ಇಳಿತು ಹೊಳೆ: ಬಂತು ಮಳೆ, ಬೆಳೆಗೆ ಜೀವ ಕಳೆ

ಕನ್ನಡಪ್ರಭ ವಾರ್ತೆ ಲಿಂಗಸುಗೂರು

ಹೊಳೆ ಬಂದಾಗ ಮಳೆ ಬರಲ್ಲ ಎಂಬುದು ಜನರ ಮಾತು ಅದರಂತೆ ಕೃಷ್ಣಾನದಿಯಲ್ಲಿ ನೆರೆ ಕಡಿಮೆ ಆಗುವ ತನಕ ಮಳೆ ಬರಲಿಲ್ಲ. ಇದರ ಮಧ್ಯೆ ಆಷಾಢದ ಗಾಳಿ ಬಿಸಿ ಮುಂಗಾರು ಬೆಳೆಗಳು ಬಾಡಿದ್ದವು. ಆಷಾಢ ಕಳೆದು ಕೃಷ್ಣಾನದಿಯಲ್ಲಿ ನೆರೆ ಕಡಿಮೆ ಆಗಿದೆ. ಜೊತೆಗೆ ಗ್ರಾಮೀಣ ಪ್ರದೇಶದ ರೈತರು ದೇವರಿಗೆ ನೀರು ಹಾಕುವುದು, ಕಪ್ಪೆ ಮದುವೆ ಮಾಡುವುದು. ಕತ್ತೆಗಳಿಗೆ ಕಂಕಣ ಭಾಗ್ಯ ಕಟ್ಟುವುದು ಸೇರಿದಂತೆ ಮಳೆಗಾಗಿ ಬಹು ಬಗೆ ಆರಾಧನೆಗಳ ಮಾಡುವ ಮೂಲಕ ದೇವರ ಮೋರೆ ಹೋಗಿದ್ದರು. ರೈತರ ಪ್ರಾರ್ಥನೆಗಳ ಬಳಿಕ ಮಳೆ ಆಗಮನ ಆಗಿದೆ. ಮಳೆ ಬಂದಿರುವುದರಿಂದ ಅನ್ನದಾತರು ಆನಂದ ಗೊಂಡಿದ್ದಾರೆ.

ತಾಲೂಕಿನ ಲಿಂಗಸುಗೂರು, ಗುರುಗುಂಟಾ, ಮುದಗಲ್, ನಾಗರಾಳ ಸೇರಿ ಹೋಬಳಿಗಳ ವ್ಯಾಪ್ತಿ ಸುತ್ತಲೂ ಹಸಿ ಮಳೆ ಸುರಿದಿದೆ. ಕೃಷಿ ಇಲಾಖೆ ಮಾಹಿತಿ ಪ್ರಕಾರ ಜುಲೈ ತಿಂಗಳು 75.77 ಮಿ.ಮೀ. ಮಳೆ ಆಗಬೇಕಿತ್ತು ಆದರೆ 67 ಮಿ.ಮೀ. ಮಳೆ ಆಗಿದ್ದು 11ರಷ್ಟು ಕೊರತೆ ಉಂಟಾಗಿದೆ. ಮಳೆ ಕೊರತೆಯಿಂದ ಬೆಳೆ ಬಾಡುವ ಜೊತೆಗೆ ಬೆಳವಣಿಗೆ ಕುಂಠಿತಗೊಂಡಿದೆ. ಅಲ್ಲದೇ ಖುಷ್ಕಿ ಪ್ರದೇಶದಲ್ಲಿ ಮೆಲೂ ರಸಗೊಬ್ಬರ ಹಾಕಲು ಹಿನ್ನಡೆ ಆಗಿದೆ. ಈಗ ಸುರಿದ ಮಳೆ ಮುಂಗಾರು ಬೆಳೆಗೆ ಹೊಸ ಜೀವ ಕಳೆ ಕೊಟ್ಟಿದೆ.