ಏಕರೂಪೀಕರಣದ ಹೇರಿಕೆಯಿಂದ ಬಹುತ್ವದ ಆಶಯಗಳಿಗೆ ಧಕ್ಕೆ

ದೊಡ್ಡಬಳ್ಳಾಪುರ: ಏಕರೂಪೀಕರಣದ ಹೇರಿಕೆಯ ಸಂದರ್ಭದಲ್ಲಿ ಬಹುತ್ವ ಪರಿಕಲ್ಪನೆ, ಸಮಷ್ಠಿಯ ಕೂಗು ಹೆಚ್ಚು ಮಹತ್ವವನ್ನು ಪಡೆಯುತ್ತದೆ. ಭಾಷೆ, ರಾಜಕಾರಣ, ಸಾಂಸ್ಕೃತಿಕ ವಿಚಾರಗಳ ನಿರ್ದಿಷ್ಟತೆ ಮೀರಿ ಅದು ಸಾಮೂಹಿಕ ಪ್ರಜ್ಞೆ ಎನಿಸುತ್ತದೆ ಎಂದು ಸಂಸ್ಕೃತಿ ಚಿಂತಕ ಡಾ.ರಹಮತ್‌ ತರೀಕೆರೆ ಅಭಿಪ್ರಾಯಪಟ್ಟರು.

ಪ್ರತಿಗಾಮಿ ಸಂಸ್ಕೃತಿಯಿಂದ ಬಹುತ್ವದೆಡೆಗೆ ಸಾಗುವ ಒಲವು ಮುಖ್ಯವಾಗಿದ್ದು, ಶಕ್ತಿ ರಾಜಕಾರಣ ಸೈದ್ದಾಂತಿಕವಾಗಿ ಹೊರಹೊಮ್ಮುವುದು ಅಪರೂಪ. ನಮ್ಮ ಗ್ರಾಮೀಣ ಸಂಸ್ಕೃತಿಯ ಪರಿಭಾಷೆಗಳು ಬದಲಾದಂತೆ ಸಂಸ್ಕೃತಿಯೂ ಬದಲಾಗುತ್ತದೆ. ಈ ದೇಶದಲ್ಲಿ ವೈವಿಧ್ಯವನ್ನು ಸಂಭ್ರಮಿಸುವುದಿದೆ. ವೈವಿಧ್ಯ ಎಂಬುದು ಬಹುತ್ವದ ಮೊದಲ ಹಂತ. ಸಹಬಾಳ್ವೆಯ ವೇಳೆ ಅದು ಮಿಶ್ರಣವಾಗುತ್ತದೆ. ಬಹುತ್ವ ಎಂಬುದು ಸಮಾನತೆಯ ನೆಲೆಯಲ್ಲಿ ರೂಪಗೊಳ್ಳುವ ತತ್ವ ಎಂದರು.

ಚಿಂತಕ ಡಾ.ನೆಲ್ಲುಕುಂಟೆ ವೆಂಕಟೇಶಯ್ಯ ಮಾತನಾಡಿ, ಬಹುತ್ವದಲ್ಲಿ ವೈಜ್ಞಾನಿಕ ಸತ್ಯವು ಅಡಗಿದೆ. ಮನುಷ್ಯಪರವಾದ ಬಹುತ್ವ ಉಳಿದರೆ ಮನುಷ್ಯ ಉಳಿಯುತ್ತಾನೆ. ಕೋಮುವಾದ ಮತ್ತು ಮತೀಯವಾದದ ಸಂಘರ್ಷಕ್ಕೆ ಅನುಮಾನ ಕಾರಣವಾಗುತ್ತದೆ. ಅನುಮಾನ ದ್ವೇಷವಾಗಿ, ಹಿಂಸೆ ರೂಪತಾಳಿ ವಿನಾಶದ ಕಡೆಗೆ ದೂಡುತ್ತದೆ. ಕೋಮು ಸೌಹಾರ್ದತೆಗೆ ಮತ್ತು ಸಾಮಾಜಿಕ ನ್ಯಾಯಕ್ಕಾಗಿ ಬಹುತ್ವದ ಅಗತ್ಯವಿದೆ ಎಂದರು.

ವಿಮರ್ಶಕ ಡಾ.ರವಿಕುಮಾರ್ ನೀಹ ಮಾತನಾಡಿ, ಯಾವುದೇ ಧರ್ಮದಲ್ಲಿ ಏಕರೂಪತೆ ತರಲು ಸಾಧ್ಯವಿಲ್ಲ. ಒಂದೇ ರೀತಿಯ ಊಟ, ಸಿದ್ಧಾಂತವನ್ನು ಹೇರುವುದು ಅಪಾಯಕಾರಿ. ಬಹುತ್ವದ ಮೇಲೆ ಏಕಸಂಸ್ಕೃತಿಯನ್ನು ಹೇರುವುದು ಸರಿಯಲ್ಲ ಎಂದರು.

ಫೋಟೋ-