ಮಹದಾಯಿಗೆ ಅಡ್ಡಗಾಲು ಹಾಕಿದವರಿಗೆ ತಕ್ಕಪಾಠ ಕಲಿಸಿ

ಗಜೇಂದ್ರಗಡ: ಅಧಿಕಾರ ಕೈಯಲ್ಲಿದ್ದಾಗ ಬೊಮ್ಮಾಯಿ ಮಹದಾಯಿ ಹಾಗೂ ಕಳಸಾ ಬಂಡೂರಿ ಯೋಜನೆ ನೆನಪಿಗೆ ಬರಲಿಲ್ಲ, ಯೋಜನೆ ಅಡ್ಡಗಾಲು ಹಾಕಿ ಉತ್ತರ ಕರ್ನಾಟಕ್ಕೆ ಅನ್ಯಾಯ ಮಾಡಿ ಇಲ್ಲಿನ ಜನತೆಗೆ ಚೊಂಬು ನೀಡಿದ ಕೇಂದ್ರ ಸರ್ಕಾರಕ್ಕೆ ಚುನಾವಣೆಯಲ್ಲಿ ತಕ್ಕಪಾಠ ಕಲಿಸುವ ಸಮಯ ಬಂದಿದೆ ಎಂದು ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಹೇಳಿದರು.

ಮಹದಾಯಿ ಯೋಜನೆಗಾಗಿ ಪಾದಯಾತ್ರೆ ಮಾಡಿ ಪತ್ರ ಬರೆದ ಬೊಮ್ಮಾಯಿ ಅವರೇ ನೀವು ಸಿಎಂ ಆಗಿದ್ದಾಗ ಮಹದಾಯಿ ಹಾಗೂ ಕಳಸಾ ಯೋಜನೆ ನೆನಪಿಗೆ ಬರಲಿಲ್ಲವೇ. ಹಿಂದಿನ ಸಿಎಂ ಬೊಮ್ಮಾಯಿ ಹಾಗೂ ಕೇಂದ್ರ ಪ್ರಹ್ಲಾದ ಜೋಶಿ ಅವರಿಗೆ ೩೫ ವರ್ಷದ ಸುದೀರ್ಘ ಹೋರಾಟವಾಗಿರುವ ಮಹದಾಯಿ ಯೋಜನೆ ಜಾರಿ ಮಾಡಲು ಮುಂದಾಗಲಿಲ್ಲ. ಪರಿಣಾಮ ಕೇಂದ್ರ ಸರ್ಕಾರ ಮಹದಾಯಿ ಯೋಜನೆಗೆ ಅಡ್ಡಗಾಲು ಹಾಕಿ ಇಡೀ ಉತ್ತರ ಕರ್ನಾಟಕ ಹಾಗೂ ಇಲ್ಲಿನ ಜನರಿಗೆ ದ್ರೋಹ ಹಾಗೂ ಅನ್ಯಾಯ ಮಾಡಿದೆ.

ಬೊಮ್ಮಾಯಿ ಅವರ ಹೊಟ್ಟೆ ತುಂಬಿದೆ. ಜನತೆ ನೀಡಿರುವ ಶಾಸಕರ ಅಧಿಕಾರ ಬಿಡಲು ಸಿದ್ಧರಾಗಿರುವ ಅವರಿಗೆ ಅಧಿಕಾರ ನೀಡಬೇಡಿ. ಸಮಾಜ ಸೇವೆಯ ಕನಸು ಹೊತ್ತು ಬಂದಿರುವ ಆನಂದಸ್ವಾಮಿ ಗಡ್ಡದೇವರಮಠ ಅವರನ್ನು ಗೆಲ್ಲಿಸಿ ಎಂದರು.