ವಿದ್ಯಾರ್ಥಿನಿಗೆ ಸಿಗದ ಸವಲತ್ತು: ನೊಂದು ಸಿಎಂಗೆ ಪತ್ರ

ರಾಮಕೃಷ್ಣ ದಾಸರಿ

ಕರ್ನಾಟಕದಲ್ಲಿಯೇ ಕನ್ನಡ ಶಾಲೆಗಳು ಕಣ್ಮುಚ್ಚುತ್ತಿರುವ ಈ ತರುಣದಲ್ಲಿ ಗಡಿನಾಡಿನಲ್ಲಿ ಐಸಿಯು ತಲುಪಿರುವ ಕನ್ನಡ ಶಾಲೆಗಳು ಒಂದೊಂದಾಗಿ ಕಣ್ಮರೆಯಾಗುತ್ತಿವೆ.

ಯಾಕೆ ಪತ್ರ ಏನು ಸಮಸ್ಯೆ ? : ರಾಯಚೂರು ಜಿಲ್ಲೆಯ ಪಕ್ಕದ ಆಂಧ್ರಪ್ರದೇಶದ ಕರ್ನೂಲು ಜಿಲ್ಲೆಯ ಆದೋನಿ ತಾಲೂಕಿನ ಬದಿನೇಹಾಳ ಗ್ರಾಮದ ರಜೀಯಾ ಬೇಗಂ ತಾನು ಹುಟ್ಟಿದ ಗ್ರಾಮದಲ್ಲಿರುವ ಗಡಿನಾಡು ಕನ್ನಡ ಶಾಲೆಯಲ್ಲಿ 1 ರಿಂದ 10 ನೇ ತರಗತಿಯವರೆಗೆ ಕನ್ನಡ ಮಾಧ್ಯಮದಲ್ಲಿ ಓದಿ ತೇರ್ಗಡೆಯಾಗಿದ್ದು, ಮುಂದಿನ ಹಂತದ ಶಿಕ್ಷಣಕ್ಕಾಗಿ ಕರ್ನಾಟಕ ರಾಜ್ಯದ ಚಿತ್ರದುರ್ಗ ಜಿಲ್ಲೆಯ ವಿಶ್ವಮಾನವ ಸಂಯುಕ್ತ ಪದವಿ ಪೂರ್ವ ಶಿಕ್ಷಣ ಪಡೆದು ಪದವಿಗಾಗಿ ಅಲ್ಲಿಯೇ ಇರುವ ಸರ್ಕಾರಿ ವಿಜ್ಞಾನ ಕಾಲೇಜನ್ನು ಸೇರಿದ್ದಾಳೆ. ವಸತಿಗಾಗಿ ಅಲ್ಪಸಂಖ್ಯಾತರ ವಸತಿ ನಿಲಯಕ್ಕೆ ಅರ್ಜಿ ಸಲ್ಲಿಸಿದ್ದು, ತಾಂತ್ರಿಕ ಸಮಸ್ಯೆಯಿಂದ ಅದು ಸ್ವೀಕಾರಗೊಂಡಿಲ್ಲ. ಈ ವಿದ್ಯಾರ್ಥಿನಿ ಆಂಧ್ರಕ್ಕೆ ಸೇರಿದವಳಾಗಿದ್ದರಿಂದ ಅಲ್ಲಿಯ ಆದಾಯ-ಜಾತಿ ಪ್ರಮಾಣ ಪತ್ರಗಳು ರಾಜ್ಯದಲ್ಲಿ ಪರಿಗಣಿಸಲು ಸಾಧ್ಯವಾಗದ ಕಾರಣಕ್ಕೆ ವಸತಿ ನಿಲಯ ಸಿಗದೇ ತೀವ್ರ ಸಮಸ್ಯೆ ಅನುಭವಿಸುತ್ತಿದ್ದಾಳೆ. ರಜೀಯಾ ಬೇಗಂ ಅವರ ತಂದೆ-ತಾಯಿ ಅಲೆಮಾರಿಗಳಾಗಿರುವ ಕಾರಣಕ್ಕೆ ಬೆಂಗಳೂರಿನಲ್ಲಿ ದುಡಿಯುತ್ತಿದ್ದು, ಚಿತ್ರದುರ್ಗದಲ್ಲಿ ಪ್ರಥಮ ವರ್ಷದ ಪದವಿಯಲ್ಲಿ ಪ್ರವೇಶ ಪಡೆದಿರುವ ಈ ಬಡ ವಿದ್ಯಾರ್ಥಿನಿ, ಕನ್ನಡ ಭಾಷೆಯ ಮೇಲಿನ ಅಭಿಮಾನದಿಂದ ಕನ್ನಡದಲ್ಲಿ ಓದಿದ ಪಾಪಕ್ಕೆ ಇಂದು ಕರ್ನಾಟಕ ನೆಲದಲ್ಲಿ ಸವಲತ್ತಿನಿಂದ ವಂಚಿತಗೊಂಡಿದ್ದಾಳೆ.

ರಾಯಚೂರು ಪಕ್ಕದ ತೆಲಂಗಾಣ ರಾಜ್ಯದ ನಾರಾಯಣಪೇಟೆ, ಹೈದರಾಬಾದ್, ಮೆದಕ್ ಹಾಗೂ ಆಂಧ್ರಪ್ರದೇಶ ರಾಜ್ಯದ ಕರ್ನೂಲ್, ಅನಂತಪುರ ಈ ಐದು ಜಿಲ್ಲೆಗಳಲ್ಲಿ ಸುಮಾರು 20 ಸಾವಿರಕ್ಕು ಹೆಚ್ಚು ವಿದ್ಯಾರ್ಥಿಗಳು ಕನ್ನಡ ಮಾಧ್ಯಮದಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದಾರೆ. 10 ನೇ ತರಗತಿವರೆಗೆ ಕನ್ನಡ ಮಾಧ್ಯಮದಲ್ಲಿ ಅಭ್ಯಾಸ ಮಾಡಿ ಮುಂದೆ ಕರ್ನಾಟಕದಲ್ಲಿ ಹೆಚ್ಚಿನ ವ್ಯಾಸಂಗಕ್ಕೆ ಬರುವ ಮಕ್ಕಳಿಗೆ ರಾಜ್ಯದಲ್ಲಿ ವಿವಿಧ ಕೋರ್ಸ್, ಸವಲತ್ತು ಹಾಗೂ ಗಡಿನಾಡು ಕೋಠಾದಡಿ ಪ್ರವೇಶ ಸಿಗುತ್ತಿಲ್ಲ.

ಇಂದು ಬಾಲಕಿ ರಜೀಯಾ ಬೇಗಂ ಅನುಭವಿಸುತ್ತಿರುವ ಸಮಸ್ಯೆಯಂತಹ ಹಲವಾರು ತೊಂದರೆಗಳನ್ನು ಗಡಿನಾಡಿನಲ್ಲಿ ಕನ್ನಡ ಮಾಧ್ಯಮದಲ್ಲಿ ಓದಿದ ನೂರಾರು ವಿದ್ಯಾರ್ಥಿಗಳು ಎದುರಿಸುತ್ತಿದ್ದಾರೆ. ಈ ತಾಂತ್ರಿಕ ಸಮಸ್ಯೆಯನ್ನು ಕರ್ನಾಟಕ ರಾಜ್ಯ ಸರ್ಕಾರ ಗಂಭೀರವಾಗಿ ಪರಿಗಣಿಸಬೇಕು. ಗಡಿನಾಡು ಪ್ರಾಂತ್ಯದಲ್ಲಿ ಮುಚ್ಚಿ ಹೋಗುತ್ತಿರುವ ಕನ್ನಡ ಶಾಲೆಗಳನ್ನು, ಕನ್ನಡವನ್ನು ಉಳಿಸಿ-ಬೆಳೆಸಬೇಕು ಎಂದು ಮುಖ್ಯಮಂತ್ರಿಗಳಲ್ಲಿ ಪ್ರಾರ್ಥಿಸಲಾಗುವುದು.-ಅಮರ ದೀಕ್ಷಿತ್‌ ಕೃಷ್ಣ, ಉಪಾಧ್ಯಕ್ಷ, ಗಡಿನಾಡು ಕನ್ನಡ ಸಂಘ, ಕೃಷ್ಣ ಗ್ರಾಮ, ನಾರಾಯಣಪೇಟೆ ಜಿಲ್ಲಾ, ತೆಲಂಗಾಣ