ಚುನಾವಣಾಧಿಕಾರಿಯೇ ಚುನಾವಣೆ ದಿನದಂದು ಗೈರು!

ಕನ್ನಡಪ್ರಭ ವಾರ್ತೆ ಹುಣಸೂರು

ಪಟ್ಟಣದ ಮಹಾಬೋಧಿ ಡಾ.ಬಿ.ಆರ್. ಅಂಬೇಡ್ಕರ್ ವಿವಿಧೋದ್ದೇಶ ಸಹಕಾರ ಸಂಘದ ನಿರ್ದೇಶಕರಿಂದ ಪ್ರತಿಭಟನೆ ನಡೆಸಿದ್ದು, ಈ ವೇಳೆ ಮಾತನಾಡಿದ ಸಂಘದ ಅಧ್ಯಕ್ಷಾಕಾಂಕ್ಷಿ ಪುಟ್ಟರಾಜು, ಮಹಾಬೋಧಿ ಡಾ.ಬಿ.ಆರ್. ಅಂಬೇಡ್ಕರ್ ವಿವಿಧೋದ್ದೇಶ ಸಹಕಾರ ಸಂಘದ 2025-30ನೇ ಸಾಲಿಗಾಗಿ 13 ಮಂದಿ ನಿರ್ದೇಶಕರು ಅವಿರೋಧವಾಗಿ ಆಯ್ಕೆಯಾಗಿದ್ದೇವೆ. ಅದರಂತೆ ಸಂಘದ ವರಿಷ್ಠರ ಆಯ್ಕೆಗಾಗಿ ತಾಲೂಕಿನ ಸಹಕಾರ ಇಲಾಖೆಯ ಸಹಾಯಕ ನಿಬಂಧಕರು ಇಲಾಖೆಯಲ್ಲಿ ಸಿಡಿಒ ಆಗಿ ಕರ್ತವ್ಯ ನಿರ್ವಹಿಸುತ್ತಿರುವ ಅಧಿಕಾರಿ ರಾಜಣ್ಣ ಅವರನ್ನು ಚುನಾವಣಾಧಿಕಾರಿಯಾಗಿ ನೇಮಿಸಿದ್ದು, ಮೇ 13ರ ಮಂಗಳವಾರ ಚುನಾವಣೆ ಎಂದು ನಿಗದಿಪಡಿಸಲಾಗಿತ್ತು. ಮಂಗಳವಾರ ಬೆಳಗ್ಗೆ 10ಕ್ಕೆ ನಾಮಪತ್ರ ಸಲ್ಲಿಸಲಾಗಿದೆ. ಅಧ್ಯಕ್ಷ ಸ್ಥಾನಕ್ಕಾಗಿ ನಾನು ಮತ್ತು ಉಪಾಧ್ಯಕ್ಷಸ್ಥಾನಕ್ಕಾಗಿ ಶಿವಯ್ಯ ನಾಮಪತ್ರ ಸಲ್ಲಿಸಿದ್ದು, ಎರಡೂ ಸ್ಥಾನಗಳಿಗೆ ನಾವಿಬ್ಬರೇ ನಾಮಪತ್ರ ಸಲ್ಲಿಸಿದ್ದೇವೆ. ನಾಮಪತ್ರ ಹಿಂತೆಗೆಯುವ ಅವಧಿಯೂ ಮುಗಿದ ನಂತರವೂ ಚುನಾವಣಾಧಿಕಾರಿ ಕಚೇರಿಗೆ ಬಾರದ ಕಾರಣ ತಾಲೂಕು ಸಹಕಾರ ನಿಬಂಧಕರಿಗೆ, ನಂತರ ಜಿಲ್ಲಾ ನಿಬಂಧಕರು, ಹುಣಸೂರು ಉಪವಿಭಾಗದ ಉಪವಿಭಾಗಾಧಿಕಾರಿ ಮುಂತಾದವರಿಗೆ ಮಾಹಿತಿ ನೀಡಲಾಯಿತು. ಇವರೆಲ್ಲರೂ ಕೈಚೆಲ್ಲಿದರು.

ಇದೀಗ ನಾವು ನಿಯಮಬದ್ದವಾಗಿ ನಾಮಪತ್ರ ಸಲ್ಲಿಸಿದ್ದು, ನಮ್ಮ ಆಯ್ಕೆಯನ್ನು ಇಲಾಖೆ ಪ್ರಕಟಿಸಬೇಕು ಮತ್ತು ಕರ್ತವ್ಯಲೋಪವೆಸಗಿರುವ ಅಧಿಕಾರಿಯನ್ನು ವಜಾಗೊಳಿಸಿ ಇಲಾಖಾ ತನಿಖೆ ನಡೆಸಬೇಕು. ಮುಂದಿನ 24 ಗಂಟೆಯೊಳಗೆ ಕ್ರಮವಹಿಸದಿದ್ದರೆ ಕಚೇರಿ ಮುಂಭಾಗ ನ್ಯಾಯ ಸಿಗುವವರೆಗೂ ಅನಿರ್ಧಿಷ್ಠಾವಧಿ ಪ್ರತಿಭಟನೆ ನಡಸಲಾಗುವುದು ಎಂದು ಎಚ್ಚರಿಸಿದರು.

ಜಿಲ್ಲಾ ಮಟ್ಟದ ಅಧಿಕಾರಿಗಳು ಕ್ರಮ ವಹಿಸಬೇಕು