ವಿನೂತನ ಕಲಿಕಾ ವಿಧಾನದಿಂದ ವಿದ್ಯಾರ್ಥಿಗಳ ಮನಮುಟ್ಟುತ್ತಿರುವ ಶಿಕ್ಷಕ ಕೆ.ಜಿ. ನಾಯ್ಕ

ಸಿದ್ದಾಪುರ: ತಾಲೂಕಿನ ನೇರ್ಲಮನೆಯ (ಗೋಳಿಮಕ್ಕಿ) ಸ.ಹಿ.ಪ್ರಾ. ಶಾಲೆಯ ಪ್ರಭಾರ ಮುಖ್ಯ ಶಿಕ್ಷಕರಾಗಿ ಸೇವೆ ಸಲ್ಲಿಸುತ್ತಿರುವ ಕೆ.ಜಿ. ನಾಯ್ಕ ವಿಶೇಷವಾದ ಕಲಿಕಾ ವಿಧಾನಗಳೊಂದಿಗೆ ಪಾಠ ಮಾಡುತ್ತ ವಿದ್ಯಾರ್ಥಿಗಳ ಮನಮುಟ್ಟುತ್ತಾ ಅಚ್ಚುಮೆಚ್ಚಿನ ಶಿಕ್ಷಕರಾಗಿದ್ದಾರೆ. ಬೆಳಗಿನ ಪ್ರಾರ್ಥನಾ ಸಭೆಯಲ್ಲಿ ಪ್ರತಿನಿತ್ಯ ಒಂದು ಪಕ್ಷಿಯ ಆಕಾರ, ಬಣ್ಣ, ಅದರ ಗೂಡು, ಮೊಟ್ಟೆಗಳ ವಿವರದ ಜೊತೆಗೆ ಇಡೀ ಜೀವನ ಚಿತ್ರಣವನ್ನು ಆ ಪಕ್ಷಿಯ ಚಿತ್ರದೊಂದಿಗೆ ವಿವರಿಸಲಾಗುತ್ತದೆ. ನಿತ್ಯ ಒಂದು ಔಷಧಿ ಸಸ್ಯದ ಸಚಿತ್ರ ಪರಿಚಯ ಹಾಗೂ ಉಪಯೋಗದ ವಿವರಗಳ ಮೂಲಕ ವಿದ್ಯಾರ್ಥಿಗಳು ತಮ್ಮ ಪರಿಸರದೊಂದಿಗಿನ ನಿಕಟ ಸಂಪರ್ಕ ಹೊಂದಿ ಪ್ರಾಯೋಗಿಕವಾಗಿ ರೂಢಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗುತ್ತಿದೆ.

ಪ್ರತಿನಿತ್ಯ ಪಾಲಕರು ತಮ್ಮ ಮಕ್ಕಳ ಮನೆಯ ಅಭ್ಯಾಸಕ್ಕೆ ಅಂಕ ನೀಡುವ ವಿನೂತನ ವಿಧಾನವನ್ನು ಅಳವಡಿಸಿದ್ದು ಬಹುತೇಕ ಫಲ ನೀಡುತ್ತಿದೆ. ಇದರಿಂದ ಮಕ್ಕಳನ್ನು ಗಮನಿಸುವಲ್ಲಿ ಪಾಲಕರ ಜವಾಬ್ದಾರಿ ಹೆಚ್ಚುತ್ತಿದೆ.

ಒಂದು ಘಟಕಕ್ಕೆ ಸಂಬಂಧಿಸಿದಂತೆ ಚಿತ್ರಗಳು ಹಾಗೂ ಮುಖ್ಯ ಅಂಶಗಳನ್ನು ಒಳಗೊಂಡ ಚಾರ್ಟ್ ಸಹಾಯದಿಂದ ಘಟಕದ ಬಗ್ಗೆ ವಿದ್ಯಾರ್ಥಿಗಳೇ ವಿವರಣೆ ನೀಡುವುದರಿಂದ ಹಾಗೂ ಕಲಿಕೋಪಕರಣ ಬಳಕೆಯಿಂದ ಸಮಗ್ರ ಅರ್ಥೈಸಿಕೊಳ್ಳುವಿಕೆ ಸಾಧ್ಯವಾಗುತ್ತಿದೆ.