ಹಿಂದೆ ವಿಸ್ತರಿಸಲಾಗಿದೆ. ನಗರದ ವಾಣಿಜ್ಯ ಪ್ರದೇಶವೂ ಇದಾಗಿರುವುದರಿಂದ ಪೊಲೀಸ್ ಇಲಾಖೆ ವಾಹನ ಪಾರ್ಕಿಂಗ್‌ಗೂ ಮಾರ್ಕಿಂಗ್ ಮಾಡಿದೆ. ಆದರೆ, ನಗರದ ನಟರಾಜ ರಸ್ತೆ, ಶ್ರದ್ಧಾನಂದ ಗಲ್ಲಿ ಸೇರಿದಂತೆ ಎಲ್ಲ ಕಡೆ ಪಾರ್ಕಿಂಗ್ ಮಾಡಬೇಕಾದ ವಾಹನ ಚೆನ್ನಪಟ್ಟಣ ಬಜಾರಕ್ಕೆ ತಂದು ನಿಲ್ಲಿಸಿ ಹೋಗಲಾಗುತ್ತಿದೆ. ಇದರಿಂದ ಇಲ್ಲಿಯ ಅಂಗಡಿಗಳಿಗೆ ಬರುವ ಸಾರ್ವಜನಿಕರ ವಾಹನ ಪಾರ್ಕಿಂಗ್ ಮಾಡಲು ಸಾಧ್ಯವಾಗದೇ ರಸ್ತೆ ಮೇಲೆ ನಿಲ್ಲಿಸಿ ಸಾಮಾನು ಸರಂಜಾಮು ಖರೀದಿಸತೊಡಗುತ್ತಾರೆ. ವಾಹನ ಸಂಚಾರ ನಿಂತು ಪ್ರತಿ ದಿನ ಸಮಸ್ಯೆ ಆಗುತ್ತಿದೆ. ಕೆಲವರು ಚೆನ್ನ ಪಟ್ಟಣ ಬಜಾರದಲ್ಲಿ ಕಾರ್ ನಿಲ್ಲಿಸಿ ಕಾರವಾರ, ಹುಬ್ಬಳ್ಳಿಗೆ ತಮ್ಮ ಕೆಲಸ ಕಾರ್ಯಕ್ಕೂ ತೆರಳುತ್ತಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.

ಶಾಸಕ ಭೀಮಣ್ಣ ನಾಯ್ಕ ಅವರು ಈ ವೇಳೆ ಸ್ಥಳೀಯರೊಂದಿಗೆ ಚರ್ಚಿಸಿ, ಚೆನ್ನಪಟ್ಟಣ ಬಜಾರದಲ್ಲಿ ವರ್ತಕರಿಗೆ ಲಾರಿಗಳಿಂದ ಸಾಮಾನು ಸರಂಜಾಮುಗಳನ್ನು ಇಳಿಸಿಕೊಳ್ಳಲು ಐದು ಕಡೆ ಜಾಗ ಗುರುತಿಸಲಾಗಿತ್ತು. ಈ ಜಾಗದಲ್ಲಿ ಯಾವುದೇ ವಾಹನ ಪಾರ್ಕಿಂಗ್ ಗೆ ಅವಕಾಶ ಮಾಡಿಕೊಡದಿರಲು ಸೂಚಿಸಲಾಗಿದೆ. ಈ ಐದು ಸ್ಥಳಗಳಲ್ಲಿ ಇನ್ನು ಮುಂದೆಯೂ ಪಾರ್ಕಿಂಗ್ ಗೆ ಅವಕಾಶ ಮಾಡಿಕೊಡುವುದಿಲ್ಲ ಎಂದರು.

ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಜಗದೀಶ ಗೌಡ, ದೀಪಕ ದೊಡ್ಡೂರು, ಸಂತೋಷ ಪಂಡಿತ ಮತ್ತಿತರರು ಇದ್ದರು.