ಕಾರ್ಕಳದ ಸ್ವಸ್ತಿ ಕಾಮತ್‌ ಎಸ್ಸೆಸ್ಸೆಲ್ಸಿ ಟಾಪರ್‌

ಓದಿಗೆ ಸಹಕಾರಿಯಾದ ಉಚಿತ ಬಸ್‌ ಸೌಕರ್ಯ । ಈಕೆಗೆ ವೈದ್ಯೆಯಾಗುವ ಆಸೆ

ಕನ್ನಡಪ್ರಭ ವಾರ್ತೆ ಕಾರ್ಕಳಕಾರ್ಕಳ ಗಣಿತನಗರದ ಜ್ಞಾನಸುಧಾ ಹೈಸ್ಕೂಲಿನ ಸ್ವಸ್ತಿ ಕಾಮತ್ ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ರಾಜ್ಯಮಟ್ಟದಲ್ಲಿ 625/625 ಅಂಕಗಳಿಸಿ ರಾಜ್ಯಕ್ಕೆ ಮೊದಲ ಸ್ಥಾನ ಪಡೆದಿದ್ದಾರೆ. ಅವರು ಕಾರ್ಕಳ ತಾಲೂಕಿನ ಎಳ್ಳಾರೆ ಗ್ರಾಮದ ಸಂಪಿಗೆಕಟ್ಟೆಯ ಜನಾರ್ದನ್ ಕಾಮತ್ ಹಾಗೂ ಶಾಂತಿ ಕಾಮತ್ ದಂಪತಿ ಪುತ್ರಿ.ತಂದೆಯ ಜನ್ಮದಿನಕ್ಕೆ ಮಗಳ ಉಡುಗೊರೆ:

ಕಾರ್ಕಳ ತಾಲೂಕಿನ ಎಳ್ಳಾರೆಯಲ್ಲಿ ಬಸ್ ವ್ಯವಸ್ಥೆಯಿಲ್ಲದ ಕಾರಣ ಸ್ವಸ್ತಿ ಕಾಮತ್, ತನ್ನ ಅಜ್ಜಿ ಮನೆ ಕಾರ್ಕಳದ ಕಣಜಾರು ಗ್ರಾಮದ ಹಡಂಕೋಳಿ ಮೆಲ್ಮನೆಯಿಂದ ಶಾಲೆಗೆ ಹೋಗುತ್ತಿದ್ದರು. ಅಜ್ಜಿ ಮನೆಯ ಭಾಗದಲ್ಲಿ 2024-25ರಲ್ಲಿ ಸರ್ಕಾರಿ ಬಸ್ ಆರಂಭವಾಗಿತ್ತು. ಸದ್ಯ ಸ್ತ್ರೀಯರಿಗೆ ಉಚಿತ ಬಸ್‌ ಸೌಲಭ್ಯವಿದ್ದು, ಇದು ತನಗೆ ತುಂಬಾ ಸಹಕಾರವಾಗಿತ್ತು ಎನ್ನುತ್ತಾರೆ ಸ್ವಸ್ತಿ ಕಾಮತ್.

ತಂದೆ ಜನಾರ್ದನ್ ಕಾಮತ್ ಗೋಕರ್ಣದಲ್ಲಿ ಹೋಟೆಲ್ ಮ್ಯಾನೇಜರ್ ಆಗಿ ಕೆಲಸ ಮಾಡುತ್ತಿದ್ದು, ತಾಯಿ ಶಾಂತಿ ಕಾಮತ್ ಮಲ್ಲಿಗೆ ಕೃಷಿ ಮಾಡುತ್ತಾರೆ. ಬೆಳಗ್ಗಿನ ಜಾವ ಅಮ್ಮನ ಜೊತೆ 2 ಚೆಂಡು ಮಲ್ಲಿಗೆ ಹೂವನ್ನು ಕಟ್ಟಿ, ಬಳಿಕ ಶಾಲೆಗೆ ಹೋಗುತ್ತಿದ್ದಳು.