ಹಿರಿಯೂರಲ್ಲಿ ಭಿನ್ನಗೊಂಡ ಶ್ರೀರಾಮ ದೇಗುಲ ಇಲ್ಲ ದುರಸ್ತಿ ಭಾಗ್ಯ

ರಸ್ತೆ ವಿಸ್ತರಣೆಗೆ ಮಂದಿರದ ಮುಂಭಾಗ ಭಗ್ನ । ಈ ಬಾರಿಯೂ ರಾಮ ನವಮಿ ಅನುಮಾನ । ಅಧಿಕಾರಿಗಳ ನಿರ್ಲಕ್ಷ್ಯ

ರಸ್ತೆ ವಿಸ್ತರಣೆಯ ಕಾರಣಕ್ಕಾಗಿ ನಗರದ ಮುಖ್ಯ ರಸ್ತೆಯಲ್ಲಿರುವ ಮಂದಿರದ ಮುಂಭಾಗ ಕೆಡವಿ ಬರೋಬ್ಬರಿ 5 ತಿಂಗಳಾಗಿ ರಾಮ ನವಮಿ ಹಬ್ಬ ಬಂದರೂ ಭಿನ್ನಗೊಂಡ ದೇವಾಲಯ ಹಾಗೇ ಇದೆ.

ಪೂಜೆ ಪುನಸ್ಕಾರ ಮಾಡಿ ಒಡೆಯುವ ಬದಲು ತರಾತುರಿಯಲ್ಲಿ ಒಡೆದರು. ಮುಂಬಾಗಿಲು ಮತ್ತು ಅಕ್ಕಪಕ್ಕದ ರಕ್ಷಣಾ ಗೋಡೆ ಇಲ್ಲದಿರುವುದರಿಂದ ಹಳೆ ಕಾಲದ ಘಂಟೆ ಹಾಗೂ ಹುಂಡಿ ಕಳ್ಳತನವಾಗಿವೆ ಎಂಬುದು ಭಕ್ತರ ಆರೋಪವಾಗಿದೆ. ಮೊದಲೆಲ್ಲಾ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತಿನ ಹಲವು ಕಾರ್ಯಕ್ರಮಗಳು ಹಾಗೂ ಗುರುರಾಜುಲು ನಾಯ್ದುರಂತಹ ವಿದ್ವಾಂಸರ ಕಾರ್ಯಕ್ರಮಗಳು ನಡೆಯುತ್ತಿದ್ದ ಮಂದಿರವೀಗ ಬಿಕೋ ಎನ್ನುತ್ತಿದೆ.

ಮುಜರಾಯಿ ಅಧಿಕಾರಿ ಹಾಗೂ ತಹಸೀಲ್ದಾರ್ ರಾಜೇಶ್ ಕುಮಾರ್ ಈ ಬಗ್ಗೆ ಪ್ರತಿಕ್ರಿಯೆ ನೀಡಿ ಸತ್ಯನಾರಾಯಣ ದೇವಸ್ಥಾನದ ಮುಂಭಾಗವನ್ನು ರಸ್ತೆ ವಿಸ್ತರಣೆಗೆ ತೆರವುಗೊಳಿಸಿದ್ದು ಸಚಿವರು ಉಳಿದ ಭಾಗವನ್ನು ರಿಪೇರಿ ಮಾಡಿಸಿಕೊಡುವ ಸಂಪೂರ್ಣ ವೆಚ್ಚವನ್ನು ಭರಿಸುವ ಆಶ್ವಾಸನೆ ನೀಡಿದ್ದಾರೆ. ಅವರೇ ಅದರ ವೆಚ್ಚ ಭರಿಸಿ ಮತ್ತೆ ದೇವಸ್ಥಾನ ಅಂದಗೊಳಿಸುವ ಹೊಣೆ ಹೊತ್ತಿದ್ದು ಅವರೊಂದಿಗೆ ಮಾತನಾಡಿ ಆದಷ್ಟು ಬೇಗ ದೇಗುಲವನ್ನು ರಿಪೇರಿ ಮಾಡಿಸಲಾಗುವುದು ಎಂದರು.