ಶಿಲಾಮಠಕ್ಕೆ ಆನೆ ಬೇಕೆಂಬ 50 ವರ್ಷಗಳ ಬೇಡಿಕೆ ಈಡೇರಿದೆ

- ಎಡೆಯೂರು ಕ್ಷೇತ್ರದ ರೇಣುಕಾ ಶಿವಾಚಾರ್ಯ ಶ್ರೀ ಸಂತಸ ।

ಭಾರತೀಯ ಸಂಸ್ಕೃತಿಯ ಧಾರ್ಮಿಕ ಕಾರ್ಯಗಳಲ್ಲಿ ಆನೆಗಳ ಬಳಸುವ ಪದ್ಧತಿ ಇದೆ. ಅದರಂತೆ ತಾವರೆಕೆರೆ ಶಿಲಾಮಠಕ್ಕೆ 50 ವರ್ಷಗಳ ಹಿಂದೆ ಆನೆಯನ್ನು ತರುವ ಮನವಿಯನ್ನು ಅಂದಿನ ಸರ್ಕಾರಕ್ಕೆ ಮಾಡಿದ್ದೆವು. ಕೆಲವು ಕಾರಣಗಳಿಂದ ಆನೆ ತರಲಾಗಿರಲಿಲ್ಲ. ಪ್ರಸ್ತುತವಾಗಿ ಕ್ಯೂಪ ಅಂಡ್ ಪೆಟಾ ಸಂಸ್ಥೆಯವರು ನಮ್ಮ ಮಠಕ್ಕೆ ರೋಬೋಟ್ ಆನೆಯನ್ನು ದಾನವಾಗಿ ನೀಡಿ, 50 ವರ್ಷಗಳ ಮಠದ ಕನಸು ನನಸಾಗಿಸಿದ್ದಾರೆ ಎಂದು ಎಡೆಯೂರು ಕ್ಷೇತ್ರದ ಶ್ರೀ ರೇಣುಕಾ ಶಿವಾಚಾರ್ಯ ಸ್ವಾಮೀಜಿ ಸಂತಸ ವ್ಯಕ್ತಪಡಿಸಿದರು.

ಪ್ರಸ್ತುತ ಕಾಡಿನಲ್ಲಿ ಪ್ರಾಣಿಗಳೇ ಮಾಯವಾಗುತ್ತಿವೆ. ಕಾಡುಪ್ರಾಣಿಗಳನ್ನು ಪಳಗಿಸುವುದು, ಸಾಕುವುದನ್ನು ಸರ್ಕಾರ ನಿಷೇಧಿಸಿದೆ. ಮಠಗಳಲ್ಲಿ ಆನೆಯನ್ನು ಸುರಕ್ಷಿತವಾಗಿ ಸಾಕಲು ಸಾಧ್ಯವಾಗುವುದಿಲ್ಲ. ಇದನ್ನು ಮನಗಂಡ ಕ್ಯೂಪ ಅಂಡ್ ಪೆಟಾ ಸಂಸ್ಥೆಯವರು ರಾಜ್ಯದ 4 ಮಠಗಳಿಗೆ ಇಂತಹ ರೋಬೋಟ್ ಆನೆಗಳನ್ನು ದಾನವಾಗಿ ನೀಡಿದ್ದಾರೆ ಎಂದರು.

ಈ ಗ್ರಾಮದಲ್ಲಿ ಗೋಶಾಲೆ ತೆರೆಯಬೇಕೆನ್ನುವುದು ಶ್ರೀಗಳ ಆಶಯವಾಗಿದೆ. ಅವರ ಸಲಹೆಯಂತೆ ಗ್ರಾಮದ ಸರ್ಕಾರಿ ಜಮೀನನ್ನು ಗುರುತಿಸಿ, ಮುಂದಿನ 15 ದಿನಗಳಲ್ಲಿ ಗೋಶಾಲೆ ಪ್ರಾರಂಭಿಸಲು ಮುಂದಾಗುತ್ತೇನೆ ಎಂದರು.

ಸಮಾರಂಭದಲ್ಲಿ ಬಿಳಕಿ ಹಿರೇಮಠದ ಶ್ರೀ ರಾಚೋಟೇಶ್ವರ ಶಿವಾಚಾರ್ಯ ಸ್ವಾಮಿಗಳು, ಶಿಲಾಮಠದ ಶ್ರೀ ಅಭಿನವ ಸಿದ್ದಲಿಂಗ ಶಿವಾಚಾರ್ಯ ಮಹಾಸ್ವಾಮಿಗಳು ಹಾಜರಿದ್ದರು.

- - -

ಅಲಂಕೃತ ರೋಬೋಟ್ ಆನೆಯನ್ನು ಗ್ರಾಮದ ಪ್ರಮುಖ ರಸ್ತೆಗಳಲ್ಲಿ ವಿವಿಧ ಜಾನಪದ ಕಲಾಮೇಳದೊಂದಿಗೆ ಮಠದ ಶ್ರೀಗಳು, ಅತಿಥಿ ಗಣ್ಯರೊಂದಿಗೆ ಭಕ್ತರ ಜೊತೆಯಲ್ಲಿ ಮೆರವಣಿಗೆ ನಡೆಸಲಾಯಿತು. ರೋಬೋಟ್ ಆನೆ ನೈಜ ಆನೆಯಂತೆಯೇ ಕಿವಿಯನ್ನು ಆಡಿಸುತ್ತಾ, ಕಣ್ಣುಗಳನ್ನು ಪಿಳಕಿಸುತ್ತಾ, ಸೊಂಡಿಲನ್ನು ಎತ್ತುವುದು, ಇಳಿಸುವುದನ್ನು ಮಾಡುತ್ತದೆ. ಮೆರವಣಿಗೆಯಲ್ಲಿ ಸಾಗಿ ಬರುವಾಗ ಗ್ರಾಮದ ಜನರು ರೋಬೋಟ್ ಆನೆಯ ಚಲನ-ವಲನಗಳನ್ನು ಕಂಡು ಬೆರಗಾದರು. ಈ ರೋಬೋಟ್ ಆನೆಯನ್ನು ನೋಡಲು ತಾವರೆಕೆರೆ ಗ್ರಾಮದ ಜನರು ಸೇರಿದಂತೆ ಸುತ್ತಮುತ್ತಲ ಗ್ರಾಮಗಳ ಜನರು ಬಂದು ವೀಕ್ಷಣೆ ಮಾಡಿ ಸಂತಸಪಟ್ಟರು.

ಚನ್ನಗಿರಿ ತಾಲೂಕಿನ ತಾವರೆಕೆರೆ ಶಿಲಾಮಠದಲ್ಲಿ ರೋಬೋಟ್ ಆನೆಯನ್ನು ಗಣ್ಯರು ಉದ್ಘಾಟಿಸಿದರು.