ಕರ್ನಾಟಕದ ನಿಜವಾದ ಸಂಸ್ಕೃತಿ ಉತ್ತರ ಕರ್ನಾಟಕದ್ದು: ಚಿರಂಜಿವಿ ಸಿಂಗ್‌

ಧಾರವಾಡ: ಉತ್ತರ ಕರ್ನಾಟಕದ್ದು ಕರ್ನಾಟಕದ ನಿಜವಾದ ಸಂಸ್ಕೃತಿ. ಈ ಸಂಸ್ಕೃತಿಯ ರಕ್ಷಕರು ವಿದ್ಯಾರ್ಥಿಗಳು. ನಮಗೆ ಎಂಥ ಸಮಾಜ ಇರಬೇಕು ಎಂದು ನಿರ್ಮಿಸಿಕೊಳ್ಳುವ ಶಕ್ತಿ ಅವರಿಗಿದೆ ಎಂದು ವಿಶ್ರಾಂತ ಐಎಎಸ್ ಅಧಿಕಾರಿ ಚಿರಂಜಿವಿ ಸಿಂಗ್ ನುಡಿದರು.

ನಮ್ಮ ದೇಶವನ್ನು ಸರ್ವಜನಾಂಗದ ಶಾಂತಿಯ ತೋಟ ಎಂದು ಹೇಳುತ್ತೇವೆ. ಆದರೀಗ, ನಮ್ಮ ದೇಶ ಯಾವ ದಿಕ್ಕಿನತ್ತ ಹೊರಟಿದೆ ಎಂದು ಯೋಚಿಸಬೇಕಿದೆ. ಬಸವಣ್ಣ ದಯವೇ ಧರ್ಮದ ಮೂಲ ಎಂದರು. ಹದಿನೈದನೇ ಶತಮಾನದ ಗುರುನಾನಕರು ಧರ್ಮ ದಯೆಯ ಸುಪುತ್ರ ಎನ್ನುತ್ತಾರೆ. ದೇಶವು ಬಸವ ಮಾರ್ಗ ವಿರುದ್ಧ ನಡೆಯುತ್ತಿದೆ. ವಚನಗಳು ಈ ಮಣ್ಣಿನ ಭಾಗ. ಕರ್ನಾಟಕದ ಜನತೆ ಮುಂದೆ ದೊಡ್ಡ ಸವಾಲು ಇದೆ. ಬಸವಣ್ಣನವರು ಮನುಷ್ಯನ ಬದುಕಿನ ಚಿಂತನೆ ನೀಡಿದ್ದಾರೆ. ಆದರೆ, ಅದರ ವಿರುದ್ಧ ಯಾಕೆ ಹೋಗುತ್ತಿದ್ದಾರೆ ಎಂಬುದು ಅರ್ಥವಾಗುತ್ತಿಲ್ಲ. ಮೌಲ್ಯಿಕ ಮಾರ್ಗ ಬಿಟ್ಟು ಅಮೌಲ್ಯಿಕ ಮಾರ್ಗಕ್ಕೆ ಯಾಕೆ ಹೋಗುತ್ತಿರುವುದು ಎಂಬುದರ ಕುರಿತು ಇಂದು ಯುವಕರು, ಚಿಂತಕರು ಆಲೋಚಿಸಬೇಕು ಎಂದರು.

ನಿವೃತ್ತ ಅಧಿಕಾರಿ ಡಾ. ಸದಾಶಿವ ಮರ್ಜಿ, ಪ್ರಾಧ್ಯಾಪಕ ಡಾ. ಅನುಸೂಯಾ ಕಾಂಬಳೆ ಮಾತನಾಡಿದರು. ಶಂಕರ ಹಲಗತ್ತಿ ಇದ್ದರು.

ಉತ್ತರ ಕರ್ನಾಟಕದ ಅಸಮತೋಲನದ ಹಿನ್ನೆಲೆಯಲ್ಲಿ ರಾಜ್ಯದ ರಾಜಧಾನಿ ರಾಣಿಬೆನ್ನೂರಿನಲ್ಲಿ ಆಗಬೇಕು ಎಂದು ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದೆ. ಆದರೆ, ಸರ್ಕಾರ ಒಪ್ಪಲಿಲ್ಲ. ಶಿಕ್ಷಣ ಮತ್ತು ಆರೋಗ್ಯ ಇಲ್ಲದೇ ಯಾವ ದೇಶವೂ ಅಭಿವೃದ್ಧಿ ಹೊಂದಲಾರದು. ನಮ್ಮ ರಾಜಕಾರಣಿಗಳು ಅಷ್ಟಾಗಿ ಶಿಕ್ಷಣದ ಬಗ್ಗೆ ಕಾಳಜಿ ವಹಿಸುವುದಿಲ್ಲ. ಅವರಿಗೆ ನೀವ್ಯಾಕೆ ಶಿಕ್ಷಣಕ್ಕೆ ಆಧ್ಯತೆ ಕೊಡತ್ತಿಲ್ಲ ಎಂದು ಕೇಳಬೇಕಾಗಿದೆ. ಉತ್ತರ ಕರ್ನಾಟಕದ ರಾಜಕಾರಣಿಗಳು ಕಾಳಜಿಯಿಂದ ಇದಕ್ಕೆ ಆಧ್ಯತೆ ನೀಡಬೇಕಿದೆ. ಆಗಲೇ ಹಿಂದುಳಿದ ಪ್ರದೇಶ ಅಭಿವೃದ್ಧಿ ಹೊಂದಲು ಸಾಧ್ಯ ಎಂದರು. ಮಕ್ಕಳೊಂದಿಗೆ ಸಂವಾದ ಮಾಡುತ್ತ ಹಲವಾರು ಪ್ರಶ್ನೆಗಳಿಗೆ ಉತ್ತರಿಸಿದರು.