ಕುರಿ ಸಾಕಣೆಯಲ್ಲಿ ನೆಮ್ಮದಿ ಕಂಡುಕೊಂಡ ಶಿಕ್ಷಕ ಶೇಖರ ಮೇಟಿ

ಹನುಮಸಾಗರ: ಪಟ್ಟಣದ ವಿದ್ಯಾನಗರದಲ್ಲಿ ವಾಸಿಯಾಗಿರುವ ಶಿಕ್ಷಕ ಶೇಖರ ಮೇಟಿ ಕುರಿ ಸಾಕಣೆಯಲ್ಲಿ ನೆಮ್ಮದಿ ಕಂಡುಕೊಂಡಿದ್ದಾರೆ.

ಸರ್ಕಾರಿ ನೌಕರಿ ಸೇರುವುದಕ್ಕಿಂತ ಮೊದಲು ೨೦೦೯ರಲ್ಲಿ ಖಾಸಗಿ ಶಿಕ್ಷಣ ಸಂಸ್ಥೆಯಲ್ಲಿ ಶಿಕ್ಷಕರಾಗಿ ಸೇವೆ ಆರಂಭಿಸಿದರು. ಇದರೊಂದಿಗೆ ಏನಾದರೂ ಕೃಷಿಗೆ ಸಂಬಂಧಿಸಿದ ಉಪಕಸುಬು ಆರಂಭಿಸಬೇಕು ಎಂದು ಮನೆಯವರೊಂದಿಗೆ ಚರ್ಚಿಸಿ, ಮನೆಯ ವರಾಂಡದಲ್ಲಿ ಅಟ್ಟಣಿಕೆ ಪದ್ಧತಿಯಲ್ಲಿ ಟಗರು ಸಾಕಾಣಿಕೆ ಆರಂಭಿಸಿದರು.

ಸಾಕಾಣಿಕೆ ಹೇಗೆ?: ಪ್ರತಿನಿತ್ಯ ಕೊಟ್ಟಿಗೆ ಸ್ವಚ್ಛಗೊಳಿಸಿ ಸ್ಯಾನಿಟೈಸರ್ ಮಾಡುವ ಜತೆಯಲ್ಲಿ ಸಮಯಕ್ಕೆ ಸರಿಯಾಗಿ ಲಸಿಕೆ ಹಾಕಿಸುತ್ತಾರೆ. ಒಂದು ವರ್ಷಕ್ಕೆ ಎರಡು ಬ್ಯಾಚ್‌ನಂತೆ ಟಗರುಗಳನ್ನು ಸಾಕಾಣಿಕೆ ಮಾಡುತ್ತಿದ್ದಾರೆ. ಒಂದು ಬ್ಯಾಚ್‌ಗೆ ೨೫ರಿಂದ ೩೦ ಮರಿಗಳನ್ನು ಸಾಕಲಾಗುತ್ತದೆ. ಸರಿಯಾದ ಸಮಯಕ್ಕೆ ಒಣ ಮೇವುಗಳಾದ ಶೇಂಗಾ ಹೊಟ್ಟು, ರಾಗಿ ಹುಲ್ಲು, ಪೌಷ್ಟಿಕಾಂಶಯುಕ್ತ ಸಾಂದ್ರೀಕೃತವಾದ ಮೆಕ್ಕೆಜೋಳ, ಗೋ, ಶೇಂಗಾ ಹಿಂಡಿ, ಸೋಯಾ ಹಿಂಡಿ ಹಾಗೂ ಹುರುಳಿಯನ್ನು ಕುರಿ ವಯಸ್ಸಿಗೆ ಮತ್ತು ದೇಹದ ಅಗತ್ಯಕ್ಕೆ ಅನುಗುಣವಾಗಿ ಉಣಬಿಡಿಸುತ್ತಾರೆ. ಜತೆಯಲ್ಲಿ ಶುದ್ಧ ಕುಡಿಯುವ ನೀರು ಒದಗಿಸುತ್ತಾರೆ. ವಾರದಲ್ಲಿ ಎರಡು ದಿನ ವೈದ್ಯರ ಮಾರ್ಗದರ್ಶನ ಮೇರೆಗೆ ಲಿವರ್ ಟಾನಿಕ್ ಅನ್ನು ಹಾಕಲಾಗುತ್ತದೆ. ಮರಿಗಳಿಗೆ ಹೊರಗಡೆಯಿಂದ ಹಾಲನ್ನು ಖರೀದಿಸಿ ಹಾಲುಣ್ಣಿಸುತ್ತಾರೆ. ಇಷ್ಟೆಲ್ಲ ಮಾಡಿದಾಗ ಮಾರುಕಟ್ಟೆಯಲ್ಲಿ ಉತ್ತಮವಾದ ಲಾಭ ಪಡೆಯಲು ಸಾಧ್ಯವಾಗುತ್ತದೆ ಎನ್ನುತ್ತಾರೆ.