ದಾವಣಗೆರೆಯಲ್ಲಿ ದಿಢೀರ್‌ ಮಳೆ: ವ್ಯಾಪಾರಿಗಳು ಕಂಗಾಲು

ಕನ್ನಡಪ್ರಭ ವಾರ್ತೆ ದಾವಣಗೆರೆ

ಸಾಮಾನ್ಯವಾಗಿ ನಗರದ ಹಳೆ ಪಿಬಿ ರಸ್ತೆಯಲ್ಲಿ ಪ್ರತಿ ಹಬ್ಬಗಳಿಗೆ ವ್ಯಾಪಾರ ಮಾಡುತ್ತಿದ್ದ ಜನರನ್ನು ಪಾಲಿಕೆಯಿಂದ ಇಲ್ಲಿನ ಶ್ರೀ ಬೀರಲಿಂಗೇಶ್ವರ ದೇವಸ್ಥಾನದ ಮೈದಾನಕ್ಕೆ ಸ್ಥಳಾಂತರ ಮಾಡಿತ್ತು. ಭಾನುವಾರ ಮಧ್ಯಾಹ್ನದವರೆಗೂ ನೆಮ್ಮದಿಯಿಂದ ವ್ಯಾಪಾರ ಮಾಡುತ್ತಿದ್ದ ಬಡ ವ್ಯಾಪಾರಿಗಳಿಗೆ ಅತ್ತ ದೇವಸ್ಥಾನದ ಮೈದಾನಕ್ಕೆ ಸ್ಥಳಾಂತರಿಸಲು ಸ್ವತಃ ಸಂಚಾರ ಪೊಲೀಸರು ಮುಂದೆ ನಿಂತಿದ್ದರೆ, ರಾತ್ರಿ ಬಡ ವ್ಯಾಪಾರಸ್ಥರು ಹಾಗೂ ಸಾರ್ವಜನಿಕರು ಮಳೆ, ಕೆಸರಿನಲ್ಲಿ ಪರದಾಡುತ್ತಿದ್ದರೆ ಕೇಳುವವರೂ ಇಲ್ಲ ಎನ್ನುವ ಸ್ಥಿತಿ ಇತ್ತು.

ನೋಡ ನೋಡುತ್ತಿದ್ದಂತೆಯೇ ಸುರಿಯಲಾರಂಭಿಸಿದ ಮಳೆಯು ಬಡ ವ್ಯಾಪಾರಸ್ಥರ ಒಂದಿಷ್ಟು ದುಡಿಮೆಯ ಆಸೆಗೆ ತಣ್ಣೀರೆರೆಯಿತು. ಸಾಲ ಮಾಡಿ ತಂದಿದ್ದ ಸಾವಿರಾರು ರು. ಬಗೆಬಗೆಯ ಹೂವು ಮಳೆಯ ಹೊಡೆತಕ್ಕೆ, ಮೈದಾನದ ಮಣ್ಣು, ಮಳೆ ನೀರಿನಲ್ಲಿ ರಾಡಿಯಾದವು. ಅನಿರೀಕ್ಷಿತ ಮಳೆ ತಂದ ಆಪತ್ತಿನಿಂದ ಬಡ ವ್ಯಾಪಾರಸ್ಥರು, ರೈತರು ಏನು ಮಾಡಬೇಕೆಂಬುದೇ ತೋಚದೆ, ಮಳೆಯಿಂದ ರಕ್ಷಣೆಯನ್ನೂ ಪಡೆಯಲಾಗದೇ, ತಾವು ತಂದ ಸರಕನ್ನು ರಕ್ಷಿಸಿಕೊಳ್ಳಲು ಪರದಾಡುತ್ತಿದ್ದ ದೃಶ್ಯಕ್ಕೆ ಖರೀದಿಗೆಂದು ಹೋಗಿದ್ದ ಜನರು ಸಹ ಮರುಗಿದರು.

ಬಡ ವ್ಯಾಪಾರಸ್ಥರು, ರೈತರನ್ನು ಕನಿಷ್ಠ ಸೌಲಭ್ಯಗಳು, ರಕ್ಷಣೆಯೂ ಇಲ್ಲದ ಕಡೆಗೆ ಸ್ಥಳಾಂತರಿಸುವುದು ಸರಿಯಲ್ಲ. ಸೋಮವಾರದಿಂದ ಹಳೆ ಪ್ರವಾಸಿ ಮಂದಿರದ ಬಳಿಯೇ ವ್ಯಾಪಾರಕ್ಕೆ ಅವಕಾಶ ಮಾಡಿಕೊಡಿ. ಆ ಮಕ್ಕಳು, ವಯೋವೃದ್ಧರು, ಗರ್ಭಿಣಿ, ಬಾಣಂತಿಯರು ಇಡೀ ಕುಟುಂಬ ಸಮೇತ ಒಂದಿಷ್ಟು ದುಡಿಮೆ ಮಾಡಿಕೊಳ್ಳಲು ಬಂದಿದ್ದಾರೆ. ಅಂತಹವರಿಗೆ ಅನ್ಯಾಯವಾಗಬಾರದು ಎಂದು ಹಬ್ಬದ ಖರೀದಿಗೆ ಹೋಗಿದ್ದ ಸಾರ್ವಜನಿಕರು, ವಿಶೇಷವಾಗಿ ಮಹಿಳೆಯರು ಜಿಲ್ಲಾಡಳಿತ, ಜಿಲ್ಲಾ ಪೊಲೀಸ್ ಇಲಾಖೆ ಹಾಗೂ ಪಾಲಿಕೆಗೆ ಒತ್ತಾಯಿಸಿದ್ದಾರೆ.