ಸಮಾಜ ಸುಧಾರಕರ ತತ್ವಾದರ್ಶಗಳು ಎಲ್ಲರಿಗೂ ಮಾದರಿ

ರಾಮನಗರ: ಬಲಿಜ ಸಮುದಾಯದಲ್ಲಿ ಹುಟ್ಟಿದ ಸಮಾಜ ಸುಧಾರಕರ ತತ್ವಾದರ್ಶಗಳನ್ನು ತಮ್ಮ ಬದುಕಿನಲ್ಲಿ ಅಳವಡಿಸಿಕೊಂಡು ಮುನ್ನಡೆಯಬೇಕು ಎಂದು ನಗರಸಭಾ ಅಧ್ಯಕ್ಷ ಕೆ.ಶೇಷಾದ್ರಿ ಕರೆ ನೀಡಿದರು.

ನಮ್ಮ ಜನಾಂಗದ ಕಾಲಕ್ಞಾನ ಬರೆದ ಶ್ರೀ ಕೈವಾರ ತಾತಯ್ಯ, ಶ್ರೀ ಕೃಷ್ಣ ದೇವರಾಯ, ಅಕ್ಷರದಾತೆ ಸಾವಿತ್ರಿಬಾಯಿ ಪುಲೆ, ಜ್ಯೋತಿಬಾಪುಲೆ ಅವರು ಶೈಕ್ಷಣಿಕ ಕ್ಷೇತ್ರಕ್ಕೆ ಕೊಟ್ಟ ಕೊಡುಗೆ ಸ್ಮರಣೀಯ. ಅವರೆಲ್ಲರು ನಮ್ಮ ಸಮುದಾಯಕ್ಕಷ್ಟೇ ಸೀಮಿತವಾಗಿರದೆ, ಶೋಷಿತರ ಪರವಾಗಿ ಧ್ವನಿ ಎತ್ತುವ ಕೆಲಸ ಮಾಡಿದರು. ಈ ದಾರ್ಶನಿಕರ ಹೋರಾಟ, ತತ್ವಾದರ್ಶಗಳು ನಮಗೆಲ್ಲ ಆದರ್ಶವಾಗಿವೆ ಎಂದು ಹೇಳಿದರು.

ಜಿಲ್ಲಾ ಬಲಿಜ ಸಂಘದ ಕಾರ್ಯಾಧ್ಯಕ್ಷ ಚನ್ನಪಟ್ಟಣದ ಕಿಶೋರ್ ಮಾತನಾಡಿ, ಪ್ರತಿ ತಾಲೂಕಿನಲ್ಲಿ ಸಂಘಟನೆ ಮಾಡಿ ಜಿಲ್ಲಾ ಬಲಿಜ ಸಂಘ ರಚನೆ ಮಾಡಲಾಗಿದ್ದು, ಮೀಸಲಾತಿ, ಶಿಕ್ಷಣ ಕ್ಷೇತ್ರ , ಹಾಸ್ಟೆಲ್ ಸೇರಿದಂತೆ ಸಮುದಾಯದವರಿಗೆ ಸರ್ಕಾರಿ ಸವಲತ್ತುಗಳನ್ನು ತಲುಪಿಸುವ ನಿಟ್ಟಿನಲ್ಲಿ ಹೋರಾಟ ನಡೆಸಲಾಗುವುದು. ರಾಮನಗರದ ಪ್ರಮುಖ ರಸ್ತೆ ಅಥವಾ ವೃತ್ತಕ್ಕೆ ಕೈವಾರ ತಾತಯ್ಯ ಹೆಸರನ್ನಿಡಬೇಕೆಂದು ಸಂಘದ ಪರವಾಗಿ ನಗರಸಭಾಧ್ಯಕ್ಷ ಶಶಿ ಅವರಲ್ಲಿ ಮನವಿ ಮಾಡಿದರು.

ನಾಗರಾಭಿವೃದ್ಧಿ ಪ್ರಾಧಿಕಾರದ ಮಾಜಿ ಅಧ್ಯಕ್ಷ ಸಿಎನ್‌ಆರ್ ವೆಂಕಟೇಶ್ ಮಾತನಾಡಿ, ಬಲಿಜ ಸಮುದಾಯ ಶ್ರೇಷ್ಠ ಸಮುದಾಯಕ್ಕೆ ಸೇರಿದ್ದರೂ ಸಂಘಟನೆ ಕೊರತೆಯಿಂದ ಸಾಕಷ್ಟು ಹಿಂದುಳಿದಿದೆ. ಬಲಿಜ ಸಮಾಜ ಇದುವರೆಗೂ ಪೂರ್ಣಪ್ರಮಾಣದಲ್ಲಿ ಸಂಘಟಿತವಾಗಿಲ್ಲ. ಸಂಘಟಿತವಾದರೆ ಆರ್ಥಿಕ ಹಾಗೂ ಶೈಕ್ಷಣಿಕ, ರಾಜಕೀಯವಾಗಿ ಬಲಿಷ್ಠವಾಗಬಹುದು. ಸಮಾಜದ ಜನರನ್ನು ಮೇಲೆತ್ತಲು ಎಲ್ಲರೂ ಕೈಜೋಡಿಸಬೇಕು ಎಂದು ಹೇಳಿದರು.

ಕಾರ್ಯಕ್ರಮದಲ್ಲಿ ಸಮಗ್ರ ಬಲಿಜ ವೇದಿಕೆ ರಾಜ್ಯಾಧ್ಯಕ್ಷ ಮುನ್ನಿಕೃಷ್ಣ, ರಾಮನಗರ ಬಲಿಜ ಸಂಘದ ಜಿಲ್ಲಾಧ್ಯಕ್ಷ ಆರ್.ವಿ.ಸುರೇಶ್, ರಾಮನಗರ ತಾಲೂಕು ಕೈವಾರ ತಾತಯ್ಯ ಬಲಜಿಗ ಸಂಘದ ಅಧ್ಯಕ್ಷ ಹನುಮಶೆಟ್ಟಿ, ಕನಕಪುರ ತಾಲೂಕು ಅಧ್ಯಕ್ಷ ಬಾಲರಾಜು, ಹಾರೋಹಳ್ಳಿ ತಾಲೂಕು ಅಧ್ಯಕ್ಷ ವೆಂಕಟಶೆಟ್ಟಿ ಮುಖಂಡರಾದ ಕೃಷ್ಣ ಮೂರ್ತಿ, ಪದ್ಮನಾಭ, ರಾಮಚಂದ್ರಯ್ಯ, ಕಿಟ್ಟಣ್ಣ, ಮಾವಿನಸಸಿ ವೆಂಕಟೇಶ್, ಸುಧಾರಾಣಿ ಕಲಾಪ್ರಿಯ, ಮಾಲತಿ, ಜಾನ್ಸಿ, ಪುಷ್ಪಾ, ಮಂಜು, ಸುಹಾಸ್, ಅನಂತ್, ಶಿವಕುಮಾರ್, ಅಜಯ್‌ಬಾಬು ಮತ್ತಿತರರು ಉಪಸ್ಥಿತರಿದ್ದರು.

ರಾಮನಗರದ ಕೃಷ್ಣಸ್ಮೃತಿ ಕಲ್ಯಾಣ ಮಂಟಪದಲ್ಲಿ ರಾಮನಗರ ಜಿಲ್ಲಾ ಬಲಿಜ ಸಂಘ ಉದ್ಘಾಟನೆ, ಸಾವಿತ್ರಿಬಾಯಿ ಫುಲೆ ಜಯಂತಿ, ಸನ್ಮಾನ ಹಾಗೂ 2025ರ ದಿನದರ್ಶಿಕೆ ಬಿಡುಗಡೆ ಕಾರ್ಯಕ್ರಮದಲ್ಲಿ ನಗರಸಭೆ ನೂತನ ಅಧ್ಯಕ್ಷ ಕೆ.ಶೇಷಾದ್ರಿ ಅವರನ್ನು ಸನ್ಮಾನಿಸಲಾಯಿತು.