ಪಕ್ಷಿಗಳಿಗೆ ಬೇಸಿಗೆಯಲ್ಲಿ ನೀರುಣಿಸುವ ವಿದ್ಯಾರ್ಥಿಗಳು

ಗೋಕರ್ಣ: ಇಲ್ಲಿನ ವಿದ್ಯಾರ್ಥಿಗಳು ರಜಾ ಅವಧಿಯಲ್ಲಿ ಶಾಲಾ ಆವಾರಕ್ಕೆ ಬರುವ ಪಕ್ಷಿಗಳಿಗೆ ನೀರು, ಆಹಾರ ಇಟ್ಟು ಗಮನ ಸೆಳೆದಿದ್ದಾರೆ.

ಸುಂದರ ಪ್ರಕೃತಿಯ ಮಡಿಲಿನಲ್ಲಿರುವ ಈ ಪ್ರೌಢಶಾಲೆಯ ಸುತ್ತ ಅರಣ್ಯ ಪ್ರದೇಶವಿದೆ. ಪಕ್ಷಿಗಳು ಇಲ್ಲಿಗೆ ನಿತ್ಯ ಭೇಟಿ ನೀಡುತ್ತವೆ. ಶಾಲಾ ಅವಧಿಯಲ್ಲಿ ಏನಾದರೂ ಆಹಾರ ನೀಡುವ ಪರಿಪಾಠವಿದೆ. ಆದರೆ ರಜಾ ಅವಧಿಯ ಜೊತೆ ಬೇಸಿಗೆಗೆ ನೀರಿನ ಕೊರತೆಯಿಂದ ಪಕ್ಷಿಗಳು ಪರಿತಪಿಸುವುದನ್ನು ತಪ್ಪಿಸಲು ವಿಜ್ಞಾನ ಶಿಕ್ಷಕ ಶ್ರೀನಿವಾಸ ನಾಯಕ ಮಾರ್ಗದರ್ಶನದಲ್ಲಿ ವಿದ್ಯಾರ್ಥಿಗಳು ಶಾಲಾ ಆವರಣದಲ್ಲಿ ಎತ್ತರದಲ್ಲಿ ನೀರಿನ ಪಾತ್ರೆ ಇಡುತ್ತಾರೆ. ಜೊತೆಗೆ ಧಾನ್ಯ ಹಾಕುತ್ತಾರೆ. ಇದರಿಂದ ಪಕ್ಷಿಗಳಿಗೆ ಆಹಾರ, ನೀರು ಎರಡನ್ನೂ ಒದಗಿಸಿಕೊಂಡಂತಾಗಿದೆ. ಈ ಕಾರ್ಯಕ್ಕೆ ಮುಖ್ಯಶಿಕ್ಷಕರು ಹಾಗೂ ಶಿಕ್ಷಕ ವೃಂದವರು ಸಹಕಾರ ನೀಡಿದ್ದಾರೆ.