ರಾಜಕೀಯ ವ್ಯವಸ್ಥೆ ಬದಲಾಯಿಸುವ ಗುಣ ಯುವಕರಲ್ಲಿ ಬರಬೇಕು-ನ್ಯಾ. ಸಂತೋಷ ಹೆಗ್ಡೆ

ಹಾವೇರಿ:ತೃಪ್ತಿ ಇಲ್ಲದವರ ಸಂಖ್ಯೆ ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗುತ್ತಿದೆ. ಹಣ, ಅಧಿಕಾರ ಇದ್ದವರೇ ದೊಡ್ಡವರಾಗುವುದು ಇಲ್ಲಿಯ ವ್ಯವಸ್ಥೆ. ಇಲ್ಲೂ ಒಂದು ದಿನ ಕ್ರಾಂತಿ ಆಗಬಹುದು. ರಾಜಕೀಯ ಬದಲಾಯಿಸುವ ಗುಣ ಯುವಕರಲ್ಲಿ ಬರಬೇಕು. ನ್ಯಾಯಾಂಗ ಪದ್ಧತಿಯಲ್ಲಿ ಆಮೂಲಾಗ್ರ ಬದಲಾವಣೆಗಳಾಗಬೇಕಿದೆ ಎಂದು ನಿವೃತ್ತ ನ್ಯಾಯಮೂರ್ತಿ ಸಂತೋಷ ಹೆಗ್ಡೆ ಹೇಳಿದರು. ಇಲ್ಲಿಯ ಹಾನಗಲ್ಲ ರಸ್ತೆಯಲ್ಲಿರುವ ಭಗತ್‌ಸಿಂಗ್ ಕಾಲೇಜಿನ ಆವರಣದಲ್ಲಿ ಜರುಗಿದ ಪ್ರಸಕ್ತ ಸಾಲಿನ ವಾರ್ಷಿಕೋತ್ಸವ ಮತ್ತು ದ್ವಿತೀಯ ಪಿಯುಸಿ ವಿದ್ಯಾರ್ಥಿಗಳ ಬೀಳ್ಕೊಡುಗೆ ಸಮಾರಂಭ ಮಹಾಕುಂಭ -2025ರ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡು ಅವರು ಮಾತನಾಡಿದರು. ಮೌಲ್ಯವಿಲ್ಲದ ಶಿಕ್ಷಣ ಹಣವನ್ನು ಗಳಿಸಲು ಪ್ರೇರೇಪಿಸುತ್ತದೆ. ಧರ್ಮ ಮತ್ತು ಜಾತಿಗಳು ಮನೆಯ ಒಳಗಡೆ ಇರಬೇಕು, ರಾಜಕೀಯದಲ್ಲಿ ಬೆರೆಸಬಾರದು. ಇಂದಿನ ಸಮಾಜದ ದೊಡ್ಡ ರೋಗವೆಂದರೆ ಜಿಗುಪ್ಸೆ, ಬೇರೆಯವರೊಂದಿಗೆ ತುಲನೆಯನ್ನು ಮಾಡಿಕೊಂಡು ಕೀಳರಿಮೆಯಲ್ಲೇ ಬದುಕುವವರೇ ಹೆಚ್ಚಾಗಿದ್ದಾರೆ. ರಾಜಕಾರಣ ಆಸ್ತಿ, ಅಧಿಕಾರ ಹಂಚಿಕೊಳ್ಳಲು ಅಲ್ಲ, ಬದಲಾಗಿ ಅದು ಜನಸೇವೆ ಆಗಬೇಕು ಎಂದು ಹೇಳಿದರು. ನೀವು ವಿದ್ಯಾರ್ಥಿಯಾಗಿದ್ದಾಗ ಹೇಗೆ ಅಭ್ಯಾಸ ಮಾಡುತ್ತಿದ್ದೀರಿ? ಲೋಕಾಯುಕ್ತರಾದಾಗ ಅತ್ಯಂತ ಕಠಿಣ ತೀರ್ಪುಗಳನ್ನು ಕೊಟ್ಟಾಗ ಜೀವ ಬೆದರಿಕೆಗಳು ಬಂದವೇ? ನಿಮ್ಮ ರೋಲ್ ಮೊಡೆಲ್ ಯಾರು? ಇಷ್ಟೆಲ್ಲ ಸಾಧಿಸಿದ ನಂತರ ಸಂತೋಷ ಹೆಗಡೆ ಇನ್ನುಮುಂದೆ ಏನು? ಅಣ್ಣಾ ಹಜಾರೆ ಅವರೊಂದಿಗಿನ ಸಂಬಂಧ ಹೇಗಿತ್ತು ? ಇಂದಿನ ರಾಜಕೀಯದ ಬಗ್ಗೆ ನಿಮ್ಮ ಅಭಿಪ್ರಾಯವೇನು? ನೀವು ರಾಜಕೀಯಕ್ಕೆ ಯಾಕೆ ಬರಬಾರದು? ಹೀಗೆ ಹಲವು ಪ್ರಶ್ನೆಗಳನ್ನು ವಿದ್ಯಾರ್ಥಿಗಳು ಕೇಳಿದರು. ಇದಕ್ಕೆಲ್ಲ ಸಮಾಧಾನದಿಂದಲೇ ಅವರು ಉತ್ತರಿಸಿದರು.

ಹಿರಿಯ ಲೇಖಕ ಸತೀಶ ಕುಲಕರ್ಣಿ ಕಾರ್ಯಕ್ರಮ ಉದ್ಘಾಟಿಸಿದರು. ಖುಷಿ ಜಗದೀಶ ಹತ್ತಿಕೊಟಿ ವಚನ ವಾಚಿಸಿದರು. ಅಂತಾರಾಷ್ಟ್ರೀಯ ಕ್ರೀಡಾಪಟು ಬಸಪ್ಪ ಆರ್.ಜಿ., ಸರ್ಕಾರಿ ಶಾಲಾ ಶಿಕ್ಷಕ ಗಿರೀಶ ದೊಡ್ಡಮನಿ, ಉದಯೋನ್ಮುಖ ರೈತ ಮಹಿಳೆ ಕಾವ್ಯಾ ಕುಂಟನಹೊಸಳ್ಳಿ, ಹಿರೇಲಿಂಗದಹಳ್ಳಿ ಸೂಲಗಿತ್ತಿ ಬಸಮ್ಮ ನೆಟಗಲ್ಲಣ್ಣನವರ ಅವರನ್ನು ಇದೇ ಸಂದರ್ಭದಲ್ಲಿ ಸನ್ಮಾನಿಸಲಾಯಿತು.